KA BUKE MUA A MOSE, I KAPA ʻIA KINOHI 19 - Ka Baibala Hemolele

1 Hoʻokipa ʻia nā ʻānela ʻelua e Lota. 4 Ka hewa a me ka makapō ʻana o ko Sodoma. 12 Hoʻokuʻu ʻia ʻo Lota mā i ka mauna. 23 Kona komo ʻana iā Zoara. 24 Ka luku ʻia ʻo Sodoma. 26 Lilo kā Lota wahine i kia paʻakai. 30 Ko Lota mā noho ʻana ma ke ana. 31 Kāna moe ʻana i kāna mau kaikamāhine.

MOKUNA XIX.

¹ ¶ A ahiahi ihola, hiki akula nā ʻānela ʻelua ma Sodoma; a noho ihola ʻo Lota ma ka ʻīpuka o Sodoma; ʻike akula ʻo Lota, kū aʻela ia e hālāwai pū lākou, a kūlou ihola kona mau maka i lalo ma ka honua.

² ʻĪ akula, “E kuʻu mau haku, ke noi aku nei au iā ʻolua, e kipa mai ʻolua ma loko o ka hale o kā ʻolua kauā nei, e moe nō a ao ka pō, a e holoi i ko ʻolua wāwae, a kakahiaka nui e ala aʻe ʻolua a e hele aku.” ʻĪ maila lāua, “ʻAʻole, e moe nō māua ma ke alanui a ao ka pō.”

³ Koi ikaika akula ia iā lāua; a kipa aʻela lāua i ona lā, a komo akula i loko o kona hale; a hana iho nō ia i ʻahaʻaina na lāua, pūlehu ihola i ka palaoa hū ʻole, a ʻai ihola lāua.

⁴ ʻAʻole lāua i moe iho, a ʻo nā kānaka o ke kūlanakauhale, ʻo nā kānaka o Sodoma, ʻo ka poʻe kahiko a me ka poʻe hou, ʻo nā kānaka a pau mai ʻō a ʻō, hoʻopuni maila lākou i ka hale.

⁵ Kāhea maila lākou iā Lota, ʻī maila iā ia, “ʻAuhea nā kānaka i hele mai i ou lā i kēia pō? E kaʻi mai iā lāua i waho i o mākou nei, i ʻike mākou iā lāua.”

⁶ Hele akula ʻo Lota i waho ma ka puka i o lākou lā; a papani aʻela i ka puka ma hope ona.

⁷ ʻĪ akula, “E nā hoahānau, ke nonoi aku nei au iā ʻoukou, mai hana hewa ʻoukou!

⁸ “Eia hoʻi iaʻu nā kaikamāhine ʻelua i ʻike ʻole i ke kāne; e ʻae mai ʻoukou iaʻu e lawe mai iā lāua i waho i o ʻoukou nei, a e hana aku ʻoukou iā lāua i ka mea pono ma ko ʻoukou maka; akā, mai hana aku ʻoukou i kekahi mea i kēia mau kānaka; no ka mea; no laila lāua i hele mai nei ma ka malumalu o kuʻu hale.”

⁹ ʻĪ maila lākou, “E hoʻokaʻawale ʻoe!” ʻĪ aʻela hoʻi lākou, “I hele mai nō ʻo ia nei e noho wale ma ʻaneʻi, a e lilo ana kā ia i luna kānāwai; ʻānō hoʻi, e ʻoi aku kā mākou hana ʻino ʻana iā ʻoe i ko lāua lā.” A hoʻokēkē nui maila lākou i ua kanaka nei, iā Lota, a neʻeneʻe maila e wāwahi i ke pani puka.

¹⁰ Akā, lālau akula ua mau kānaka lā iā Lota, a huki mai lāua iā ia i loko o ka hale i o lāua lā, a papani akula i ka puka.

¹¹ Hoʻomakapō ihola lāua i ka poʻe kānaka i waho o ka puka o ka hale, i nā mea ʻuʻuku a me nā mea nui; a hoʻopauaho lākou iā lākou iho i ka ʻimi i ka puka.

¹² ¶ ʻĪ maila lāua iā Lota, “ʻAʻole anei iā ʻoe kekahi poʻe ʻē aʻe ma ʻaneʻi? ʻO ka hūnōna kāne paha, ʻo nā keiki kāne āu, a me āu mau kaikamāhine, a ʻo nā mea a pau iā ʻoe, e lawe ʻia aku i waho o kēia wahi!

¹³ “No ka mea, e luku aku māua i kēia wahi, no ka nui loa aʻe o ka leo no lākou, i mua o ke alo o Iēhova; a ua hoʻouna mai nō ʻo Iēhova iā māua e luku aku ia wahi.”

¹⁴ Hele akula ʻo Lota i waho, ʻōlelo akula i kona mau hūnōna kāne i mare me nā kaikamāhine āna, ʻī akula, “E ala aʻe, e holo aku i waho o kēia wahi; no ka mea, e luku mai ana ʻo Iēhova i nēia kūlanakauhale.” Akā, ua like ia i ka manaʻo o nā hūnōna kāne me ka mea hoʻomāʻewaʻewa.

¹⁵ I ka wanaʻao, hoʻolalelale ua mau ʻānela lā iā Lota, ʻī maila, “E ala aʻe, e lawe i kāu wahine, a me kāu mau kaikamāhine ʻelua ma ʻaneʻi, o pau auaneʻi ʻoe i loko o ka make o ko ke kūlanakauhale.”

¹⁶ Iā ia i hoʻokaʻulua ai, lālau akula ua mau kānaka lā i kona lima, me ka lima o kāna wahine, a me ka lima o kāna mau kaikamāhine ʻelua; ahonui maila ʻo Iēhova iā ia, alakaʻi akula lāua iā ia, a hoʻokuʻu akula i waho o ke kūlanakauhale.

