KA BUKE MUA A MOSE, I KAPA ʻIA KINOHI 44 - Ka Baibala Hemolele

1 Kā Iosepa kāohi ʻana i kona mau hoahānau. 18 Kā Iuda noi ʻana iā ia.

MOKUNA XLIV.

¹ ¶ A kauoha akula ia i ka luna o kona hale, ʻī akula, “E uhao i ka ʻai i loko o nā ʻeke a ua mau kānaka lā a piha, a e waiho i ka moni a lākou a pau ma loko o ka waha o kā lākou mau ʻeke.

² “A e uhao hoʻi i kuʻu kīʻaha, i ke kīʻaha kālā ma loko o ka waha o ka ʻeke a ka mea ʻōpiopio loa, a me kāna moni no ka ʻai.” Hana maila kēlā ma ka ʻōlelo a Iosepa i ʻōlelo aku ai.

³ A ao aʻela, ua hoʻihoʻi ʻia akula ua poʻe kānaka lā, a me ko lākou mau hoki.

⁴ A puka akula lākou ma waho o ke kūlanakauhale, ʻaʻole i hiki i kahi lōʻihi, a laila ʻōlelo akula ʻo Iosepa i kāna luna, “E kū ʻoe, e alualu aku i ua poʻe kānaka lā, a loaʻa lākou iā ʻoe, e ʻī aku iā lākou, ‘No ke aha ʻoukou i hoʻihoʻi mai ai i ka hewa no ka pono?

⁵ ‘ʻAʻole anei kēia o ka mea a kaʻu haku i inu ai i loko? A i kilo ai hoʻi? Ua hewa ʻoukou i ka hana ʻana pēlā.’”

⁶ ¶ A hiki akula ia i o lākou lā, ʻōlelo akula ia iā lākou i kēia mau ʻōlelo.

⁷ Nīnau maila lākou iā ia, “No ke aha lā i ʻōlelo mai ai kuʻu haku i kēia ʻōlelo? ʻAʻole loa e hiki i kou poʻe kauā ke hana e like me ia.

⁸ “Eia hoʻi, ʻo ka moni a mākou i loaʻa ai i loko o ka waha o kā mākou mau ʻeke, ua halihali hou mai mākou i ʻaneʻi iā ʻoe mai loko mai o ka ʻāina ʻo Kanaʻana. Pehea hoʻi mākou i ʻaihue ai i ke kālā, a i ke gula, no loko mai o ka hale o kou haku?

⁹ “A i ʻike ʻia ia mea i kekahi o kou poʻe kauā, e make ia, a e lilo mākou i poʻe kauā na kou haku.”

¹⁰ ʻŌlelo akula ia, “ʻAe, e like me kā ʻoukou ʻōlelo, pēlā nō ia; ʻo ka mea ua loaʻa me ke kīʻaha, e lilo ia i kauā naʻu, a e hala ʻole ʻoukou.”

¹¹ Kuʻu koke ihola lākou a pau i kā lākou mau ʻeke i lalo i ka honua, a wehe aʻela lākou i kā lākou mau ʻeke.

¹² A ʻimi ihola kēlā, a hoʻomaka ihola ma ka hiapo, a oki aʻela ma ka muli loa, a loaʻa maila ke kīʻaha ma ka ʻeke a Beniamina.

¹³ A laila haehae ihola lākou i ko lākou mau kapa, a kau akula kēlā kanaka kēia kanaka i ka ukana ma kāna hoki, a hoʻi akula i ke kūlanakauhale.

¹⁴ ¶ A hele akula ʻo Iuda a me kona poʻe hoahānau i ka hale o Iosepa, aia nō ia; a moe ihola lākou i mua ona i lalo i ka honua.

¹⁵ Nīnau akula ʻo Iosepa iā lākou, “He aha kēia mea a ʻoukou i hana mai nei? ʻAʻole anei ʻoukou i ʻike, e hiki i ke kanaka me aʻu nei e kilokilo aku?”

¹⁶ ʻŌlelo akula ʻo Iuda, “Pehea lā mākou e pane aku ai iā ʻoe, e kuʻu haku? He aha ko mākou e ʻōlelo aku ai? Pehea mākou e hoʻāpono ai iā mākou iho? Ua loaʻa i ke Akua ka hewa o kāu poʻe kauā; eia hoʻi, he poʻe kauā mākou na koʻu haku, ʻo mākou, a me ka mea i loaʻa ke kīʻaha ma kona lima.”

¹⁷ ʻŌlelo maila ʻo Iosepa, “ʻAʻole loa e hiki iaʻu ke hana pēlā; akā, ʻo ke kanaka, i loaʻa ai ke kīʻaha i kona lima, e lilo ia i kauā naʻu; a ʻo ʻoukou, e hoʻi aku me ka maluhia i ko ʻoukou makua kāne.”

