KA BUKE MUA A MOSE, I KAPA ʻIA KINOHI 42 - Ka Baibala Hemolele

1 Ka hele ʻana o kā Iakoba poʻe keiki kāne i ʻAigupita. 6 Loaʻa iā Iosepa. 17 Paʻa iā ia. 21 Ko lākou mihi ʻana, 26 a hoʻi i Kanaʻana.

MOKUNA XLII.

¹ ¶ A ʻike aʻela ʻo Iakoba, he ʻai ma ʻAigupita, ʻōlelo akula ʻo Iakoba i kāna poʻe keiki kāne, “ʻO ke aha kā ʻoukou e nānā aku nei, kekahi i kekahi?”

² ʻŌlelo akula ia, “Aia hoʻi, ua lohe au, he ʻai ma ʻAigupita. E iho aku ʻoukou i laila, e kūʻai i ʻai na kākou, i ola kākou, ʻaʻole e make.”

³ Hele akula ka poʻe kaikuaʻana o Iosepa he ʻumi i lalo i ʻAigupita e kūʻai i ʻai.

⁴ A ʻo Beniamina, ke kaikaina o Iosepa, ʻaʻole ʻo Iakoba i hoʻouna aku iā ia me kona poʻe kaikuaʻana; no ka mea, i ʻōlelo ihola ia, “O pōʻino kēlā.”

⁵ Hele pū aʻela nā keiki a ʻIseraʻela i waena o ka poʻe hele, e kūʻai i ʻai; no ka mea, ua wī loa ka ʻāina ʻo Kanaʻana.

⁶ ʻO Iosepa nō ke kiaʻāina o laila, a nāna nō i kūʻai na nā kānaka a pau o ia ʻāina. Hele maila ka poʻe kaikuaʻana o Iosepa, a kūlou ihola lākou i mua ona, me nā maka i ka honua.

⁷ A nānā akula ʻo Iosepa i kona poʻe kaikuaʻana, ʻike aʻela ʻo ia iā lākou, a hoʻohuahualau aku ʻo ia iā lākou, ʻōlelo koʻikoʻi akula ʻo ia iā lākou, ʻī akula iā lākou, “No hea mai ʻoukou?” ʻŌlelo maila lākou, “No ka ʻāina ʻo Kanaʻana mai, e kūʻai i ʻai.”

⁸ ¶ Ua ʻike nō ʻo Iosepa i kona poʻe kaikuaʻana, ʻaʻole naʻe lākou i ʻike iā ia.

⁹ Hoʻomanaʻo ihola ʻo Iosepa i nā moe āna i moe ai no lākou, ʻī akula ʻo ia iā lākou, “He poʻe kiu ʻoukou; ua hele mai ʻoukou e nānā i ka hemahema o ka ʻāina.”

¹⁰ ʻŌlelo maila lākou iā ia, “ʻAʻole ia, e kuʻu haku. I hele mai kāu poʻe kauā e kūʻai i ʻai.

¹¹ “He poʻe keiki mākou a pau na ke kanaka hoʻokahi; he poʻe kānaka pono, ʻaʻole he poʻe kiu mākou ʻo kāu poʻe kauā.”

¹² ʻŌlelo akula ia iā lākou, “ʻAʻole, ua hele mai nei ʻoukou e nānā i ka hemahema o ka ʻāina.”

¹³ ʻŌlelo maila lākou, “ʻO kāu poʻe kauā, he ʻumi mākou a me kumamālua o ko mākou hanauna, nā keiki a ke kanaka hoʻokahi i ka ʻāina ʻo Kanaʻana, aia hoʻi ka muli loa i kēia lā me ka makua kāne o mākou, a ʻo kekahi hoʻi, ʻaʻole ia.”

¹⁴ ʻŌlelo akula ʻo Iosepa iā lākou, “ʻO ia hoʻi kaʻu i ʻōlelo aku nei iā ʻoukou, ‘He poʻe kiu ʻoukou.’

¹⁵ “I kēia mea e ʻikea ai ʻoukou, ma ke ola o Paraʻo, ʻaʻole ʻoukou e hoʻi aku, ke hiki ʻole mai ko ʻoukou kaikaina.

¹⁶ “E hoʻouna aʻe i kekahi o ʻoukou e kiʻi i ko ʻoukou kaikaina, a e paʻa ʻoukou, i ʻikea kā ʻoukou ʻōlelo a me ka pono ʻiʻo o ʻoukou; akā, i ʻole, ma ke ola o Paraʻo, he poʻe kiu ʻiʻo nō ʻoukou.”

¹⁷ A hoʻākoakoa maila ʻo ia iā lākou a pau i loko o kahi paʻa, a ʻekolu lā.

¹⁸ ¶ A i ka pō ʻakolu, ʻōlelo akula ʻo Iosepa iā lākou, “E hana ʻoukou i kēia, i ola ʻoukou; ua makaʻu wau i ke Akua.

¹⁹ “Inā he poʻe kānaka pono ʻoukou, e paʻa ʻia kekahi o ʻoukou i ka hale paʻahao; e hoʻi aku ʻoukou e halihali i ʻai na ka wī o ko ʻoukou mau hale.

²⁰ “A e lawe mai i ko ʻoukou kaikaina i oʻu nei, pēlā e ʻoiaʻiʻo ai kā ʻoukou ʻōlelo, a laila, ʻaʻole ʻoukou e make.” Hana maila lākou pēlā.

