KA BUKE MUA A MOSE, I KAPA ʻIA KINOHI 21 - Ka Baibala Hemolele

1 Hānau ʻia ʻo ʻIsaʻaka. 4 ʻOki poepoe ʻia hoʻi. 6 ʻOliʻoli Sara. 9 Hoʻokuke ʻia ʻo Hagara lāua ʻo ʻIsemaʻela. 17 Loaʻa ka ʻānela o ke Akua iā Hagara ma ka wao nahele. 21 Ko ʻIsemaʻela mare ʻana. 22 Kā ʻAbimeleka berita me ʻAberahama. 34 Kona noho ʻana me ko Pilisetia.

MOKUNA XXI.

¹ ¶ ʻIke maila ʻo Iēhova iā Sara e like me kāna i ʻī mai ai; a hana maila ʻo Iēhova iā Sara e like me kāna i ʻōlelo mai ai.

² No ka mea, hāpai aʻela ʻo Sara, a hānau maila he keiki kāne na ʻAberahama i kona wā ʻelemakule; i ka manawa a ke Akua i ʻōlelo mai ai iā ia.

³ Kapa akula ʻo ʻAberahama i ka inoa o kāna keiki i hānau nāna, i ka mea a Sara i hānau ai nāna, ʻo ʻIsaʻaka.

⁴ I ka pō ʻawalu, ʻoki poepoe aʻela ʻo ʻAberahama i kāna keiki iā ʻIsaʻaka e like me kā ke Akua i kauoha mai ai iā ia.

⁵ Hoʻokahi haneri makahiki o ʻAberahama i ka wā i hānau ai ʻo ʻIsaʻaka nāna.

⁶ ʻĪ maila ʻo Sara, “Ua hōʻakaʻaka mai nō ke Akua iaʻu, a e ʻakaʻaka pū hoʻi me aʻu ka poʻe lohe a pau.”

⁷ ʻĪ maila hoʻi ʻo ia, “ʻO wai ka mea i ʻōlelo iā ʻAberahama, e hānai auaneʻi ʻo Sara i nā keiki i ka waiū? No ka mea, ua hānau iho nei au i keiki kāne nāna i kona wā ʻelemakule.”

⁸ ¶ Nui aʻela ua keiki nei, a ukuhi ia; a hana ihola ʻo ʻAberahama i ka ʻahaʻaina nui, i ka lā a ʻIsaʻaka i haʻalele ai i ka waiū.

⁹ ʻIke akula ʻo Sara i ke keiki a Hagara no ʻAigupita, i ka mea āna i hānau ai na ʻAberahama, e hoʻomāʻewaʻewa ana.

¹⁰ No ia mea, ʻī maila ʻo ia iā ʻAberahama, “E hoʻokuke aku ʻoe i ua kauā wahine lā a me kāna keiki; no ka mea, ʻaʻole e hoʻoili pū ʻia aku ka waiwai i ke keiki a ua kauā wahine lā me kaʻu keiki, me ʻIsaʻaka.”

¹¹ He mea ʻehaʻeha loa ia i ka manaʻo o ʻAberahama, no kāna keiki.

¹² ʻĪ maila ke Akua iā ʻAberahama, “Mai hōʻehaʻeha ʻoe i kou naʻau no ke keiki, a no kāu kauā wahine, e hoʻolohe aku ʻoe i ka leo o Sara i ka mea a pau āna i ʻōlelo mai ai iā ʻoe; no ka mea, e kapa ʻia aku kāu poʻe mamo ma muli o ʻIsaʻaka.

¹³ “A e hoʻolilo auaneʻi hoʻi au i ke keiki a ke kauā wahine i lāhui kanaka; no ka mea, ʻo kāu keiki ia.”

¹⁴ Ala aʻela ʻo ʻAberahama i ke kakahiaka nui, lālau akula ia i ka berena a me ka wai i loko o ka hue a hāʻawi aʻela iā Hagara, a kau akula ma luna o kona poʻohiwi, a me ke keiki nō hoʻi, a kuʻu akula iā ia; hele aku nō ia, a kuewa wale aʻela ma loko o ka wao nahele ʻo Beʻereseba.

¹⁵ A pau aʻela ka wai i loko o ka hue wai, waiho ihola ia i ke keiki ma lalo o kekahi lāʻau ʻuʻuku.