¹⁸ ¶ A laila neʻeneʻe akula ʻo Iuda i ona lā, ʻī akula, “Auē, e kuʻu haku ē! Inā e ʻae mai kuʻu haku i kāna kauā nei, ke haʻi aku i kekahi ʻōlelo ma kona pepeiao, ʻaʻole hoʻi e wela mai kou huhū i kāu kauā; no ka mea, ua like ʻoe me Paraʻo.

¹⁹ “Nīnau maila kuʻu haku i kāu poʻe kauā nei, ʻī maila, ‘He makua kāne anei ko ʻoukou, a he kaikaina anei?’

²⁰ “A ʻōlelo akula mākou i kuʻu haku, ‘He makua kāne nō ko mākou, he kanaka kahiko, a me kahi keiki o kona wā ʻelemakule, he mea ʻuʻuku; a ʻo kona kaikuaʻana, ua make ia, ʻo ia wale nō kai koe a kona makuahine, a ua aloha kona makua kāne iā ia.’

²¹ “A ʻōlelo maila ʻoe i kāu poʻe kauā, ‘E lawe mai iā ia i lalo i oʻu nei, i ʻike aku kuʻu maka iā ia.’

²² “A laila ʻōlelo akula mākou iā ʻoe i kuʻu haku, ‘ʻAʻole e hiki i ke keiki ke haʻalele i kona makua kāne; no ka mea, inā e haʻalele ke keiki i kona makua kāne, e make nō ia.’

²³ “A ʻōlelo maila ʻoe i kāu poʻe kauā, ‘A i hele ʻole mai ko ʻoukou kaikaina me ʻoukou, ʻaʻole ʻoukou e ʻike hou mai i kuʻu maka.’

²⁴ “A hiki akula mākou i kāu kauā i koʻu makua kāne, haʻi akula mākou iā ia i ka ʻōlelo a kuʻu haku.

²⁵ “A ʻōlelo maila ko mākou makua kāne, ‘Ō hele hou ʻoukou e kūʻai i wahi ʻai iki na kākou.’

²⁶ “ʻŌlelo aku mākou, ‘ʻAʻole loa mākou e hiki ke hele i lalo; akā, i hele pū ko mākou kaikaina me mākou, a laila e hele aku mākou i lalo; no ka mea, ʻaʻole e hiki iā mākou ke ʻike aku i ka maka o ua kanaka lā, ke hele pū ʻole ko mākou kaikaina me mākou.’

²⁷ “A laila ʻōlelo maila kāu kauā o koʻu makua kāne iā mākou, ‘Ua ʻike ʻoukou, ua hānau maila kaʻu wahine i nā keiki ʻelua naʻu.

²⁸ ‘A hele akula kekahi mai oʻu aku nei, a ʻī akula au, “He ʻoiaʻiʻo nō ua weluwelu ia”; ʻaʻole hoʻi au i ʻike hou aku iā ia.

²⁹ ‘A i lawe aku ʻoukou iā ia nei, mai oʻu aku nei, a loʻohia ia i ka pōʻino, a laila, e lawe aku ʻoukou i koʻu oho hina i lalo i ka lua me ke kaniʻuhū.’

³⁰ “No kēia mea hoʻi, ke hiki aku au i kāu kauā i koʻu makua kāne, ʻaʻole ke keiki me mākou, ua paʻi pū ʻia kona ola me ke ola o ke keiki;

³¹ a ʻike mai ia, ʻaʻole ke keiki me mākou, a laila, e make ia; a e lawe iho ʻo kāu poʻe kauā i ke oho hina o kāu kauā o ko mākou makua kāne i lalo i ka lua me ke kaniʻuhū.

³² “No ka mea, ua hoʻohiki au iaʻu iho no ke keiki i koʻu makua kāne, ua ʻī aku au, ‘A i hoʻihoʻi ʻole mai au iā ia i ou lā, noʻu mau loa aku nō ka hewa i mua o koʻu makua kāne.’

³³ “No kēia mea hoʻi, e ʻae mai ʻoe iaʻu i noho au, kāu kauā i pānaʻi no ke keiki, i kauā na kuʻu haku; e hoʻi aku hoʻi ke keiki me kona poʻe kaikuaʻana.

³⁴ “No ka mea, pehea lā au e hoʻi aku ai i kuʻu makua kāne, ʻaʻole ke keiki me aʻu? O ʻike auaneʻi au i ka mea ʻino e hiki mai ana ma luna o kuʻu makua kāne.”