KA BUKE MUA A MOSE, I KAPA ʻIA KINOHI 4 - Ka Baibala Hemolele

1 No Kaina a me ʻAbela. 8 Ka pepehi kanaka mua. 11 Ka hoʻohewa ʻia ʻo Kaina. 17 Ke kūlanakauhale mua ʻo ʻEnoka. 18 Kūʻauhau no Kaina. 19 Lameka a me kāna mau wāhine. 25 Hānau ʻia ʻo Seta a me ʻEnosa.

MOKUNA IV.

¹ ¶ A ʻike akula ʻo ʻAdamu i kāna wahine iā ʻEva; hāpai aʻela ʻo ia, a hānau maila iā Kaina, ʻī maila, “Ua loaʻa nō iaʻu he kanaka no Iēhova mai.”

² Hānau hou ihola ʻo ia i kona kaikaina iā ʻAbela. He kahu hipa ʻo ʻAbela, a he mahi ʻai ʻo Kaina.

³ Ma hope iho o nā lā, lawe akula ʻo Kaina i kekahi hua o ka honua i mōhai na Iēhova.

⁴ Lawe akula hoʻi ʻo ʻAbela i kekahi o nā hānau mua o kāna poʻe hipa, i nā mea momona hoʻi. A maliu maila ʻo Iēhova iā ʻAbela a me kāna mōhai;

⁵ akā, ʻaʻole ia i maliu mai iā Kaina a me kāna mōhai. Huhū loa ihola ʻo Kaina, a kūlou ihola kona maka i lalo.

⁶ ʻĪ maila ʻo Iēhova iā Kaina, “He aha kāu i huhū ai? No ke aha hoʻi i kūlou iho ai kou maka i lalo?

⁷ “A i hana pono ʻoe, ʻaʻole anei ʻoe e maliu ʻia aku? A i ʻole ʻoe e hana i ka pono, ke waiho la ka mōhai hala ma ka puka. A iā ʻoe nō ko ia lā makemake, a e aliʻi iho ʻoe ma luna ona.”

⁸ Kamaʻilio aʻela ʻo Kaina me kona kaikaina, me ʻAbela; a iā lāua ma ka waena, kū aʻela ʻo Kaina me ke kūʻē i kona kaikaina iā ʻAbela, pepehi ihola iā ia a make.

⁹ ¶ ʻŌlelo maila ʻo Iēhova iā Kaina, “ʻAuhea lā ʻo ʻAbela ʻo kou kaikaina?” ʻĪ akula ʻo ia, “ʻAʻole au i ʻike; ʻo wau anei ke kahu o kuʻu kaikaina?”

¹⁰ ʻĪ maila kēlā, “He aha kāu i hana iho nei? Ke hea mai nei ka leo o ke koko o kou kaikaina iaʻu mai ka lepo mai.

¹¹ “Ma kēia hope aku, e hoʻohewa ʻia aku ai ʻoe mai ka honua aʻe, i hāmama aʻe kona waha e ale i ke koko o kou kaikaina, na kou lima aku.

¹² “I kou mahi ʻana i ka honua, ʻaʻole ia e hua mai ma kēia hope i kona momona; a e lilo hoʻi ʻoe i kanaka ʻaeʻa a me ke kuewa wale ma luna o ka honua.”

¹³ ʻĪ akula ʻo Kaina iā Iēhova, “He nui loa kuʻu hewa; ʻaʻole paha ia e hiki ke kala ʻia?

¹⁴ “Aia hoʻi, ua kipaku aku ʻoe iaʻu i kēia lā mai ke alo aku o ka honua nei; a ua hoʻokaʻawale ʻia au mai kou alo aku; a e lilo ana au i kanaka ʻaeʻa me ke kuewa wale ma luna o ka honua; a i loaʻa au i kekahi, e pepehi mai ia iaʻu a make.”

¹⁵ ʻĪ maila ʻo Iēhova iā ia, “No laila, ʻo ka mea nāna e pepehi iā Kaina, e pāhiku ka hoʻopaʻi ʻana i kona hewa.” A kau ihola ʻo Iēhova i hōʻailona ma luna o Kaina, o loaʻa ia i kekahi nāna ia e pepehi aku a make.

¹⁶ ¶ Hele akula ʻo Kaina mai ke alo aku o Iēhova, a noho ihola ma ka ʻāina ʻo Noda, ma ka hikina o ʻEdena.

¹⁷ ʻIke akula ʻo Kaina i kāna wahine; hāpai aʻela ʻo ia, a hānau maila iā ʻEnoka; kūkulu ihola ʻo ia i kūlanakauhale, a kapa ihola i ka inoa o ua kūlanakauhale lā, ma muli o ka inoa o kāna keiki, ʻo ʻEnoka.

¹⁸ Na ʻEnoka hoʻi i hānau mai ʻo ʻIrada; na ʻIrada hoʻi ʻo Mehuiaʻela; na Mehuiaʻela ʻo Metusaʻela; na Metusaʻela ʻo Lameka.

¹⁹ Lawe aʻela ʻo Lameka i nā wāhine ʻelua nāna; ʻo ʻAda ka inoa o kekahi, a ʻo Zila ka inoa o kekahi.

²⁰ Na ʻAda i hānau mai ʻo Iabala; ʻo ka maka mua ia o ka poʻe noho halelewa, a ʻo ka hānai holoholona.

²¹ A ʻo Iubala ka inoa o kona kaikaina; ʻo ka maka mua ia o ka poʻe a pau i hoʻokani i ka lira a me ka ʻohe.

²² A ʻo Zila, hānau mai nō hoʻi nāna ʻo Tubala-Kaina, ʻo ia ke kumu a nā paʻahana a pau e kuʻi ana i ke keleawe a me ka hao; a ʻo Naʻama ke kaikuahine o Tubala-Kaina.

²³ ʻĪ akula ʻo Lameka i nā wāhine āna, iā ʻAda, lāua ʻo Zila, “E hoʻolohe mai ʻolua i koʻu leo; E nā wāhine a Lameka, E hāliu mai i kaʻu ʻōlelo; No ka mea, ua pepehi ihola au i ke kanaka no ka hōʻeha ʻana mai iaʻu; I ke kanaka ʻōpiopio no ka paopao ʻana mai iaʻu;

²⁴ “Inā paha e pāhiku ka hoʻopaʻi ʻana no Kaina, He ʻoiaʻiʻo nō, e pākanahiku me kumamāhiku hoʻi ia no Lameka.”

²⁵ ¶ ʻIke hou ihola ʻo ʻAdamu i kāna wahine; a hānau maila ia he keiki kāne, a kapa akula i kona inoa ʻo Seta; no ka mea, ua hāʻawi maila ke Akua i ka hua hou naʻu, wahi āna, i pani hakahaka no ʻAbela i pepehi ʻia e Kaina.

²⁶ Na Seta hoʻi i hānau kekahi keiki kāne; a kapa iho ia i kona inoa ʻo ʻEnosa; ia manawa ka hoʻomaka ʻana o nā kānaka e kāhea aku i ka inoa ʻo Iēhova.