KA BUKE MUA A MOSE, I KAPA ʻIA KINOHI 28 - Ka Baibala Hemolele

1 Hoʻomaikaʻi ʻo ʻIsaʻaka iā Iakoba, a hoʻouna aku iā ia i Padana ʻArama. 6 Ko ʻEsau mare iā Mahalata. 10 Ko Iakoba moeʻuhane, 18 a me ka pōhaku kūkulu ma Betela. 20 Ko Iakoba hoʻohiki ʻana.

MOKUNA XXVIII.

¹ ¶ Hea akula ʻo ʻIsaʻaka iā Iakoba, hoʻomaikaʻi akula iā ia, kauoha akula iā ia, ʻī akula, “Mai lawe ʻoe i wahine nāu no nā kaikamāhine a ko Kanaʻana.

² “E kū aʻe, e hele aku ʻoe i Padana ʻArama, i ka hale o Betuʻela ʻo ka makua kāne o kou makuahine; a e lawe ʻoe i wahine nāu no laila, no nā kaikamāhine a Labana a ke kaikunāne o kou makuahine.

³ “E hoʻomaikaʻi mai ke Akua Mana iā ʻoe, e hoʻohua mai kēlā iā ʻoe, e hoʻomāhuahua hoʻi iā ʻoe, i lilo ʻoe i poʻe kānaka he nui;

⁴ e hāʻawi mai hoʻi ʻo ia nou i ka pōmaikaʻi o ʻAberahama, nou, a no kāu poʻe mamo me ʻoe; i hoʻoili ʻia nou ka ʻāina āu e noho malihini nei, ka mea a ke Akua i hāʻawi mai ai no ʻAberahama.”

⁵ Hoʻouna akula ʻo ʻIsaʻaka iā Iakoba; a hele akula ia i Padana ʻArama i o Labana lā, i ke keiki a Betuʻela no Suria, i ke kaikunāne o Rebeka, ʻo ka makuahine o Iakoba lāua ʻo ʻEsau.

⁶ A ʻike iho ʻo ʻEsau, ua hoʻomaikaʻi mai ʻo ʻIsaʻaka iā Iakoba, a ua hoʻouna aku iā ia e hele i Padana ʻArama, e lawe i wahine nāna mai ia wahi mai; a i kāna hoʻomaikaʻi ʻana iā ia, kauoha akula ia, i ka ʻī ʻana, “Mai lawe ʻoe i wahine nāu no nā kaikamāhine a ko Kanaʻana,”

⁷ a ua hoʻolohe mai ʻo Iakoba i kona makua kāne, a me kona makuahine, a ua hala akula i Padana ʻArama;

⁸ a ʻike ihola ʻo ʻEsau, ʻaʻole i ʻoluʻolu ʻo ʻIsaʻaka ʻo kona makua kāne i nā kaikamāhine a ko Kanaʻana.

⁹ A laila, hele akula ʻo ʻEsau i o ʻIsemaʻela lā, a hui maila me kāna mau wāhine, iā Mahalata i ke kaikamahine a ʻIsemaʻela a ke keiki a ʻAberahama, ʻo ia ke kaikuahine o Nebaiota, i wahine nāna.

¹⁰ ¶ Hele akula ʻo Iakoba mai Beʻereseba aku, i kona hele ʻana i Harana.

¹¹ A hiki akula ia i kauahi, a noho ihola i laila i ka pō; no ka mea, ua napoʻo ka lā; lawe aʻela ia i kekahi o nā pōhaku o ia wahi i uluna nona, a moe ihola i laila.

¹² Moe ihola ia i ka ʻuhane; aia hoʻi, kū maila kekahi ala haka ma luna o ka honua, a hiki akula kona wēlau i ka lani; aia hoʻi, ua ʻikea nā ʻānela o ke Akua i ka piʻi ʻana aʻe, a i ka iho ʻana mai ma luna o ka haka.

¹³ Aia hoʻi, kū maila ʻo Iēhova ma luna aʻe o ka haka, ʻī maila, “ʻO wau nō Iēhova ke Akua o ʻAberahama ʻo kou kupuna kāne, a ke Akua o ʻIsaʻaka; e hāʻawi aku nō au i ka ʻāina āu e moe iho ai nou, a no kāu poʻe mamo.

¹⁴ “A e like auaneʻi ka nui o kāu poʻe mamo me ka lepo o ka honua, a e pālahalaha aʻe ana ʻoe i ke komohana, i ka hikina, i ke kūkulu ʻākau, a i ke kūkulu hema; iā ʻoe nō a i kāu poʻe mamo e hoʻopōmaikaʻi ʻia ai nā ʻohana a pau o ka honua.

¹⁵ “Aia hoʻi, me ʻoe nō wau, a e mālama auaneʻi iā ʻoe i nā wahi a pau āu e hele ai, a e hoʻihoʻi mai nō wau iā ʻoe i kēia ʻāina; no ka mea, ʻaʻole au e haʻalele iā ʻoe, a pau i ka hana ʻia e aʻu ka mea aʻu i ʻōlelo aku ai iā ʻoe.”

¹⁶ Ala aʻela ʻo Iakoba mai kona hiamoe ʻana, ʻī ihola ia, “He ʻoiaʻiʻo, ma ʻaneʻi nō ʻo Iēhova, ʻaʻole naʻe au i ʻike.”

¹⁷ ʻEʻehia ihola ia, ʻī ihola, “He wahi ʻeʻehia kēia! ʻO ka hale wale nō kēia no ke Akua, ʻo ka ʻīpuka hoʻi kēia o ka lani.”

¹⁸ ¶ Ala aʻela ʻo Iakoba i kakahiaka nui, lālau akula ia i ka pōhaku āna i uluna ai, hoʻokū aʻela i ʻeho, a ninini ihola i ka ʻaila ma luna o kona wēlau.

¹⁹ Kapa ihola ia i ka inoa o ia wahi, ʻo Betela; ʻo Luza ka inoa ma mua o ua kūlanakauhale lā.

²⁰ Hoʻohiki akula ʻo Iakoba i ka hoʻohiki ʻana, ʻī akula, “Inā e noho pū ke Akua me aʻu, a e mālama mai iaʻu ma kēia ala aʻu e hele nei, a e hāʻawi mai i ʻai naʻu e ʻai ai, a i kapa hoʻi e ʻaʻahu ai,

²¹ a hoʻi hou mai au i ka hale o koʻu makua kāne me ka maluhia; a laila ʻo Iēhova nō koʻu Akua.

²² “A ʻo kēia pōhaku aʻu i hoʻokū aʻe nei i kūkulu, e lilo auaneʻi ia i hale no ke Akua; a e hāʻawi ʻiʻo aku nō wau nou i ka hapaʻumi o nā mea a pau āu e hāʻawi mai ai iaʻu.”