KA BUKE MUA A MOSE, I KAPA ʻIA KINOHI 18 - Ka Baibala Hemolele

1 Hoʻokipa ʻAberahama i nā ʻānela ʻekolu. 9 Aʻo ʻia ʻo Sara no kona ʻakaʻaka ʻana. 17 Haʻi ʻia iā ʻAberahama ko ke Akua manaʻo huhū iā Sodoma. 23 Kā ʻAberahama pule no Sodoma.

MOKUNA XVIII.

¹ ¶ ʻIkea aʻela ʻo Iēhova e ia ma nā lāʻau ʻoka o Mamere; a noho ihola ia ma ka puka o ka halelewa, i ka manawa i wela mai ai ka lā.

² ʻAlawa aʻela kona mau maka i luna, ʻike aʻela, aia hoʻi, kū maila nā kānaka ʻekolu i mua ona; a i kona ʻike ʻana aku, holo akula ia mai ka puka o ka halelewa aku e hālāwai me lākou, a kūlou ihola ia ma ka honua.

³ ʻĪ akula ia, “E kuʻu Haku, inā i loaʻa iaʻu ke aloha ʻia i mua o kou mau maka, ke noi aku nei au iā ʻoe, mai hele wale aku ʻoe mai kāu kauā aku.

⁴ “Ke noi aku nei au, i lawe ʻia mai kekahi wai iki e holoi i ko ʻoukou mau wāwae, a e hoʻomaha iho ʻoukou ma lalo o ka lāʻau.

⁵ “E lawe mai nō hoʻi au i wahi berena, a e hōʻoluʻolu iho i ko ʻoukou naʻau; a ma hope iho ʻoukou e hele aku ai; no ka mea; no laila ko ʻoukou hele ʻana mai i ko ʻoukou kauā.” ʻĪ maila lākou, “Me kāu i ʻōlelo mai ai, pēlā ʻoe e hana ai.”

⁶ Wikiwiki aʻela ʻo ʻAberahama i ka hele i loko o ka halelewa i o Sara lā, ʻī akula, “E hoʻomākaukau koke ʻoe i ʻekolu sato palaoa wali; e hoʻokāwili a e pūlehu i papa berena.”

⁷ Holo akula ʻo ʻAberahama i ka ʻohana bipi, lālau akula i ka bipi keiki ʻōpiopio momona, hāʻawi akula i kekahi keiki, a wikiwiki ihola ia e kālua.

⁸ Lālau aku ia i wahi bata a me ka waiū, a me ka bipi keiki āna i kālua ai, a kau akula i mua o lākou, a kū akula ia ma o lākou lā ma lalo o ka lāʻau; a ʻai ihola lākou.

⁹ ¶ Nīnau maila lākou iā ia, “ʻAuhea kāu wahine, ʻo Sara?” ʻĪ akula ia, “Aia nō i loko o ka halelewa.”

¹⁰ A laila, ʻī maila kēlā, “He ʻoiaʻiʻo, e hoʻi hou mai ana au i kēia manawa o kēlā makahiki, aia hoʻi, e loaʻa uaneʻi iā Sara he keiki kāne.” A lohe aʻela ʻo Sara ma ka puka o ka halelewa ma kona kua.

¹¹ A ʻo ʻAberahama lāua ʻo Sara, ua kahiko nō lāua, he nui ko lāua mau lā; a ua pau iā Sara ka mea a nā wāhine.

¹² No laila, ʻakaʻaka ihola ʻo Sara i loko iho ona, ʻī ihola, “E ʻoliʻoli nō anei au ma hope o kuʻu wā luahine, a ua ʻelemakule hoʻi kuʻu haku?”

¹³ Nīnau maila ʻo Iēhova iā ʻAberahama, “No ke aha lā i ʻakaʻaka ai ʻo Sara, i ka ʻī ʻana, ‘He ʻoiaʻiʻo anei, e hānau nō wau i keiki i kuʻu wā luahine?’

¹⁴ “E hākālia anei kekahi mea iā Iēhova? I ka wā i ʻōlelo ʻia ai e hoʻi hou mai ana au i ou lā, i kēia manawa o kēlā makahiki, a e loaʻa iā Sara he keiki kāne.”

¹⁵ A laila hōʻole akula ʻo Sara, ʻī akula, “ʻAʻole au i ʻakaʻaka”; no ka mea, makaʻu ihola ia. ʻĪ maila kēlā, “ʻAʻole, ua ʻakaʻaka nō ʻoe.”

¹⁶ ¶ Kū aʻela ua mau kānaka lā, nānā akula ma Sodoma; a hele pū ʻo ʻAberahama me lākou e hoʻokuʻu aku iā lākou.