¹⁶ Hele akula ia, a noho ihola i kahi kūpono iā ia, e mamao aku ana e like me ka pana ʻana o ka pua; no ka mea, ʻī ihola ia, “ʻAʻole au e pono ke ʻike i ka make ʻana o ke keiki.” Noho akula ia i kahi kūpono, a hoʻokiʻekiʻe aʻela ia i kona leo, a uē ihola.

¹⁷ Hoʻolohe maila ke Akua i ka leo o ke keiki; a kāhea maila ka ʻānela o ke Akua iā Hagara mai ka lani mai, ʻī maila iā ia, “He aha kāu e Hagara? Mai makaʻu ʻoe; no ka mea, ua hoʻolohe mai nō ke Akua i ka leo o ke keiki ma kona wahi i waiho ai.

¹⁸ “E kū aʻe ʻoe, e kaʻikaʻi aʻe i ke keiki, a e hoʻopaʻa aku kou lima iā ia; no ka mea, e hoʻolilo auaneʻi au iā ia i lāhui kanaka nui.”

¹⁹ Hoʻokaʻakaʻa aʻela ke Akua i kona mau maka, a ʻike akula ia i kekahi luawai; hele akula ia, ukuhi ihola a piha ka hue wai i ka wai, a hoʻoinu ihola i ke keiki.

²⁰ Me ua keiki nei nō ke Akua, a nui aʻela ia, a noho ihola ma ka wao nahele, a lilo aʻela ia i kanaka pana pua.

²¹ Noho ihola ia ma ka wao nahele ʻo Parana; a lawe aʻela kona makuahine i wahine nāna, no ʻAigupita mai.

²² ¶ Ia manawa, ʻōlelo maila ʻo ʻAbimeleka lāua ʻo Pikola kona luna koa iā ʻAberahama, i ka ʻī ʻana mai, “Me ʻoe nō ke Akua i nā mea a pau āu e hana nei.

²³ “No laila hoʻi, e hoʻohiki ʻoe noʻu ʻānō ma ke Akua, ʻaʻole ʻoe e hoʻopunipuni mai iaʻu, ʻaʻole i kaʻu keiki, ʻaʻole hoʻi i kaʻu moʻopuna; e like me ka lokomaikaʻi aʻu i hana aku ai iā ʻoe, pēlā hoʻi ʻoe e hana mai ai iaʻu, a i ko ka ʻāina āu i noho iho ai.”

²⁴ ʻĪ akula ʻo ʻAberahama, “E hoʻohiki nō wau.”

²⁵ Aʻo akula hoʻi ʻo ʻAberahama iā ʻAbimeleka no ka luawai a nā kauā a ʻAbimeleka i kāʻili aku ai.

²⁶ ʻĪ maila ʻo ʻAbimeleka, “ʻAʻole au i ʻike i ka mea nāna i hana ia mea; ʻaʻole hoʻi ʻoe i haʻi mai; ʻaʻole hoʻi au i lohe a hiki i kēia lā.”

²⁷ Lālau akula ʻo ʻAberahama i nā hipa a me nā bipi kāne, a hāʻawi akula ia mau mea no ʻAbimeleka; a hoʻopaʻa ihola lāua a ʻelua i berita.

²⁸ A hoʻonoho akula ʻo ʻAberahama i nā hipa keiki wahine i ʻehiku ma kahi kaʻawale.

²⁹ Nīnau maila ʻo ʻAbimeleka iā ʻAberahama, “I mea aha kēia mau hipa keiki wahine ʻehiku, āu i hoʻonoho iho ai ma kahi kaʻawale?”

³⁰ ʻĪ akula kēlā, “No ka mea, e lawe ʻoe i kēia mau hipa keiki wahine ʻehiku na kuʻu lima aku, i mea hōʻike maka noʻu, naʻu nō i ʻeli iho i kēia luawai.”

³¹ No laila, kapa ihola ʻo ia ia wahi, ʻo Beʻereseba; no ka mea, i laila i hoʻohiki aku ai lāua a ʻelua.

³² Pēlā nō lāua i hoʻopaʻa iho ai i berita ma Beʻereseba; a laila, kū aʻela ʻo ʻAbimeleka lāua ʻo Pikola kona luna koa, a hoʻi hou akula lāua i ka ʻāina o ko Pilisetia.

³³ Kanu ihola ʻo ʻAberahama i lāʻau ma Beʻereseba, a kāhea akula i laila i ka inoa ʻo Iēhova ke Akua Mau Loa.

³⁴ Noho ihola ʻo ʻAberahama ma ka ʻāina o ko Pilisetia i nā lā he nui loa.