KA BUKE MUA A MOSE, I KAPA ʻIA KINOHI 29 - Ka Baibala Hemolele

1 Ko Iakoba hiki ʻana i ka pūnāwai ʻo Harana. 9 Hālāwai me Rāhela. 13 Hoʻokipa ʻia e Labana. 18 Kona hoʻoikaika no Rāhela. 23 Hāʻawi hoʻopunipuni ʻia ʻo Lea. 28 Kona mare iā Rāhela hoʻi. 31 Nā keiki a Lea.

MOKUNA XXIX.

¹ ¶ A laila, hele akula ʻo Iakoba i kona hele ʻana, a hiki akula i ka ʻāina o nā kānaka o ka Hikina.

² Nānā akula ia, aia hoʻi, he luawai ma ke kula, a me nā ʻohana hipa ʻekolu e moe ana i laila; no ka mea, ua hoʻohāinu ʻia nā ʻohana holoholona i ka wai o ua luawai lā; a aia ma luna o ka waha o ka luawai he pōhaku nui.

³ I laila i hoʻākoakoa ʻia ai nā ʻohana holoholona a pau; ʻolokaʻa aʻela lākou i ka pōhaku mai ka waha aʻe o ka luawai, a hoʻohāinu ihola i nā hipa; a kau hou ihola i ka pōhaku ma luna o ka waha o ka luawai, ma kona wahi.

⁴ ʻĪ akula ʻo Iakoba iā lākou, “E kuʻu mau hoahānau, no hea ʻoukou?” ʻĪ maila lākou, “No Harana mākou.”

⁵ ʻĪ akula ia iā lākou, “Ua ʻike anei ʻoukou iā Labana, ka moʻopuna a Nahora?” ʻĪ maila lākou, “Ua ʻike nō mākou.”

⁶ ʻĪ akula ia iā lākou, “E ola ana anei ʻo ia?” ʻĪ maila lākou, “E ola ana nō, aia hoʻi, ke hele maila ʻo Rāhela, ʻo kāna kaikamahine me ka pūʻā hipa.”

⁷ ʻĪ akula ia, “Aia hoʻi, he lā ʻokoʻa kēia; ʻaʻole i hiki ka manawa e hōʻuluʻulu ai i nā bipi; e hoʻohāinu ʻoukou i nā hipa, a hele e hānai.”

⁸ ʻĪ maila lākou, “ʻAʻole mākou e hiki, a pau nā ʻohana hipa i ka hōʻuluʻulu ʻia, a ʻolokaʻa aʻe lākou i ka pōhaku, mai ka waha mai o ka luawai; a laila mākou e hoʻohāinu i nā hipa.”

⁹ Iā ia i ʻōlelo ai me lākou, hiki maila ʻo Rāhela me nā hipa a kona makua kāne; no ka mea, nāna lākou i mālama.

¹⁰ A ʻike akula ʻo Iakoba iā Rāhela, ke kaikamahine a Labana, ʻo ke kaikunāne o kona makuahine, a me ka poʻe hipa a Labana, ʻo ke kaikunāne o kona makuahine, neʻeneʻe akula ʻo Iakoba, ʻolokaʻa aʻela ia i ka pōhaku mai ka waha aʻe o ka luawai, a hoʻohāinu ihola i ka poʻe hipa a Labana, ʻo ke kaikunāne o kona makuahine.

¹¹ Honi akula ʻo Iakoba iā Rāhela, hoʻokiʻekiʻe aʻela ia i kona leo, a uē ihola.

¹² Haʻi akula ʻo Iakoba iā Rāhela, he hoahānau ia no kona makua kāne, a he keiki na Rebeka; holo akula kēlā, a haʻi akula i kona makua kāne.

¹³ ¶ A lohe aʻela ʻo Labana i ka ʻōlelo no Iakoba no ke keiki kāne a kona kaikuahine, holo maila ia e hālāwai me ia, ʻapo maila iā ia, honi aʻela, a kaʻi akula iā ia i kona hale. Haʻi akula ʻo ia iā Labana ia mau mea a pau.

¹⁴ ʻŌlelo maila ʻo Labana iā ia, “He ʻoiaʻiʻo, ʻo ʻoe nō kuʻu iwi, a me kuʻu ʻiʻo.” A noho pū ihola ʻo ia me ia, hoʻokahi malama.

¹⁵ ʻŌlelo maila ʻo Labana iā Iakoba, “E hoʻokauā wale anei ʻoe naʻu, no kou pili hoahānau ʻana iaʻu? E haʻi mai ʻoe iaʻu i kāu uku.”

¹⁶ ʻElua mau kaikamāhine a Labana, ʻo Lea ka inoa o ka mua, a ʻo Rāhela ka inoa o ka muli iho.

