KA BUKE MUA A MOSE, I KAPA ʻIA KINOHI 38 - Ka Baibala Hemolele

1 Nā keiki a Iuda. 6 Ka make ʻana o ʻEra lāua ʻo ʻOnana. 12 Hoʻopuni ʻia ʻo Iuda a moekolohe me Tamara. 27 Hānau ʻia nā māhoe na Iuda.

MOKUNA XXXVIII.

¹ ¶ Ia manawa nō, iho akula ʻo Iuda mai kona poʻe hoahānau aku, a kipa akula i kekahi kanaka no ʻAdulama, ʻo Hira kona inoa.

² ʻIke akula ʻo Iuda i ke kaikamahine a kekahi mamo a Kanaʻana i laila, ʻo Sua kona inoa, lawe aʻela ʻo ia iā ia, a komo akula i ona lā.

³ Hāpai ihola ʻo ia, a hānau maila he keiki kāne; a kapa ihola ia i kona inoa, ʻo ʻEra.

⁴ Hāpai hou ihola ʻo ia a hānau maila he keiki kāne; a kapa ihola ia i kona inoa, ʻo ʻOnana.

⁵ Hāpai hou ihola ʻo ia a hānau maila he keiki kāne; a kapa ihola ia i kona inoa, ʻo Sela; ma Keziba ʻo ia i kona wā i hānau ai.

⁶ ¶ Lawe aʻela ʻo Iuda i wahine na ʻEra, na kāna hiapo, ʻo Tamara kona inoa.

⁷ A ua hewa ʻo ʻEra, ʻo ka hiapo a Iuda i mua o Iēhova; a pepehi ihola ʻo Iēhova iā ia.

⁸ ʻĪ akula ʻo Iuda iā ʻOnana, “E komo aku ʻoe i ka wahine a kou kaikuaʻana, e mare me ia, a e hoʻokū aʻe i keiki na kou kaikuaʻana.”

⁹ ʻIke ihola ʻo ʻOnana, ʻaʻole nāna ke keiki, a laila, i ka manawa āna i komo aku ai i ka wahine a kona kaikuaʻana, kikī ihola ʻo ia i ka mea ma ka honua, o hāʻawi auaneʻi ia i hua na kona kaikuaʻana.

¹⁰ A ʻo ka mea āna i hana ai, ua hewa ia i mua o Iēhova; a nāna hoʻi ia i pepehi.

¹¹ A laila, ʻī akula ʻo Iuda iā Tamara, “E noho kāne ʻole ʻoe ma ka hale o kou makua kāne, a ka manawa e nui ai kuʻu keiki kāne ʻo Sela”; no ka mea, ʻī ihola ia, “O make paha hoʻi ʻo ia, e like me kona mau kaikuaʻana.” Hele akula ʻo Tamara a noho ihola ma ka hale o kona makua kāne.

¹² ¶ A nui nā lā i hala, make ihola ke kaikamahine a Sua, ʻo kā Iuda wahine; a pau ko Iuda kanikau ʻana, piʻi akula ia i Timenata i kona poʻe ʻako hipa, ʻo ia a me kona makamaka ʻo Hira no ʻAdulama.

¹³ Haʻi akula kekahi iā Tamara, “ʻEā, e piʻi ana kou makuahūnōwai kāne i Timenata e ʻako i kāna hipa.”

¹⁴ Wehe aʻela ia i kona mau kapa makena, a uhi ihola iā ia iho i ka pale maka, ʻaʻahu ihola iā ia iho, a noho ihola ma ka puka pā o ʻEnaima ma kapa alanui e hele ai i Timenata; no ka mea, ʻike akula ia, ua nui aʻela ʻo Sela, ʻaʻole hoʻi i hāʻawi ʻia ʻo ia i wahine nāna.

¹⁵ A ʻike akula ʻo Iuda iā ia, manaʻo ihola ia he wahine hoʻokamakama kēlā; no ka mea, ua pale ʻia kona maka.

¹⁶ Kipa aʻela ia i ona lā ma kapa alanui, ʻī akula, “ʻEā, ke noi aku nei au iā ʻoe, e ʻae mai iaʻu e komo aku i ou lā”; (no ka mea, ʻaʻole ia i ʻike, ʻo kāna hūnōna wahine ia.) Nīnau maila kēlā, “He aha kāu e hāʻawi mai ai iaʻu, i mea e komo mai ai ʻoe i oʻu nei?”

