KA BUKE MUA A MOSE, I KAPA ʻIA KINOHI 26 - Ka Baibala Hemolele

1 Ko ʻIsaʻaka hele i Gerara, no ka wī. 2 ʻŌlelo ke Akua iā ia. 7 Kāna hōʻole ʻana i kāna wahine. 12 Kona waiwai ʻana. 18 Kā lākou ʻeli ʻana i mau pūnāwai. 26 Ka berita a ʻAbimeleka me ʻIsaʻaka. 34 Nā wāhine a ʻEsau.

MOKUNA XXVI.

¹ ¶ He wī nō ma ia ʻāina, he ʻokoʻa ka wī mua i hiki mai ai i ka wā iā ʻAberahama. A hele akula ʻo ʻIsaʻaka i o ʻAbimeleka lā, i ke aliʻi o ko Pilisetia ma Gerara.

² ʻIkea akula ʻo Iēhova e ia, ʻī maila, “Mai hele ʻoe i lalo i ʻAigupita. E noho iho ma ka ʻāina aʻu e haʻi aku ai iā ʻoe.

³ “E noho ʻoe ma kēia ʻāina, a me ʻoe pū nō wau, a e hoʻopōmaikaʻi aku nō wau iā ʻoe; no ka mea, e hāʻawi aku auaneʻi au nou, a no kāu poʻe mamo i kēia mau ʻāina a pau; a e hoʻokō auaneʻi au i ka hoʻohiki ʻana aʻu i hoʻohiki ai i kou makua kāne iā ʻAberahama.

⁴ “A e hoʻonui aku au i kāu poʻe mamo e like me nā hōkū o ka lani, a e hāʻawi aku nō wau i kēia mau ʻāina a pau no kāu poʻe mamo; a i kāu mamo e hoʻopōmaikaʻi ʻia ai nā lāhui kanaka a pau o ka honua;

⁵ no ka mea, i hoʻolohe mai nō ʻo ʻAberahama i koʻu leo, a i mālama hoʻi i kaʻu mau kauoha, i kaʻu mau ʻōlelo, a me koʻu mau kānāwai.”

⁶ A noho ihola ʻo ʻIsaʻaka ma Gerara.

⁷ Nīnau maila nā kānaka o ia wahi iā ia no kāna wahine; ʻī akula ia, “ʻO koʻu kaikuahine nō ia;” no ka mea, makaʻu ihola ia i ka ʻī aku, “ʻO ia kaʻu wahine; o pepehi mai nā kānaka o ia wahi iaʻu no Rebeka; no ka mea, he maikaʻi ia ke nānā ʻia aku.”

⁸ Iā ia i noho ai ma ia wahi a liʻuliʻu, nānā maila ʻo ʻAbimeleka ʻo ke aliʻi o ko Pilisetia, ma ka puka makani, ʻike maila ia, aia hoʻi, ʻo ʻIsaʻaka e leʻaleʻa ana me kāna wahine, me Rebeka.

⁹ Hea maila ʻo ʻAbimeleka iā ʻIsaʻaka, ʻī maila, “Aia hoʻi, he ʻoiaʻiʻo nō, ʻo kāu wahine nō ia; a pehea hoʻi ʻoe i ʻōlelo mai ai, ‘ʻO koʻu kaikuahine ia’?” ʻĪ akula ʻo ʻIsaʻaka iā ia, “No ka mea, ʻī ihola au, ‘E make paha uaneʻi au nona.’”

¹⁰ ʻĪ maila ʻo ʻAbimeleka, “He aha kēia āu i hana mai ai iā mākou? Inā i moe wale paha kekahi o nā kānaka me kāu wahine, inā ua hoʻoili mai ʻoe i ka hala ma luna o mākou.”

¹¹ Kauoha aku ʻo ʻAbimeleka i nā kānaka a pau, i ka ʻī ʻana, “ʻO ka mea hoʻopā aku i kēia kanaka, a i kāna wahine paha, he ʻoiaʻiʻo e make ia.”

¹² ¶ Lūlū hua ihola ʻo ʻIsaʻaka ma ia ʻāina, a loaʻa pāhaneri maila iā ia ia makahiki; a hoʻopōmaikaʻi maila ʻo Iēhova iā ia.

¹³ Lilo aʻela ua kanaka lā i mea nui, māhuahua aʻela ia, ulu aʻela, a lilo i kanaka nui loa;

¹⁴ no ka mea, nāna nā hipa, a me nā bipi, a me nā kānaka he nui loa; a huāhuā maila ko Pilisetia iā ia.

¹⁵ A ʻo nā pūnāwai a pau i ʻeli ʻia e nā kauā a kona makua kāne, i ka wā iā ʻAberahama, hūnā aʻela ko Pilisetia ia mau mea i ka hoʻopiha i ka lepo.

¹⁶ ʻŌlelo maila ʻo ʻAbimeleka iā ʻIsaʻaka, “E hele aku ʻoe mai o mākou aku; no ka mea, ua nui loa aku kāu, i kā mākou.”

