KA BUKE MUA A MOSE, I KAPA ʻIA KINOHI 41 - Ka Baibala Hemolele

1 Nā moe a Paraʻo, 9 a me ke kiʻi ʻana iā Iosepa. 25 Kāna hoʻākāka ʻana, 37 a lilo i kiaʻāina. 50 Hānau ʻia nā keiki ʻelua nāna. 53 Ka wī.

MOKUNA XLI.

¹ ¶ Ma hope o nā makahiki ʻelua, moe ihola ʻo Paraʻo, aia hoʻi, kū ihola ia ma kapa o ka muliwai.

² Aia hoʻi, hōʻea maila, mai loko mai o ka muliwai, ʻehiku bipi maikaʻi, kaha ke kino, ʻai ihola lākou ma kahi weuweu.

³ Hōʻea hou maila, ma hope mai o lākou, mai loko mai o ka muliwai, ʻehiku bipi ʻinoʻino, a ʻōlala ke kino, a kū pū maila lākou me kēlā mau bipi, ma kapa o ka muliwai.

⁴ ʻAi ihola nā bipi ʻehiku ʻinoʻino a ʻōlala ke kino, i nā bipi maikaʻi a kaha ke kino; a hikilele mai ʻo Paraʻo.

⁵ Hiamoe hou ihola ia, a loaʻa ka moe, aia hoʻi, hua maila nā ʻōpuʻu palaoa ʻehiku i ke kumu hoʻokahi, he ōhāhā a he maikaʻi.

⁶ Aia hoʻi, hua hou maila ma hope mai o lākou, nā ʻōpuʻu hou ʻehiku, he wīwī, a mae i ka makani mai ka hikina mai.

⁷ ʻAi ihola nā ʻōpuʻu wīwī ʻehiku i nā ʻōpuʻu ʻehiku i ōhāhā a nui. A hikilele maila ʻo Paraʻo, aia hoʻi, he moe nāna.

⁸ A ao aʻela ʻānoninoni ihola kona naʻau; hoʻouna akula ia e kiʻi i nā kilo a pau o ʻAigupita, a me nā kānaka naʻauao a pau o ia wahi; a haʻi akula ʻo Paraʻo iā lākou i kāna mau moe; ʻaʻohe mea nāna i hoʻākāka mai i ke ʻano o ua mau moe nei a Paraʻo.

⁹ ¶ A laila ʻōlelo akula ka luna lawe kīʻaha iā Paraʻo, ʻī akula, “Ke hoʻomanaʻo nei au i kēia lā i kuʻu hewa.

¹⁰ “Ma mua, huhū mai ʻo Paraʻo i kāna mau kauā, a hahao akula iā māua me ka luna kahu ʻai i loko o ka hale paʻahao, i kahi o ka luna koa.

¹¹ “I ka pō hoʻokahi nō, moe ihola māua i ka moe, ʻo wau a me kēlā, e like me ka hōʻike ʻana mai i ka moe āna i moe ai.

¹² “I laila kekahi kanaka ʻōpiopio me māua, he Hebera, he kauā ia na ka luna koa; haʻi akula māua iā ia, a haʻi maila kēlā iā māua i ke ʻano o kā māua mau moe. He ʻoiaʻiʻo ke ʻano āna i hōʻike mai ai iā māua.

¹³ “E like me kāna i hōʻike mai ai, ʻoiaʻiʻo nō ia. Hoʻihoʻi ʻia mai au i koʻu wahi, a kāʻawe ʻia kēlā.”

¹⁴ ¶ A laila hoʻouna akula ʻo Paraʻo, e kiʻi iā Iosepa; hoʻolalelale aʻela lākou iā ia, mai kahi paʻa mai; kahi aʻela ʻo ia i ka ʻumiʻumi, komo ihola ia i ke kapa hou, a hele akula i o Paraʻo lā.

¹⁵ ʻŌlelo maila ʻo Paraʻo iā Iosepa, “Ua moe au i ka moe, ʻaʻohe mea nāna e hoʻākāka mai ke ʻano, ua lohe au nou, aia lohe ʻoe i ka moe, e hiki iā ʻoe ke haʻi i ke ʻano.”

¹⁶ ʻŌlelo akula ʻo Iosepa iā Paraʻo, ʻī akula, “ʻAʻole naʻu ia, na ke Akua nō e haʻi lokomaikaʻi mai iā Paraʻo.”

¹⁷ ʻĪ akula ʻo Paraʻo iā Iosepa, “Ma kuʻu moe ʻana, kū akula au ma kapa o ka muliwai.

¹⁸ “Aia hoʻi, hōʻea maila, mai loko mai o ka muliwai, ʻehiku bipi kaha a maikaʻi ke nānā aku, a ʻai ihola ma kahi weuweu.