¹⁷ ʻĪ akula ia, “E hoʻouka aku au i wahi kao keiki no ka poʻe holoholona mai.” ʻĪ maila kēlā, “ʻAʻole anei ʻoe e hāʻawi mai i hōʻailona, a hoʻouka mai ʻoe ia mea?”

¹⁸ ʻĪ akula ʻo ia, “He aha ka hōʻailona aʻu e hāʻawi aku ai iā ʻoe?” ʻĪ maila kēlā, “ʻO kou apo lima, me kou kaula hoʻolewa, a me ke koʻokoʻo ma loko o kou lima.” Hāʻawi akula ʻo ia iā ia, a komo akula i ona lā, a hāpai ihola kēlā ma ona lā.

¹⁹ Kū aʻela ia, hele akula, a waiho ihola i kona pale maka, a ʻaʻahu hou ihola i kona mau kapa no ka noho wahine kāne make ʻana.

²⁰ ¶ Hoʻouka akula ʻo Iuda i ke kao keiki ma ka lima o kona makamaka no ʻAdulama, i loaʻa mai ai kāna hōʻoiaʻiʻo mai ka lima mai o ka wahine; ʻaʻole naʻe i loaʻa ua wahine lā iā ia.

²¹ Nīnau akula ia i nā kānaka o ia wahi, ʻī akula, “ʻAuhea lā ka wahine hoʻokamakama i noho ma ʻEnaima, ma kapa alanui?” ʻĪ maila lākou, “ʻAʻohe wahine hoʻokamakama i ʻaneʻi.”

²² Hoʻi hou akula ia i o Iuda lā, ʻī akula, “ʻAʻohe i loaʻa ia iaʻu; a ua ʻī mai hoʻi nā kānaka o ia wahi, ʻaʻole wahine hoʻokamakama i ʻaneʻi.”

²³ ʻĪ akula ʻo Iuda, “E aho nō e lilo ia mau mea nona, o hoʻohilahila ʻia kāua; aia hoʻi, hoʻouka aku nō au i kēia kao keiki, ʻaʻole kā i loaʻa ka wahine iā ʻoe.”

²⁴ ¶ A hala nā malama ʻekolu paha, haʻi maila kekahi iā Iuda, i ka ʻī ʻana, “Ua moekolohe iho nei kāu hūnōna wahine ʻo Tamara; aia hoʻi, ua hāpai ʻo ia ma ka moekolohe.” ʻĪ akula ʻo Iuda, “E kaʻi ʻia mai ʻo ia, i puhi ʻia ai ia i ke ahi.”

²⁵ A kaʻi ʻia aku ʻo ia, hoʻouna maila ia, ʻī maila i kona makuahūnōwai kāne, “Na ke kanaka nāna kēia mau mea āu i hāpai ai.” ʻĪ maila hoʻi ʻo ia, “E nānā ʻoe, ʻeā, i ʻike i ka mea nāna kēia mau mea, ʻo ke apo lima, me ke kaula hoʻolewa, a me ke koʻokoʻo.”

²⁶ A ʻike ihola ʻo Iuda, ʻī akula, “Ua ʻoi aku kona pono i koʻu; no ka mea, ʻaʻole au i hāʻawi aku iā ia na kuʻu keiki na Sela.” ʻAʻole hoʻi ʻo Iuda i ʻike hou iā ia.

²⁷ ¶ A i ka manawa o kona haʻakōhi ʻana, aia hoʻi, he mau māhoe ma loko o kona ʻōpū.

²⁸ A i ka hānau ʻana, puka maila ka lima o kekahi; lālau akula ka pale keiki i ua lima lā a nākiʻi ihola i ke kaula ʻulaʻula i laila, ʻī maila, “Eia ka hānau mua.”

²⁹ A i ka huki hou ʻana o kona lima i loko, aia hoʻi, puka ʻē maila kona hoahānau; ʻī akula ke pale keiki, “He aha kāu i pohā wale mai? Ma luna iho ou kēia nahae”; no laila, kapa ihola ia i kona inoa ʻo Pereza.

³⁰ Ma hope iho puka maila ke kaikaina, iā ia ke kaula ʻulaʻula ma kona lima; a ua kapa ʻia kona inoa ʻo Zara.