KA BUKE MUA A MOSE, I KAPA ʻIA KINOHI 39 - Ka Baibala Hemolele

1 Lilo Iosepa i luna o ko Potipara hale. 7 Hōʻole ʻo ia i ka hoʻowalewale ʻana. 13 Hoʻohewa wale ʻia. 20 A hahao ʻia hoʻi i ka hale paʻahao.

MOKUNA XXXIX.

¹ ¶ Ua lawe ʻia aku la ʻo Iosepa i lalo i ʻAigupita; kūʻai ʻia akula ʻo ia no Potipara, he luna na Paraʻo, he luna o ka poʻe koa, a he kanaka no ʻAigupita, mai nā lima aku o kā ʻIsemaʻela, nāna ia i lawe aku i lalo.

² Me Iosepa nō ʻo Iēhova, he kanaka ia i hoʻopōmaikaʻi ʻia, aia nō ia ma ka hale o kona haku, he ʻAigupita.

³ ʻIke aʻela kona haku, aia nō ʻo Iēhova me Iosepa, a na Iēhova nō i pono ai ka hana a pau a kona lima.

⁴ A loaʻa iā Iosepa ka lokomaikaʻi ʻia i mua ona, a hoʻokauā aku ia nāna, a hoʻolilo akula ʻo ia iā ia i luna no kona ʻōhua, a no kona waiwai a pau, a waiho akula ia i kāna mea a pau i kona lima.

⁵ Eia hoʻi kekahi, mai ka wā mai o kona hoʻolilo ʻana iā ia i luna no kona ʻōhua, a ma luna o kona mea a pau, hoʻopōmaikaʻi mai ke Akua i ko ka hale o ua kanaka ʻAigupita nei, no Iosepa; a na Iēhova nō ka pōmaikaʻi o nā mea a pau ona, ma ka hale, a ma ke kula.

⁶ A waiho ihola ʻo ia i kona mea a pau i nā lima o Iosepa, ʻaʻole ia i ʻike aku i kekahi mea nona, ʻo ka ʻai āna i ʻai ai wale nō. Ua maikaʻi ke kino o Iosepa, he maikaʻi nō hoʻi ka maka.

⁷ ¶ A ma hope iho o kēia mau mea, ʻike maila nā maka o ka wahine a kona haku iā Iosepa, ʻī maila ia, “E moe kāua.”

⁸ Hōʻole akula ia, ʻī akula i ka wahine a kona haku, “Aia hoʻi, ʻaʻole ʻike kuʻu haku i nā mea iaʻu ma kēia hale, ua waiho mai nei koʻu haku i kāna mea a pau i kuʻu lima.

⁹ “ʻAʻohe mea nui ʻē aʻe o loko o kēia hale, ʻo wau wale nō; ʻaʻole kēlā i paʻa aku i kekahi mea iaʻu, ʻo ʻoe wale nō; no ka mea, ʻo kāna wahine nō ʻoe. Pehea lā wau e hana ai i kēia hewa nui, a hana ʻino aku i ke Akua?”

¹⁰ Koi maila ʻo ia iā Iosepa i kēlā lā a i kēia lā, ʻaʻole loa ia i hoʻolohe iki aku iā ia, e moe me ia, a e noho me ia.

¹¹ Ia manawa iho, komo aʻela ʻo Iosepa i loko o ka hale, e hana i kāna hana, ʻaʻohe kanaka o ka hale i loko.

¹² ʻApo maila kēlā iā ia ma ke kapa ona, ʻī maila, “E moe kāua.” Haʻalele ihola ia i kona kapa ma ka lima ona, holo akula a hiki i waho.

¹³ A ʻike akula ua wahine lā, ua haʻalele ia i kona kapa ma kona lima, a ua holo akula i waho,

¹⁴ kāhea akula ua wahine lā i nā kānaka o kona hale, ʻōlelo akula iā lākou, ʻī akula, “E nānā ʻoukou, ua lawe mai nei kēlā i ke kanaka no ka poʻe Hebera i o kākou nei, e hoʻomāʻewaʻewa mai iā kākou. Hele maila ʻo ia i oʻu nei e moe me aʻu, a kāhea akula au me ka leo nui.

¹⁵ “A lohe maila kēlā i kuʻu hoʻokiʻekiʻe ʻana i kuʻu leo i luna, a i kuʻu hea ʻana aku, haʻalele iho nei ʻo ia i ke kapa ona iaʻu, holo akula a hiki i waho.”

¹⁶ Mālama ihola ua wahine lā i kona kapa, a hoʻi maila kona haku i ka hale.

¹⁷ ʻŌlelo akula ua wahine lā iā ia i kēia mau ʻōlelo, ʻī akula, “ʻO ke kauā Hebera, āu i lawe mai ai i o kākou nei, ua komo mai ia i oʻu nei e hoʻomāʻewaʻewa mai iaʻu.

¹⁸ “A hoʻokiʻekiʻe au i kuʻu leo i luna a kāhea aku au, a laila, haʻalele ihola ia i ke kapa ona iaʻu, a holo akula i waho.”

¹⁹ ¶ A lohe aʻela kona haku i ka ʻōlelo a kāna wahine i ʻōlelo mai ai iā ia, i ka ʻī ʻana mai, “E like me kēia mau ʻōlelo i hana mai ai kāu kauā iaʻu”; nui ihola ka huhū ona.

²⁰ Lālau maila ka haku o Iosepa iā ia, hahao akula iā ia i loko o ka hale paʻahao, i kahi i paʻa ai ka poʻe paʻa o ke aliʻi, a paʻa nō ia ma laila ma ka hale paʻahao.

²¹ Me Iosepa nō ʻo Iēhova, aloha nui maila iā ia, a hāʻawi maila iā ia i ka pono i mua o nā maka o ka mea nāna i mālama ka hale paʻahao.

²² Waiho aʻela ka mea nāna i mālama ka hale paʻahao i ka poʻe paʻa a pau o loko o ka hale paʻahao i ka lima o Iosepa, a ʻo nā mea a pau i hana ʻia ma laila, nāna nō ia i hana.

²³ ʻAʻole hoʻi i nānā aku ka luna o ka hale paʻahao i kekahi mea ma lalo iho o kona lima; no ka mea, aia nō ʻo Iēhova me ia, a hoʻopōmaikaʻi maila ʻo Iēhova i ka hana a pau āna i hana ai.