¹⁹ “Aia hoʻi, hōʻea hou maila, ma hope mai o lākou nā bipi ʻehiku he wīwī, a ʻinoʻino loa ke nānā aku, ʻōlala ke kino, ʻaʻole i ʻike ʻia ka mea e like me lākou ma ka ʻāina a pau o ʻAigupita, no ka ʻino.

²⁰ “ʻAi ihola nā bipi wīwī a ʻōlala, i nā bipi kaha ʻehiku i hōʻea mua mai ai.

²¹ “A komo ihola lākou i loko o ko lākou ʻōpū, ʻaʻole hoʻi i ʻike ʻia ko lākou komo ʻana i loko o ka ʻōpū; no ka mea, ua mau nō ko lākou ʻino, e like ma mua. A hikilele aʻela au.

²² “A ʻike akula au ma kuʻu moe, aia hoʻi, ʻehiku ʻōpuʻu palaoa ma ke kumu hoʻokahi, he ōhāhā a he maikaʻi.

²³ “Aia hoʻi, kupu hou maila ma hope mai o lākou, ʻehiku ʻōpuʻu hou, he mimino, he wīwī, a mae i ka makani mai ka hikina mai.

²⁴ “Pau aʻela nā ʻōpuʻu ōhāhā maikaʻi ʻehiku i nā ʻōpuʻu wīwī. A haʻi akula au i ka poʻe akamai, ʻaʻohe mea nāna i hoʻākāka mai.”

²⁵ ¶ ʻŌlelo akula ʻo Iosepa iā Paraʻo, “ʻO ka moe a Paraʻo, hoʻokahi nō ia; ua hōʻike mai ke Akua iā Paraʻo i kāna mea e hana mai ana.

²⁶ “ʻO ua mau bipi maikaʻi lā ʻehiku, ʻehiku ia makahiki; a ʻo ua mau ʻōpuʻu palaoa maikaʻi lā ʻehiku, ʻehiku ia makahiki; hoʻokahi nō ia moe.

²⁷ “A ʻo ua mau bipi wīwī ʻinoʻino lā ʻehiku, i ea mai ai ma hope o lākou, ʻehiku ia makahiki; a ʻo nā ʻōpuʻu palaoa wīwī a mae i ka makani no ka hikina mai, ʻehiku makahiki ia o ke kau wī.

²⁸ “Eia nō kaʻu mea i haʻi aku ai iā Paraʻo; ua hōʻike mai ke Akua iā Paraʻo i kāna mea e hana mai ana.

²⁹ “Aia hoʻi, e hiki mai ana nā makahiki ʻehiku, he mau makahiki ʻai nui ma ka ʻāina a pau o ʻAigupita.

³⁰ “A ma hope iho o lākou, e hiki mai auaneʻi nā makahiki ʻehiku e wī ai, a e poina ʻia auaneʻi ke ola a pau, ma ka ʻāina i ʻAigupita, e oki loa ka ʻāina i ka wī.

³¹ “ʻAʻole e ʻike ʻia ke ola ma ka ʻāina, no ka wī e hiki ana ma hope; no ka mea, e kaumaha loa ia.

³² “Ua pāpālua ʻia ka moe a Paraʻo; no ka mea, ua paʻa ia manaʻo o ke Akua, a ua kokoke e hana ʻiʻo mai nō ke Akua.

³³ “No kēia mea, pono e ʻimi ʻo Paraʻo i kekahi kanaka naʻauao a me ke akamai, a e hoʻonoho iā ia ma luna o ka ʻāina o ʻAigupita a pau loa.

³⁴ “E pono iā Paraʻo e hoʻomākaukau, a e hoʻonoho i poʻe luna no ka ʻāina, a e ʻohi lākou i ka hapalima o ka ʻai ma ka ʻāina ʻo ʻAigupita, ia mau makahiki momona ʻehiku.

³⁵ “A e hōʻiliʻili mai lākou i ka ʻai a pau o nā makahiki maikaʻi e hiki mai ana, a e hoʻāhu mai i palaoa ma lalo o ka lima o Paraʻo, a e mālama hoʻi lākou i ka ʻai i loko o nā kūlanakauhale.

³⁶ “He ʻai mālama ia no ka ʻāina, no nā makahiki wī ʻehiku, e hiki mai ana ma ka ʻāina ʻo ʻAigupita, i make ʻole ai ka ʻāina i ka wī.”

³⁷ ¶ Ua maikaʻi ia mea i ka maka o Paraʻo, a i ka maka o kāna mau kauā a pau.

³⁸ ʻŌlelo aʻela ʻo Paraʻo i kāna mau kauā, “E loaʻa anei iā kākou kekahi kanaka e like me ia nei, ke kanaka i loko ona ka ʻUhane o ke Akua?”

³⁹ A ʻōlelo akula ʻo Paraʻo iā Iosepa, “No ka mea, ua hōʻike mai ke Akua ia mea a pau iā ʻoe, ʻaʻohe mea ʻē aʻe e like me ʻoe, ka naʻauao a me ke akamai.