¹⁷ ʻĪ aʻela ʻo Iēhova, “E hūnā anei au iā ʻAberahama i kaʻu mea e hana nei;

¹⁸ no ka mea, e lilo ʻiʻo nō auaneʻi ʻo ʻAberahama i lāhui kanaka nui a ikaika hoʻi, a e pōmaikaʻi hoʻi nā lāhui kanaka a pau o ka honua iā ia?

¹⁹ “No ka mea, ke ʻike nei au iā ia, e kauoha aku nō ia i kāna poʻe keiki a me kona mau ʻōhua ma hope ona, i mālama mai ai lākou i ka ʻaoʻao o Iēhova, a e hana lākou ma ka pono a me ka pololei; i hoʻoili aku ai ʻo Iēhova ma luna o ʻAberahama i ka mea āna i ʻōlelo ai nona.”

²⁰ ʻŌlelo maila ʻo Iēhova, “Ua nui loa ka leo no Sodoma a me Gomora, ua kaumaha nō hoʻi ko lākou hewa,

²¹ e iho ana au i laila e ʻike, i like paha kā lākou hana ʻana me ka leo no ia wahi i hiki mai ai i oʻu nei; a i ʻole paha, e ʻike auaneʻi hoʻi au.”

²² ¶ Huli aʻela ua mau kānaka lā i nā maka o lāua mai laila aku, a hele akula i Sodoma; akā, kū ihola ʻo ʻAberahama i mua o Iēhova.

²³ Neʻeneʻe akula ʻo ʻAberahama a kokoke, ʻī akula, “E luku pū anei ʻoe i ka poʻe pono me ka poʻe hewa?

²⁴ “Inā paha he kanalima nā kānaka pono ma loko o ua kūlanakauhale lā, e luku anei ʻoe ia wahi, ʻaʻole nō e mālama ia wahi no ka poʻe pono he kanalima ma loko?

²⁵ “ʻAʻole loa ʻoe e hana pēlā, ke pepehi pū i ka poʻe pono me ka poʻe hewa, i like pū ai ka poʻe pono me ka poʻe hewa, ʻaʻole loa ʻoe pēlā! ʻAʻole anei e hana pono ka luna kānāwai o ka honua a pau?”

²⁶ ʻĪ maila ʻo Iēhova, “Inā loaʻa iaʻu ma Sodoma nā kānaka pono he kanalima ma loko o ke kūlanakauhale, a laila au e mālama ai ia wahi a pau no lākou.”

²⁷ ʻŌlelo akula ʻo ʻAberahama, ʻī akula, “Eia hoʻi, ua hoʻomaka nō wau e ʻōlelo aku i ka Haku, ʻo wau he lepo wale nō, a me ka lehu.

²⁸ “A i emi mai nā mea ʻelima o ka poʻe pono he kanalima; e luku anei ʻoe ia kūlanakauhale a pau no ia mau mea ʻelima?” ʻĪ maila kēlā, “A i loaʻa iaʻu i laila he kanahā a me kumamālima, ʻaʻole au e luku aku.”

²⁹ ʻŌlelo hou akula ʻo ia iā ia, ʻī akula, “Inā paha he kanahā ka poʻe i loaʻa i laila?” ʻĪ maila kēlā, “ʻAʻole au e hana aku ia mea, ke kanahā lākou.”

³⁰ ʻĪ akula hoʻi ʻo ia, “ʻEā, a i huhū ʻole mai ka Haku, e ʻōlelo aku nō au; inā paha he kanakolu ka poʻe i loaʻa i laila?” ʻĪ maila kēlā, “ʻAʻole au e hana ia mea, ke loaʻa iaʻu he kanakolu i laila.”

³¹ ʻĪ akula ʻo ia, “Aia hoʻi, ua hoʻomaka iho nei au e ʻōlelo aku i ka Haku; inā paha he iwakālua ka poʻe i loaʻa i laila?” ʻĪ maila kēlā, “ʻAʻole au e luku aku, ka iwakālua lākou.”

³² ʻĪ akula hoʻi ʻo ia, “A i ʻole e huhū mai ka Haku, a hoʻokahi wale nō aʻu ʻōlelo e koe; inā paha he ʻumi ka poʻe i loaʻa i laila?” ʻĪ maila kēlā, “ʻAʻole au e luku aku, ka ʻumi lākou.”

³³ A pau aʻela kā Iēhova kamaʻilio ʻana me ʻAberahama, hele akula ʻo Iēhova; a hoʻi hou maila ʻo ʻAberahama i kona wahi.