²¹ ʻŌlelo aʻela lākou kekahi i kekahi, “Ua hewa ʻiʻo kākou i ko kākou kaikaina; no ka mea, ua ʻike kākou i ka ʻehaʻeha o kona naʻau, i ka manawa āna i noi mai ai iā kākou, ʻaʻole kākou i hoʻolohe aku; no ia mea, ua hiki mai kēia pōpilikia i o kākou nei.”

²² A ʻōlelo akula ʻo Reubena iā lākou, ʻī akula, “ʻAʻole anei au i ʻōlelo aku iā ʻoukou, i ka ʻī ʻana aku, ‘Mai hana hewa aku i ke keiki’? ʻAʻole ʻoukou i hoʻolohe mai. Aia hoʻi, no ia mea, ua ʻimi ʻia mai ko ia lā koko.”

²³ ʻAʻole i ʻike lākou ua lohe pono ʻo Iosepa iā lākou; no ka mea, ua ʻōlelo aku ʻo ia iā lākou, ma ke kanaka hoʻohālike ʻōlelo.

²⁴ Hāliu akula ia, mai o lākou lā, a uē ihola; hāliu hou maila ʻo ia iā lākou, kamaʻilio pū me lākou, a lawe maila ʻo ia iā Simeona, mai o lākou mai lā, a hana paʻa ihola iā ia ma mua o ko lākou mau maka.

²⁵ ¶ A laila, kauoha akula ʻo Iosepa, e uhao i ka ʻai i nā ʻeke a lākou a piha, a e hoʻihoʻi i ka moni a lākou i loko o ko lākou mau ʻeke, a e hāʻawi aku i ō na lākou no ke alanui. Pēlā ʻo ia i hana aku ai iā lākou.

²⁶ Hoʻoili aʻela lākou i ka ʻai i luna iho o ko lākou mau hoki, a hele akula.

²⁷ A i ka wehe ʻana o kekahi i kāna ʻeke, e hāʻawi aku i ʻai na kona hoki, ma kahi oʻioʻina, ʻike aʻela ia i kāna moni; no ka mea, aia hoʻi ia ma ka waha o kāna ʻeke.

²⁸ A ʻōlelo akula ia i kona poʻe hoahānau, “Ē, ua hoʻihoʻi ʻia mai kaʻu moni; eia hoʻi ia i loko o kaʻu ʻeke!” Hikilele ihola ko lākou naʻau, haʻalulu ihola lākou, ʻī akula kekahi i kekahi, “He aha kēia mea a ke Akua i hana mai ai iā kākou?”

²⁹ ¶ A hiki lākou i o Iakoba lā, i ko lākou makua kāne i ka ʻāina ʻo Kanaʻana, haʻi akula lākou iā ia i nā mea a pau i loaʻa ai iā lākou; ʻī akula:

³⁰ “ʻO ke kanaka, ka haku o ka ʻāina i ʻōlelo koʻikoʻi mai ai iā mākou; ua kuhi mai kēlā iā mākou, he poʻe kiu no ka ʻāina.

³¹ “A ʻōlelo akula mākou iā ia, ‘He poʻe pono mākou; ʻaʻohe mākou he kiu.

³² ‘He poʻe hanauna mākou, he ʻumi a me kumamālua, nā keiki a ko mākou makua kāne; ʻaʻole kekahi, a ʻo ka muli loa, aia nō ia i kēia lā me ko mākou makua kāne, i ka ʻāina ʻo Kanaʻana.’

³³ “A ʻo ke kanaka, ka haku o ka ʻāina, ʻōlelo maila iā mākou, ‘I kēia mea e ʻike ʻia ai he poʻe kānaka pono ʻoukou: e waiho mai ʻoukou i kekahi hoahānau o ʻoukou me aʻu, a e lawe i ʻai na ka wī o ko ʻoukou mau hale, a e hoʻi aku.

³⁴ ‘A e lawe mai ʻoukou i ko ʻoukou kaikaina i oʻu nei; a laila, ʻike au iā ʻoukou, ʻaʻohe kiu, he poʻe kānaka maikaʻi nō ʻoukou; a e kuʻu aku au iā ʻoukou i ko ʻoukou hoahānau, a e kūʻai ʻoukou i loko o kēia ʻāina.’”

³⁵ ¶ A i ka ninini ʻana aku a lākou i kā lākou mau ʻeke, aia hoʻi, i loko o nā ʻeke a lākou, kā lākou mau laulau moni a pau. A ʻike aʻela lākou a me ko lākou makua kāne i nā laulau moni, makaʻu nui ihola lākou.

³⁶ A ʻōlelo maila ʻo Iakoba ko lākou makua kāne iā lākou, “Ua hoʻonele mai ʻoukou iaʻu i kaʻu mau keiki. ʻO Iosepa, ʻaʻole ia, a ʻo Simeona, ʻaʻole ia, a e lawe aku ana ʻoukou iā Beniamina. Ke pale mai nei kēia mau mea a pau iaʻu.”

³⁷ ʻŌlelo akula ʻo Reubena i kona makua kāne, ʻī akula, “E pepehi mai ʻoe i kaʻu mau keiki ʻelua, ke hoʻihoʻi ʻole mai au iā ia nei i ou lā; e hāʻawi mai ʻoe iā ia nei i kuʻu lima, naʻu ia e hoʻihoʻi hou mai i ou lā.”

³⁸ ʻŌlelo maila ia, “ʻAʻole e iho aku kaʻu keiki me ʻoukou i laila; no ka mea, ua make kona kaikuaʻana, ʻo ia nei wale nō koe; inā pōʻino kēia, ma ke alanui a ʻoukou e hele ai, a laila, lawe iho ʻoukou i koʻu oho hina i ka lua me ke kaniʻuhū.”