⁴⁰ “ʻO ʻoe nō ma luna o koʻu hale, a ma kāu ʻōlelo e hoʻolohe ai koʻu kānaka a pau; akā, ʻo ka noho aliʻi wale nō kaʻu ma luna ou.”

⁴¹ ʻŌlelo akula ʻo Paraʻo iā Iosepa, “E nānā ʻoe, ua hoʻonoho au iā ʻoe ma luna o ka ʻāina o ʻAigupita a pau.”

⁴² Unuhi akula Paraʻo i ke komo ona, mai kona lima aku, a hoʻokomo akula i ka lima o Iosepa, a kāhiko aʻela ʻo ia iā ia i ka lole keʻokeʻo maikaʻi, a hoʻolei akula i ka lei gula ma kona ʻāʻī.

⁴³ Hoʻoholoholo ihola ʻo ia iā ia ma ka lua o ke kaʻa ona, hea maila lākou i mua ona, “E kukuli iho!” Hoʻonoho akula ʻo ia iā ia ma luna o ka ʻāina a pau o ʻAigupita.

⁴⁴ ʻĪ akula ʻo Paraʻo iā Iosepa, “ʻO wau nō ʻo Paraʻo. A i ʻole ʻoe e ʻae aku, ʻaʻole loa e hāpai kekahi kanaka i kona lima, a me kona wāwae, ma ka ʻāina a pau o ʻAigupita.”

⁴⁵ Kapa akula ʻo Paraʻo i ka inoa ʻo Iosepa ʻo Sapena-Panea; a hāʻawi akula ʻo ia iā ʻAsenata, i ke kaikamahine a Potipera a ke kahuna o ʻOna, i wahine nāna. A hele akula ʻo Iosepa a puni ka ʻāina ʻo ʻAigupita.

⁴⁶ ¶ He kanakolu ko Iosepa mau makahiki, i ka wā āna i kū ai i mua o Paraʻo ʻo ke aliʻi o ʻAigupita. A hoʻi akula ʻo Iosepa mai ke alo aku o Paraʻo, a hele akula i ka ʻāina o ʻAigupita a pau.

⁴⁷ A i nā makahiki ʻai ʻehiku, hua maila ka hua o ka honua a nui loa.

⁴⁸ Hōʻiliʻili maila ia i ka ʻai a pau o nā makahiki ʻehiku ma ka ʻāina ʻo ʻAigupita, a waiho ihola ia i ka ʻai ma loko o nā kūlanakauhale, ʻo ka ʻai o nā mahina ʻai e pili ana i ua kūlanakauhale lā; waiho ihola ia ma loko o laila.

⁴⁹ Hōʻiliʻili maila ʻo Iosepa i ka palaoa e like me ke one o ke kai ka nui loa, a oki ihola ka helu no ka hiki ʻole ke helu aku.

⁵⁰ ¶ A hānau ihola kā Iosepa mau keiki kāne ʻelua, ma mua o ka hiki ʻana o nā makahiki wī, na ʻAsenata, ke kaikamahine a Potipera a ke kahuna o ʻOna i hānau nāna.

⁵¹ Kapa akula ʻo Iosepa i ka inoa o ka hiapo, ʻo Manase; no ka mea, “Ua hāʻawi mai ke Akua iaʻu i ka hoʻopoina i koʻu luhi, a me nā mea a pau o ka hale o koʻu makua kāne.”

⁵² A ʻo ka inoa o ka muli mai, kapa akula ia, ʻo ʻEperaima; “No ka mea, ua hoʻopālahalaha mai ke Akua iaʻu, ma ka ʻāina o koʻu pōpilikia.”

⁵³ ¶ Pau aʻela nā makahiki momona ʻehiku i hiki mai ai ma ka ʻāina ʻo ʻAigupita.

⁵⁴ A laila, hiki maila nā makahiki wī ʻehiku, e like me kā Iosepa i ʻōlelo mai ai. He wī nō ma nā ʻāina a pau; akā, he ʻai ma nā ʻāina a pau i ʻAigupita.

⁵⁵ Oki loa ihola ka ʻāina a pau i ʻAigupita, i ka wī, a uē akula nā kānaka iā Paraʻo i ka ʻai. ʻŌlelo akula ʻo Paraʻo i nā kānaka a pau o ʻAigupita, “Ō hele aku i o Iosepa lā; a i kāna ʻōlelo ʻana mai iā ʻoukou, ma laila aku ʻoukou.”

⁵⁶ A ua puni i ka wī nā ʻāina a pau; a wehe aʻela ʻo Iosepa i nā hale papaʻa a pau, a kūʻai akula na nā kānaka o ʻAigupita; a ikaika nui maila ka wī ma ka ʻāina ʻo ʻAigupita.

⁵⁷ A hele maila ko nā ʻāina a pau i ʻAigupita i o Iosepa lā e kūʻai; no ka mea, ua nui loa ka wī ma nā ʻāina a pau.