KA BUKE MUA A MOSE, I KAPA ʻIA KINOHI 35 - Ka Baibala Hemolele

1 Hoʻouna ke Akua iā Iakoba ma Betela. 2 Hoʻokaʻawle aku ʻo ia i nā akua kiʻi o kona hale. 6 Kāna hana ʻana i kuahu ma Betela. 9 ʻIkea ke Akua e ia ma laila. 16 Make ʻo Rāhela i ka hānau ʻia ʻo Beniamina. 22 Ko Reubena moe ʻana me Bileha. 28 Ko ʻIsaʻaka make ʻana.

MOKUNA XXXV.

¹ ¶ ʻŌlelo maila ke Akua iā Iakoba, “E kū aʻe ʻoe, e piʻi aku i Betela, i laila e noho ai; i laila ʻoe e hana ai i kuahu no ke Akua i ʻikea e ʻoe i kou wā i mahuka ai mai ka maka o kou kaikuaʻana ʻo ʻEsau.”

² A laila, ʻī akula ʻo Iakoba i ko ka hale ona, a i ka poʻe a pau me ia, “E haʻalele ʻoukou i nā akua ʻē i waena o ʻoukou, e huikala iā ʻoukou iho, a e ʻaʻahu iho i nā kapa hou.

³ “A e kū aʻe kākou, e piʻi aku i Betela; ma laila au e hana ai i kuahu no ke Akua nāna au i maliu mai i ka lā o koʻu pōpilikia, a i hele pū me aʻu i kuʻu ala i hele ai.”

⁴ Hāʻawi maila lākou iā Iakoba i nā akua ʻē ma ko lākou lima, a me nā apo ma nā pepeiao o lākou; a hūnā ihola ʻo Iakoba ia mau mea ma lalo o ka lāʻau ʻoka aia ma Sekema.

⁵ ¶ Hele akula lākou; a kau maila ka weliweli mai ke Akua mai ma luna o nā kūlanakauhale ma kēlā ʻaoʻao a kēia ʻaoʻao o lākou, a alualu ʻole maila lākou i nā keiki o Iakoba.

⁶ A hiki akula ʻo Iakoba i Luza, ʻo ia hoʻi ʻo Betela, ma ka ʻāina ʻo Kanaʻana, ʻo ia a me nā kānaka a pau me ia.

⁷ Hana ihola ia i kuahu ma laila, a kapa ihola ia wahi ʻo ʻEle Betela; no ka mea, i laila ke Akua i ʻikea ai e ia i kona wā i mahuka ai mai ka maka aku o kona kaikuaʻana.

⁸ Make ihola ʻo Debora ʻo ke kahu no Rebeka, a ua kanu ʻia ʻo ia ma lalo o Betela ma lalo o kekahi lāʻau ʻoka; a ua kapa ʻia ka inoa o ia wahi, ʻo ʻAlona Bakuta.

⁹ ¶ ʻIkea hou ke Akua e Iakoba, i kona hoʻi ʻana mai, no loko mai o Padana ʻArama, a hoʻomaikaʻi maila iā ia.

¹⁰ ʻĪ maila ke Akua iā ia, “ʻO Iakoba kou inoa; ʻAʻole e hea hou ʻia kou inoa ʻo Iakoba, Akā, ʻo ʻIseraʻela kou inoa.” A kapa ihola ʻo ia i kona inoa ʻo ʻIseraʻela.

¹¹ ʻĪ maila ke Akua iā ia, “ʻO wau nō ke Akua Mana; A e hoʻohua aʻe ʻoe, a e māhuahua; Nāu mai nō kekahi lāhui kanaka, a me nā lāhui kanaka; A e puka mai auaneʻi nā aliʻi mai loko mai o kou pūhaka.