¹⁷ Hele akula ʻo ʻIsaʻaka, a kūkulu ihola i kona halelewa ma ke awāwa ʻo Gerara, a noho ihola i laila.

¹⁸ ¶ ʻEli hou ihola ʻo ʻIsaʻaka i nā luawai a lākou i ʻeli iho ai i ka wā iā ʻAberahama ʻo kona makua kāne; no ka mea, ua hūnā iho ko Pilisetia ia mau mea ma hope o ka make ʻana o ʻAberahama; a kapa ihola ia i ko lākou mau inoa, ma nā inoa a kona makua kāne i kapa iho ai.

¹⁹ ʻEli ihola nā kauā a ʻIsaʻaka ma ke awāwa, a loaʻa ihola ka pūnāwai i laila, he wai mau.

²⁰ Hakakā maila nā kahu bipi no Gerara me nā kahu bipi o ʻIsaʻaka, i ka ʻī ʻana mai, “No mākou ia wai,” a kapa ihola ia i ka inoa o ua luawai lā, ʻo ʻEseka, no ko lākou hakakā ʻana mai me ia.

²¹ ʻEli ihola hoʻi lākou i ka luawai hou, a hakakā mai nō hoʻi lākou no ia mea; a kapa ihola ʻo ia i kona inoa, ʻo Sitena.

²² Neʻeneʻe akula ia mai ia wahi aku, a ʻeli ihola i ka luawai hou; ʻaʻole nō lākou i hakakā mai no ia mea; a kapa ihola ʻo ia i kona inoa, ʻo Rehobota; ʻī ihola ia, “ʻĀnō hoʻi, ua hāʻawi mai ʻo Iēhova i kahi ākea no kākou; a e hoʻohua auaneʻi kākou ma ka ʻāina.”

²³ ¶ A ma hope aku, piʻi akula ia ma laila aku a Beʻereseba.

²⁴ ʻIkea aʻela ʻo Iēhova e ia ia pō iho, ʻī maila, “ʻO wau nō ke Akua o ʻAberahama ʻo kou makua kāne; Mai makaʻu ʻoe, ʻo wau nō me ʻoe. A e hoʻopōmaikaʻi nō au iā ʻoe a e hoʻonui hoʻi i kāu poʻe mamo, No kaʻu kauā, no ʻAberahama.”

²⁵ Hana ihola ia i kuahu ma laila, a kāhea akula ia i ka inoa ʻo Iēhova, a kūkulu ihola i kona halelewa i laila; i laila hoʻi nā kauā a ʻIsaʻaka i ʻeli iho ai i ka luawai.

²⁶ ¶ A laila, hele maila i ona lā ʻo ʻAbimeleka mai Gerara mai, ʻo ia me ʻAhuzata kekahi hoalauna ona, a me Pikola ka luna koa o kona poʻe kaua.

²⁷ ʻĪ akula ʻo ʻIsaʻaka iā lākou, “He aha kā ʻoukou i hele mai ai i oʻu nei; no ka mea, ke inaina mai nei ʻoukou iaʻu, a ua hoʻokuke mai nei ʻoukou iaʻu mai o ʻoukou aku?”

²⁸ ʻŌlelo maila lākou, “Ua ʻike ʻiʻo mākou, aia nō ʻo Iēhova me ʻoe,” ʻōlelo aʻela mākou, “I hoʻohiki ʻana ma waena o kākou, ʻo mākou nei, a ou lā, a e hoʻopaʻa mākou i berita me ʻoe,

²⁹ i hana ʻino ʻole mai ʻoe iā mākou, me mākou i hoʻopā ʻole aku ai iā ʻoe, ʻo ka maikaʻi wale nō kā mākou i hana aku ai iā ʻoe, a ua hoʻihoʻi aku iā ʻoe me ka maluhia; ʻo ʻoe ʻiʻo nō ka mea i hoʻopōmaikaʻi ʻia e Iēhova.”

³⁰ Hana ihola ia i ʻahaʻaina na lākou, ʻai ihola lākou a inu hoʻi.

³¹ Ala aʻela lākou i kakahiaka nui, a hoʻohiki ihola lāua, i kekahi i kekahi; hoʻokuʻu akula ʻo ʻIsaʻaka iā lākou, a hoʻi hou akula lākou mai ona aku lā me ke kuʻikahi.

³² Ia lā hoʻokahi nō, hele maila nā kauā a ʻIsaʻaka, a haʻi maila iā ia no ka luawai a lākou i ʻeli iho ai, ʻī maila iā ia, “Ua loaʻa iā mākou ka wai.”

³³ Kapa ihola ʻo ia ia wahi, ʻo Seba; no laila, ʻo Beʻereseba ka inoa o ia kūlanakauhale a hiki i kēia lā.

³⁴ ¶ Hoʻokahi kanahā nā makahiki o ʻEsau iā ia i lawe ai iā Iehudita ke kaikamahine a Beʻeri no kā Heta, a me Basemata ke kaikamahine a ʻElona no kā Heta, i mau wāhine nāna.

³⁵ He mau mea ʻehaʻeha lāua no ka naʻau o ʻIsaʻaka a me Rebeka.