KA BUKE MUA A MOSE, I KAPA ʻIA KINOHI 3 - Ka Baibala Hemolele

1 No ka hoʻopunipuni ʻia ʻo ʻEva e ka nahesa. 6 Ka hāʻule ʻana o ke kanaka. 9 Hoʻokolokolo mai ke Akua. 14 Hoʻohewa ʻia ka nahesa. 15 No ka hua i ʻōlelo ʻia. 16 Ka hoʻopaʻi ʻana i kānaka. 21 Ko lāua ʻaʻahu mua. 22 Ua hoʻokuke ʻia ma waho o ʻEdena.

MOKUNA III.

¹ ¶ Ua ʻoi aku ka maʻalea o ka nahesa i ko nā holoholona o ke kula a pau a Iēhova ke Akua i hana ai. ʻĪ maila ia i ka wahine, “He ʻoiaʻiʻo anei, ua pāpā mai ke Akua, ‘ʻAʻole ʻolua e ʻai i ko nā lāʻau a pau o ka mahina ʻai nei’?”

² ʻĪ akula ka wahine i ka nahesa, “E pono nō māua ke ʻai i ka hua o nā lāʻau o ka mahina ʻai nei;

³ akā, ʻo ka hua o ka lāʻau i waenakonu o ke kīhāpai, ua ʻī mai ke Akua, ‘Mai ʻai ʻolua ia mea, ʻaʻole hoʻi e hoʻopā aku, o make ʻolua.’”

⁴ ʻŌlelo maila ka nahesa i ka wahine, “ʻAʻohe ʻoiaʻiʻo e make ʻolua.

⁵ “No ka mea, ua ʻike nō ke Akua, a i ka lā e ʻai ai ʻolua ia mea, e hoʻokaʻakaʻa ʻia auaneʻi ko ʻolua mau maka; a e like ʻolua me ke Akua, i ka ʻike i ka pono a me ka hewa.”

⁶ A ʻike aʻela ka wahine, he ʻono ko ia lāʻau i mea ʻai, a he maikaʻi hoʻi i nā maka, a he lāʻau makemake ʻia i mea hoʻonaʻauao, lālau akula ia i kona hua, ʻai ihola, a hāʻawi akula hoʻi na kāna kāne me ia, a ʻai ihola nō hoʻi ʻo ia.

⁷ A hoʻokaʻakaʻa ʻia aʻela nā maka o lāua a ʻelua, a ʻike ihola lāua, ʻaʻohe o lāua kapa; kui ihola lāua i nā lau fiku a paʻa, i mau pāpalu no lāua.

⁸ ¶ Lohe aʻela lāua i ka leo o Iēhova ke Akua, e holoholo ana ma ka mahina ʻai i ka wā malu o ka lā; peʻe ihola ʻo ʻAdamu me kāna wahine ma waena o nā lāʻau o ua mahina ʻai lā, mai ke alo aku o Iēhova ke Akua.

⁹ Hea maila ʻo Iēhova ke Akua iā ʻAdamu, ʻī maila iā ia, “ʻAuhea ʻoe?”

¹⁰ ʻĪ akula ʻo ia, “I lohe au i kou leo i loko o ka mahina ʻai nei, a makaʻu nō wau; no ka mea, ʻaʻohe oʻu kapa, a peʻe ihola au.”

¹¹ ʻĪ maila kēlā, “Na wai i haʻi mai iā ʻoe, ʻaʻohe ou kapa? Ua ʻai anei ʻoe i ko ka lāʻau aʻu i pāpā aku ai iā ʻoe, mai ʻai ʻoe?”

¹² ʻŌlelo akula ke kanaka, “Na ka wahine āu i hāʻawi mai ai naʻu, nāna nō i hāʻawi mai i ko ka lāʻau, a ʻai ihola au.”

¹³ ʻĪ maila ʻo Iēhova ke Akua i ka wahine, “He aha kēia mea āu i hana ai?” ʻĪ akula ka wahine, “Na ka nahesa wau i hoʻowalewale mai, a ʻai ihola au.”

¹⁴ ʻĪ akula ʻo Iēhova ke Akua i ka nahesa, “No kāu hana ʻana ia mea, E ʻoi aku kou ʻāhewa ʻia i ko nā holoholona laka a pau, A i ko nā holoholona hihiu a pau o ke kula; I lalo kou alo e kolo ai ʻoe, ʻO ka lepo kāu e ʻai ai A pau nā lā o kou ola ʻana.

¹⁵ “E waiho nō au i ka inaina Ma waena o ʻolua a me ka wahine, A ma waena hoʻi o kou hua a me kona hua; Nāna e paopao iho kou poʻo, A nāu hoʻi e pākuʻikuʻi aku kona kuʻekuʻe wāwae.”

¹⁶ ʻĪ maila hoʻi ʻo ia i ka wahine, “E hoʻonui loa aku au I ka ʻeha o kou hāpai ʻana; Me ka ʻeha hoʻi ʻoe e hānau mai ai i nā keiki; A ʻo kou makemake aku aia nō ia i kāu kāne, a ʻo ia hoʻi kou haku.”

¹⁷ ʻĪ maila hoʻi ʻo ia iā ʻAdamu, “No ka mea, ua hoʻolohe ʻoe i ka leo o kāu wahine, a ua ʻai hoʻi i ko ka lāʻau aʻu i pāpā aku ai iā ʻoe, i ka ʻī ʻana, ‘Mai ʻai ʻoe ia mea,’ Ua hoʻohewa ʻia ka ʻāina nou; Me ka luhi ʻoe e ʻai ai i kāna A pau nā lā o kou ola ʻana.

¹⁸ “E hoʻokupu mai nō hoʻi ia i nā kākalaioa a me nā pua kala nāu; A nāu nō e ʻai i nā mea kanu o ka waena.

¹⁹ “Me ka hou o kou maka e ʻai ai ʻoe i ka ʻai A hiki i kou wā e hoʻi hou aku ai i ka lepo; No ka mea, mai laila ʻoe i lawe ʻia mai ai; No ka mea, he lepo nō ʻoe, A e hoʻi hou aku ʻoe i ka lepo.”

²⁰ Kapa akula ʻo ʻAdamu i ka inoa o kāna wahine, ʻo ʻEva; no ka mea, ka makuahine ia o nā kānaka a pau.

²¹ A hana ihola ʻo Iēhova ke Akua i nā kapa ʻili no ʻAdamu a no kāna wahine, a hōʻaʻahu ihola iā lāua.

²² ¶ ʻĪ ihola ʻo Iēhova ke Akua, “Aia hoʻi, ua like ke kanaka me kekahi o kākou, ka ʻike i ka pono a me ka hewa; ʻānō hoʻi, o lālau aku kona lima, a lawe hoʻi i ko ka lāʻau ola, ʻai iho a ola mau loa aku.”

²³ No ia mea, kipaku akula ʻo Iēhova ke Akua iā ia i waho o ke kīhāpai ʻo ʻEdena, e mahi i ka lepo, kahi āna i lawe ʻia mai ai.

²⁴ Pēlā ʻo ia i kipaku ai i ke kanaka; a hoʻonoho ihola ma ka hikina o ka mahina ʻai ʻo ʻEdena i nā kerubima, a me ka pahi wakawaka e kā ana i ʻō i ʻaneʻi i maluhia ai ke ala ma ka lāʻau ola.