¹² “A ʻo ka ʻāina aʻu i hāʻawi aku ai no ʻAberahama, a no ʻIsaʻaka, E hāʻawi aku hoʻi au nou, A no kāu poʻe mamo ma hope ou kaʻu e hāʻawi aku ai i ka ʻāina.”

¹³ A piʻi akula ke Akua i luna mai ona aku lā, ma kahi āna i kamaʻilio pū ai me ia.

¹⁴ Hoʻokū aʻela ʻo Iakoba i ʻeho ma kahi āna i kamaʻilio mai ai me ia, he ʻeho pōhaku; a ninini ihola ia i ka mōhai inu ma luna; a ninini ihola hoʻi ʻo ia i ka ʻaila ma luna.

¹⁵ Kapa ihola ʻo Iakoba i ka ʻāina o kahi a ke Akua i ʻōlelo mai ai me ia, ʻo Betela.

¹⁶ ¶ Hele akula lākou mai Betela aku, a ua kokoke e hiki i ʻEperata, haʻakōhi ihola ʻo Rāhela, a puʻua iho i ka hānau keiki ʻana.

¹⁷ A i kona puʻua ʻana, ʻī akula ka pale keiki iā ia, “Mai makaʻu ʻoe, e loaʻa auaneʻi iā ʻoe kēia keiki nō hoʻi.”

¹⁸ A i ka wā e kāʻili ana kona ea; (no ka mea, make nō ʻo ia), kapa ihola ia i kona inoa, Bene-ʻOni; akā, kapa akula kona makua kāne iā ia, ʻo Beniamina.

¹⁹ Make ihola ʻo Rāhela, a kanu ʻia ʻo ia ma ke alanui e hele ai i ʻEperata, ʻo ia ʻo Betelehema.

²⁰ Hoʻokū aʻela ʻo ʻIseraʻela, i pōhaku ʻeho ma luna o kona hē, ʻo ia ka ʻeho no ka hē o Rāhela, a hiki i kēia manawa.

²¹ Hele akula ʻo ʻIseraʻela, a kūkulu ihola i kona halelewa ma ʻō aku o ka hale kiaʻi ʻo ʻEdara.

²² A i ka noho ʻana o ʻIseraʻela ma ia ʻāina, hele akula ʻo Reubena, a moe pū ihola me Bileha me ka haiā wahine a kona makua kāne; a lohe aʻela ʻo ʻIseraʻela. ʻO nā keiki kāne a Iakoba he ʻumikumamālua:

²³ ʻO nā keiki kāne a Lea: ʻo Reubena ka makahiapo a Iakoba, ʻo Simeona, ʻo Levi, ʻo Iuda, ʻo ʻIsakara, a ʻo Zebuluna.

²⁴ ʻO nā keiki kāne a Rāhela: ʻo Iosepa, a ʻo Beniamina.

²⁵ ʻO nā keiki kāne a Bileha, a ke kauā wahine a Rāhela: ʻo Dana, a ʻo Napetali.

²⁶ ʻO nā keiki kāne a Zilepa, a ke kauā wahine a Lea: ʻo Gada a ʻo ʻAsera. ʻO lākou nā keiki kāne a Iakoba, i hānau nāna ma Padana ʻArama.

²⁷ Hele akula ʻo Iakoba i kona makua kāne iā ʻIsaʻaka ma Mamere, ma ke kūlanakauhale ʻo ʻAreba, (ʻo ia ʻo Heberona,) kahi i noho ai ʻo ʻAberahama a me ʻIsaʻaka.

²⁸ ¶ A ʻo nā lā o ʻIsaʻaka, hoʻokahi haneri makahiki a me kanawalu.

²⁹ Kuʻu akula ʻo ʻIsaʻaka i ka ʻuhane, a make ihola, a ua hui ʻia aku ia me kona poʻe kānaka; ua ʻelemakule ia, a nui loa kona mau lā; na kāna mau keiki kāne na ʻEsau mā lāua ʻo Iakoba ʻo ia i kanu.