¹⁷ I ka wā i alakaʻi aku ai lāua iā lākou i waho o ke kūlanakauhale, a laila ʻī maila ia, “E holo i pakele kou ola; mai nānā i hope ou, mai kali ʻoe ma nēia wahi pāpū a pau; e holo i ka mauna, o make ʻoe.”

¹⁸ ʻĪ akula ʻo Lota iā lāua, “Auē! e kuʻu Haku, ʻaʻole pēlā!

¹⁹ “Eia hoʻi, ua loaʻa iho nei i kāu kauā ka lokomaikaʻi i mua o kou mau maka, a ua hoʻonui aʻe nei ʻoe i kou aloha āu i hōʻike mai ai iaʻu i ka hoʻōla ʻana mai iaʻu, ʻaʻole e hiki iaʻu ke holo ma ka mauna, o loaʻa iaʻu ka pōʻino, a make au.

²⁰ “Eia aʻe ke kūlanakauhale, e hiki koke ke holo ma laila, a ua liʻiliʻi hoʻi ia; ʻeā, e ʻae mai iaʻu e holo ma laila, (ʻaʻole anei ia he wahi liʻiliʻi?) a e mālama ʻia kuʻu ola.”

²¹ ʻĪ maila kēlā iā ia, “Aiʻa, ua hoʻolohe aku nō au i kēia mea hoʻi; ʻaʻole au e luku aku ia kūlanakauhale; no ka mea āu i ʻōlelo mai ai.

²² “E wikiwiki ʻoe e holo i laila; no ka mea, ʻaʻole e hiki iaʻu ke hana i kekahi mea, a puka aku nō ʻoe i laila.” No laila, ua kapa ʻia ka inoa o ia kūlanakauhale, ʻo Zoara.

²³ ¶ Ua puka mai ka lā ma luna o ka honua i ke komo ʻana o Lota i loko o Zoara.

²⁴ A laila, hoʻoua maila ʻo Iēhova ma luna o Sodoma i ka luaʻi pele a me ke ahi mai o Iēhova lā, mai ka lani mai.

²⁵ Hoʻokahuli ihola ʻo ia ia mau kūlanakauhale, a me kahi pāpū a pau, a me nā kānaka a pau o ua mau kūlanakauhale lā, a me nā mea ulu ma ka honua.

²⁶ Akā, nānā aʻela kāna wahine ma hope ona, a lilo ihola ia i kūkulu paʻakai.

²⁷ ¶ Ala aʻela ʻo ʻAberahama i kakahiaka nui, a hoʻi hou akula ia i kahi āna i kū ai i mua o Iēhova.

²⁸ Nānā akula ia ma Sodoma a me Gomora, a ma ka ʻāina pāpū a pau, ʻike akula ia, aia hoʻi, piʻi aʻela ka uahi o ia ʻāina i luna, e like me ka pūnohu o ka lua ahi.

²⁹ A i ka wā a ke Akua i luku ai i nā kūlanakauhale o ka pāpū, hoʻomanaʻo ihola nō ke Akua iā ʻAberahama, a hoʻopakele aʻela iā Lota mai waena aku o ka hoʻokahuli ʻana, iā ia i hoʻokahuli ai i nā kūlanakauhale kahi a Lota i noho ai.

³⁰ ¶ Piʻi aʻela ʻo Lota mai loko aku o Zoara, a noho ihola ma ka mauna, a me ia pū nā kaikamāhine āna ʻelua; no ka mea, makaʻu ihola ia ke noho ma Zoara; noho nō ia ma kekahi ana, ʻo ia a me kāna mau kaikamāhine ʻelua.

³¹ ʻĪ akula ka hānau mua i kona kaikaina, “ʻEā, ua ʻelemakule ko kāua makua kāne, ʻaʻole hoʻi he kanaka ma ka honua nei a pau nāna e komo mai i o kāua nei, e like me ka hana ʻana a ko ka honua nei.

³² “Inā kāua, e hoʻoinu kāua i ko kāua makua kāne i ka waina, a e moe kāua me ia, i mālama ai kāua i hua na ko kāua makua kāne.”

³³ Hoʻoinu lāua ia pō i ko lāua makua kāne i ka waina; a komo akula ka hānau mua i loko, a moe ihola me kona makua kāne, ʻaʻole naʻe i ʻike kēlā i kona wā i moe iho ai, ʻaʻole hoʻi kona wā i ala ai.

³⁴ A ia lā aʻe, ʻī akula ka hānau mua i ke kaikaina, “Aia hoʻi, moe iho nō au me kuʻu makua kāne i ka pō nei; e hoʻoinu kāua iā ia i ka waina i kēia pō nō hoʻi; a e komo aku ʻoe i loko, e moe me ia, i mālama ai kāua i hua na ko kāua makua kāne.”

³⁵ Hoʻoinu lāua i ko lāua makua kāne i ka waina ia pō nō hoʻi; a kū aʻela ke kaikaina, a moe ihola me ia; ʻaʻole kēlā i ʻike i kona wā i moe iho ai, ʻaʻole hoʻi i kona wā i ala ai.

³⁶ Hāpai nā kaikamāhine ʻelua a Lota na ko lāua makua kāne.

³⁷ Hānau maila ka mua i keiki kāne, a kapa ihola i kona inoa ʻo Moaba; ʻo ia ke kupuna o ka Moaba a hiki i kēia manawa.

³⁸ A hānau maila hoʻi ka muli iho i keiki kāne, a kapa ihola i kona inoa ʻo Bene-ʻAmi; ʻo ia ke kupuna o kā ʻAmona a hiki i kēia manawa.