¹⁷ He maka wai ko Lea; akā, ua maikaʻi ʻo Rāhela ke nānā aku, a ua maikaʻi kona helehelena.

¹⁸ Aloha akula ʻo Iakoba iā Rāhela; ʻī akula ia, “E hoʻoikaika aku nō au i kāu hana i nā makahiki ʻehiku no Rāhela, no kāu kaikamahine muli iho.”

¹⁹ ʻĪ maila ʻo Labana, “E aho noʻu ke hāʻawi aku iā ia nāu, ʻaʻole na ke kanaka ʻē aʻe; e noho pū ʻoe me aʻu.”

²⁰ Hoʻoikaika akula ʻo Iakoba i nā makahiki ʻehiku no Rāhela; a he mau lā ʻuʻuku wale nō ia i kona manaʻo, no kona aloha iā ia.

²¹ ¶ ʻĪ akula ʻo Iakoba iā Labana, “E hāʻawi mai ʻoe i kaʻu wahine, i komo ai au i loko i ona lā; no ka mea, ua hala aʻe nei koʻu mau lā.”

²² Hōʻuluʻulu aʻela ʻo Labana i nā kānaka a pau o ia wahi, a hana ihola i ka ʻahaʻaina.

²³ A ahiahi ihola, lālau akula ia i kāna kaikamahine iā Lea, a lawe maila iā ia i o Iakoba lā, a komo akula ia i ona lā.

²⁴ Hāʻawi akula ʻo Labana iā Zilepa i kona kaikamahine i kauā wahine na kāna kaikamahine na Lea.

²⁵ A ao aʻela, aia hoʻi, ʻo Lea kā ia; ʻī akula ʻo Iakoba iā Labana, “He aha kēia mea āu i hana mai ai iaʻu? ʻAʻole anei ʻo Rāhela kaʻu i hoʻoikaika aku ai nāu? No ke aha hoʻi ʻoe i hoʻopunipuni mai ai iaʻu?”

²⁶ ʻĪ maila ʻo Labana, “ʻAʻole pēlā e pono ke hana ma ko mākou ʻāina, ke hāʻawi ʻē aku i ka hānau hope ma mua o ka hānau mua.

²⁷ “E hoʻopau ʻoe i ko ia nei hebedoma, a laila e hāʻawi hoʻi mākou iā Rāhela nāu, no ka hoʻoikaika ʻana āu e hoʻoikaika ai me aʻu, i nā makahiki hou aku i ʻehiku.”

²⁸ Pēlā nō ʻo Iakoba i hana aku ai, a hoʻopau aʻela i ko ia lā hebedoma; a hāʻawi akula hoʻi ʻo ia iā Rāhela i kāna kaikamahine i wahine nāna.

²⁹ Hāʻawi maila ʻo Labana iā Bileha i kona kaikamahine, i kauā wahine na Rāhela, na kāna kaikamahine.

³⁰ Komo akula hoʻi ʻo ia i o Rāhela lā, a ʻoi akula kona aloha iā Rāhela lā ma mua o kona aloha iā Lea; a hoʻoikaika akula ia me Labana i nā makahiki hou aku i ʻehiku.

³¹ A ʻike ihola ʻo Iēhova, ua hoʻowahāwahā ʻia ʻo Lea, hoʻohua ihola ia i kona ʻōpū; akā, ua pā ʻo Rāhela.

³² Hāpai ihola ʻo Lea, a hānau maila he keiki kāne, a kapa ihola ia i kona inoa ʻo Reubena; no ka mea, ʻī maila ia, “He ʻoiaʻiʻo, ua nānā mai ʻo Iēhova i kuʻu pōpilikia; ʻānō hoʻi, e aloha mai auaneʻi kaʻu kāne iaʻu.”

³³ Hāpai hou ihola ia, a hānau maila he keiki kāne; ʻī maila, “No ka mea, ua lohe ʻo Iēhova i kuʻu hoʻowahāwahā ʻia; no laila, ua hāʻawi mai hoʻi ʻo ia i kēia keiki kāne.” Kapa ihola ia i kona inoa, ʻo Simeona.

³⁴ Hāpai hou ihola ia, a hānau maila, he keiki kāne; ʻī maila, “I kēia manawa nō, e hoʻopili ʻia mai auaneʻi kaʻu kāne iaʻu; no ka mea, ua hānau nō wau i nā keiki kāne ʻekolu nāna.” No ia mea i kapa ʻia ai kona inoa, ʻo Levi.

³⁵ Hāpai hou ihola ia, a hānau maila he keiki kāne; ʻī maila ia, “ʻĀnō nō, e hoʻoleʻa aku wau iā Iēhova.” No laila, kapa ihola ia i kona inoa, ʻo Iuda; a oki ihola kona hānau ʻana.