KA BUKE MUA A MOSE, I KAPA ʻIA KINOHI 40 - Ka Baibala Hemolele

1 Ka paʻa ʻana o nā luna a Paraʻo. 5 Ko lāua mau moe, a me ka hoʻākāka ʻia. 20 Hoʻokō ʻia hoʻi.

MOKUNA XL.

¹ ¶ A ma hope iho o kēia mau mea, hewa ka mea lawe kīʻaha, a me ka mea kahu ʻai o ke aliʻi o ʻAigupita, i ko lāua haku, i ke aliʻi o ʻAigupita.

² Huhū akula Paraʻo i kāna mau luna ʻelua, i ka luna lawe kīʻaha, a me ka luna kahu ʻai.

³ A hahao akula ʻo ia iā lāua i loko o kahi paʻa o ka hale o ka luna koa, ma ka hale paʻahao i kahi o Iosepa i paʻa ai.

⁴ Kauoha akula ka luna koa iā Iosepa no lāua, nāna e mālama mai lāua, a nui nā lā a lāua i paʻa ai.

⁵ Moe ihola lāua a ʻelua i ka moe, i ka pō hoʻokahi ko lāua moe ʻana, ma ka ʻoiaʻiʻo ke ʻano o ko lāua moe, ʻo ka mea lawe kīʻaha, a me ka mea kahu ʻai o ke aliʻi o ʻAigupita, ʻo nā mea i paʻa ma ka hale paʻahao.

⁶ A ao aʻela, hele akula ʻo Iosepa i o lāua lā, nānā akula iā lāua, aia hoʻi, ua kaumaha ihola lāua.

⁷ Nīnau akula ia i ua mau luna lā me ia, āna i mālama ai ma kahi paʻa o ka hale o kona haku, ʻī akula, “No ke aha lā i ʻinoʻino ai nā maka o ʻolua i kēia lā?”

⁸ ʻĪ akula lāua iā ia, “Ua moe māua i ka moe, ʻaʻohe mea nāna e haʻi mai ke ʻano o ia mea.” ʻĪ akula ʻo Iosepa iā lāua, “ʻAʻole anei na ke Akua ke ʻano ʻoiaʻiʻo? E hōʻike mai ʻolua iaʻu.”

⁹ ¶ Haʻi akula ka luna lawe kīʻaha i kāna moe iā Iosepa, ʻī akula iā ia, “ʻO kuʻu moe, aia hoʻi, he kumu waina i mua oʻu.

¹⁰ “ʻEkolu manamana o ke kumu waina; me he mea ʻōpuʻu maila ia, a mōhala maila ka pua; a hua maila ka hua waina pala.

¹¹ “Ma kuʻu lima ke kīʻaha o Paraʻo, a lawe aʻela au i nā hua waina, kōwī ihola iā lākou i loko o ke kīʻaha o Paraʻo, a hāʻawi akula au i ke kīʻaha i ko Paraʻo lima.”

¹² ʻŌlelo akula ʻo Iosepa iā ia, “Eia ke ʻano ʻoiaʻiʻo o ia mea: ʻo nā manamana ʻekolu, ʻekolu ia lā.

¹³ “I nā lā ʻekolu, e hoʻokiʻekiʻe aʻe ʻo Paraʻo i kou poʻo i luna, a e hoʻihoʻi aku iā ʻoe i kou wahi ma mua, a laila, e hāʻawi aku ʻoe i ke kīʻaha o Paraʻo i loko o kona lima, e like me kāu hana ʻana ma mua, i ka wā iā ʻoe ka lawe kīʻaha.

¹⁴ “A pōmaikaʻi ʻoe, ʻeā, e hoʻomanaʻo mai ʻoe iaʻu, a laila, ke noi aku nei au, e hana lokomaikaʻi mai ʻoe iaʻu. E haʻi aku ʻoe iaʻu iā Paraʻo, e lawe ʻia aku hoʻi au i waho o kēia hale.

¹⁵ “No ka mea, ua ʻaihue ʻiʻo ʻia mai au, no loko mai o ka ʻāina o ka poʻe Hebera; i ʻaneʻi hoʻi, ʻaʻole au i hana i mea i hahao ʻia ai e lākou i loko o ka lua.”

¹⁶ ¶ A ʻike maila ka luna kahu ʻai, ua hōʻike mai kēlā i ke ʻano ma ka maikaʻi, ʻōlelo maila ʻo ia iā Iosepa, “He moe nō hoʻi kaʻu, aia hoʻi, he mau hīnaʻi palaoa keʻokeʻo ʻekolu i luna o kuʻu poʻo.

¹⁷ “A i loko o ka hīnaʻi ma luna iho, ʻo nā mea ʻai a pau i kahu ʻia na Paraʻo. ʻAi maila nā manu ia mau mea no loko mai o ka hīnaʻi ma luna o kuʻu poʻo.”

¹⁸ ʻŌlelo akula Iosepa, ʻī akula, “Eia ke ʻano o ia mea. ʻO nā hīna‘i ʻekolu, ʻekolu ia lā.

¹⁹ “I nā lā ʻekolu, e hoʻokiʻekiʻe aku ʻo Paraʻo i kou poʻo mai ou aku, a e kāʻawe aku hoʻi iā ʻoe i luna o ka lāʻau; a e ʻai mai nā manu i kou ʻiʻo.”

²⁰ ¶ A i ke kolu o ka lā, i ka lā o Paraʻo i hānau ai, hana ihola ia i ka ʻahaʻaina na nā kauā āna a pau; hoʻokiʻekiʻe aʻela ia i ke poʻo o ka luna lawe kīʻaha a me ka luna kahu ʻai, ma waena o nā kauā āna.

²¹ Hoʻihoʻi akula ia i ka luna lawe kīʻaha i kona lawe kīʻaha ʻana; a hāʻawi akula ia i ke kīʻaha i ko Paraʻo lima.

²² Kau akula ia i ka luna kahu ʻai i luna, e like me kā Iosepa haʻi ʻana mai iā lāua.

²³ ʻAʻole hoʻi i hoʻomanaʻo mai ka luna lawe kīʻaha iā Iosepa; akā, hoʻopoina ihola iā ia.