KA BUKE MUA A MOSE, I KAPA ʻIA KINOHI 2 - Ka Baibala Hemolele

1 No ka lā Sābati mua. 4 Ke ʻano o ka hana ʻana i nā mea a pau. 8 Ka mahina ʻai ʻo ʻEdena. 10 Ka muliwai ma laila. 16 Ka lāʻau no ka ʻike i lāhui. 19 Ko ʻAdamu kapa ʻana i nā mea ola a pau. 21 Ka hana ʻana i ka wahine a me ka mare ʻana.

MOKUNA II.

¹ ¶ Pēlā i paʻa ai ka lani a me ka honua i ka hana ʻia, a me ko laila poʻe mea a pau.

² A i ka hiku o ka lā, hoʻōki ihola ke Akua i ka hana āna i hana ai; a hoʻomaha ihola ʻo ia i kāna hana a pau āna i hana ai.

³ Hoʻomaikaʻi maila ke Akua i ka hiku o ka lā, a hoʻāno ihola; no ka mea, hoʻomaha ihola ʻo ia ia lā i ka hana a pau a ke Akua i hana ai.

⁴ ¶ Eia ka moʻoʻōlelo no ka lani a me ka honua i ka wā i hana ʻia ai ia mau mea, i ka lā a Iēhova a ke Akua i hana ai i ka honua a me ka lani,

⁵ a me nā mea kanu a pau o ka mahina ʻai, i ka wā ʻaʻole ia ma loko o ka honua, a me nā lau nahele a pau o ke kula ma mua o kona ulu ʻana; no ka mea, ʻaʻole i hoʻoua mai ʻo Iēhova ke Akua i ka ua ma luna o ka honua, ʻaʻole hoʻi he kanaka nāna e mahi ka ʻāina.

⁶ Akā, piʻi akula ka ʻohu mai ka honua aku, a hoʻomaʻū ihola i ka ʻili a pau o ka ʻāina.

⁷ Hana ihola ʻo Iēhova ke Akua i ke kanaka, he lepo o ka honua, a hā ihola ia i ka hanu ola i loko o nā puka ihu ona; a lilo aʻela ke kanaka i mea ola.

⁸ Kanu ihola ʻo Iēhova ke Akua i ka mahina ʻai ma loko o ʻEdena ma ka hikina; a ma laila ʻo ia i hoʻonoho iho ai i ke kanaka āna i hana ai.

⁹ Hoʻoulu aʻela ʻo Iēhova ke Akua i nā lāʻau a pau mai loko aʻe o ka honua, i nā mea ʻoluʻolu no ka maka, i nā mea ʻono hoʻi ke ʻai; i ka lāʻau o ke ola hoʻi i waenakonu o ka mahina ʻai, a me ka lāʻau i ʻikea ai ka pono a me ka hewa.

¹⁰ ¶ Kahe aʻela kekahi muliwai mai ʻEdena aku e hoʻomaʻū i ka mahina ʻai; a ma laila aku, manamana aʻela ia a lilo i ʻehā mana.

¹¹ ʻO Pisona ka inoa o ka mua; ʻo ia nō ka mea e hoʻopuni ana i ka ʻāina a pau o Havila, he wahi gula ia.

¹² A he maikaʻi ke gula o ia ʻāina; i laila nō ka deliuma a me ka pōhaku ʻonika.

¹³ ʻO Gihona ka inoa o ka lua o ka muliwai; ʻo ia ka mea e hoʻopuni ana i ka ʻāina a pau o ʻAitiopa.

¹⁴ ʻO Hidekela ka inoa o ke kolu o ka muliwai; ʻo ia ka mea e kahe ana ma ka ʻaoʻao hikina a ʻAsuria. A ʻo ʻEuperate ka inoa o ka hā o ka muliwai.

¹⁵ Lawe aʻela ʻo Iēhova ke Akua i ke kanaka, a hoʻonoho ihola iā ia ma ka mahina ʻai ma ʻEdena, e mahi a e mālama ia wahi.

¹⁶ Kauoha maila ʻo Iēhova ke Akua i ke kanaka, ʻī maila, “E ʻai wale ʻoe i ko kēia lāʻau kēlā lāʻau o ka mahina ʻai nei;

¹⁷ akā, ʻo ko ka lāʻau i ʻikea ai ka pono a me ka hewa, mai ʻai iho ʻoe ia mea; no ka mea, i kou lā e ʻai ai ia mea, he ʻoiaʻiʻo nō e make ʻoe.”

¹⁸ ¶ ʻĪ ihola ʻo Iēhova ke Akua, “ʻAʻole pono ke kanaka ke noho, ʻo ia wale; e hana nō wau i kōkoʻolua nona e kū iā ia.”

¹⁹ No ka lepo i hana ai ʻo Iēhova ke Akua i nā holoholona a pau o ke kula, a me nā manu a pau o ka lewa, a kaʻi maila iā lākou i o ʻAdamu lā, i ʻikea nā inoa a ʻAdamu e kapa aku ai iā lākou; a ʻo ka inoa a ʻAdamu i kapa aku ai i nā mea ola a pau, ʻo ia ihola kona inoa.

²⁰ Kapa akula ʻo ʻAdamu i nā inoa no nā holoholona laka a pau, a no nā manu o ka lewa, a no nā holoholona hihiu a pau; akā no ʻAdamu, ʻaʻole i loaʻa kona kōkoʻolua e kū iā ia.

²¹ Hoʻokau maila ʻo Iēhova ke Akua i ka hiamoe nui iā ʻAdamu, a hiamoe ihola ia; unuhi aʻela kēlā i kekahi iwi ʻaoʻao ona, a hoʻopili ihola ia i ka ʻiʻo ma kona wahi.

²² A ʻo ka iwi ʻaoʻao a Iēhova ke Akua i unuhi mai ai no loko mai o ke kanaka, hana ihola ʻo ia ia mea i wahine, a alakaʻi aʻela iā ia i ke kanaka.

²³ ʻĪ akula ʻo ʻAdamu, “ʻO ia nei nō ka iwi o kuʻu mau iwi, A me ka ʻiʻo o kuʻu ʻiʻo; e kapa ʻia ʻo ia nei, Wahine; No ka mea, ua unuhi ʻia aʻe ʻo ia mai loko aʻe o ke Kāne.”

²⁴ No kēia mea, e haʻalele aku ke kanaka i kona makua kāne a me kona makuahine, a e pili aku ʻo ia i kāna wahine; a e lilo lāua i ʻiʻo hoʻokahi.

²⁵ ʻAʻohe kapa o lāua a ʻelua, ʻo ke kāne a me kāna wahine, ʻaʻole hoʻi o lāua hilahila.