KA BUKE MUA A MOSE, I KAPA ʻIA KINOHI 17 - Ka Baibala Hemolele

1 ʻŌlelo hou ke Akua i ka berita me ʻAberama. 5 Lilo kona inoa i ʻAberahama. 10 Ke ʻoki poepoe. 15 Kapa hou ʻia Sarai ʻo Sara. 16 He ʻōlelo no ʻIsaʻaka. 18 Kā ʻAberahama pule no ʻIsemaʻela. 23 ʻOki poepoe ʻia ʻo ʻAberahama a me ko kona hale.

MOKUNA XVII.

¹ ¶ I ke kanaiwakumamāiwa o nā makahiki o ʻAberama, ʻikea maila ʻo Iēhova e ʻAberama, ʻī maila iā ia, “ʻO wau nō ke Akua Mana; E hele ʻoe i mua o koʻu alo, a e hemolele ʻoe.

² “A e hoʻopaʻa auaneʻi au i kaʻu berita ma waena oʻu a ou; A e hoʻomāhuahua aku au iā ʻoe a nui loa.”

³ Moe ihola ʻo ʻAberama i lalo kona alo, a kamaʻilio maila ke Akua me ia, ʻī maila,

⁴ “ʻO wau nō, ʻeā, aia hoʻi me ʻoe kaʻu berita, A e lilo auaneʻi ʻoe i kupuna no nā lāhui kanaka he nui loa.

⁵ “ʻAʻole ʻoe e hea hou ʻia, ʻo ʻAberama, Akā, ʻo ʻAberahama kou inoa; No ka mea, ua hoʻolilo aku nō au iā ʻoe i kupuna no nā lāhui kanaka he nui loa.

⁶ “A e hoʻolilo nō wau iā ʻoe i mea hoʻohua nui loa, e hoʻopuka auaneʻi au i nā lāhui kanaka mai loko aku ou, a e puka mai nō hoʻi nā aliʻi nui mai loko aku ou.

⁷ “A e hoʻopaʻa nō hoʻi au i kaʻu berita ma waena oʻu a ou, a me kāu poʻe mamo ma hope ou ma nā hanauna o lākou, i berita mau loa, i Akua nō au nou, a no kāu poʻe mamo ma hope ou.

⁸ “A e hāʻawi aku nō au i ka ʻāina āu e noho malihini nei, i ka ʻāina a pau o Kanaʻana, nou, a no kāu poʻe mamo ma hope ou, i wahi e noho mau ai; a ʻo wau hoʻi ko lākou Akua.”

⁹ ¶ ʻŌlelo maila ke Akua iā ʻAberahama, “No laila, e mālama ʻoe i kaʻu berita, ʻo ʻoe a me kāu poʻe mamo ma hope ou, ma nā hanauna o lākou.

¹⁰ “Eia kaʻu berita e mālama ai ʻoukou ma waena oʻu a ʻo ʻoukou, a me kāu poʻe mamo ma hope ou; e ʻoki poepoe ʻia nā keiki kāne a pau o ʻoukou.

¹¹ “E ʻoki poepoe ʻoukou i ka ʻiʻo o ko ʻoukou ʻōmaka; ʻo ka hōʻailona ia o ka berita ma waena oʻu a ʻo ʻoukou.

¹² “I ka pō ʻawalu o kona ola ʻana, e ʻoki poepoe ʻia nā keiki kāne a pau o nā hanauna o ʻoukou; ʻo ka mea i hānau ma kou wahi, a me ka mea i kūʻai ʻia i ke kālā na ke kanaka ʻē mai, ka mea ʻaʻole nāu i hua mai.

¹³ “ʻO ka mea i hānau ma kou wahi, a me ka mea i kūʻai ʻia i kou kālā, he pono nō e ʻoki poepoe ʻia ʻo ia; a e pili auaneʻi kaʻu berita ma ko ʻoukou ʻiʻo i berita mau loa.

¹⁴ “A ʻo ke keiki kāne ʻoki poepoe ʻole ʻia, ke ʻoki poepoe ʻole ʻia ka ʻiʻo o kona ʻōmaka, e hōʻoki ʻia aku ia kanaka mai kona hanauna aku; ua haʻihaʻi ʻo ia i kaʻu berita.”

¹⁵ ¶ ʻŌlelo maila ke Akua iā ʻAberahama, “A ʻo Sarai ʻo kāu wahine, ʻaʻole ʻoe e kāhea hou aku i kona inoa, ʻo Sarai, e kapa ʻia ʻo ia, ʻo Sara.

¹⁶ “E hoʻopōmaikaʻi aku hoʻi au iā ia, a e hāʻawi aku hoʻi au iā ʻoe, i keiki kāne nāna mai ʻo ia; a hoʻopōmaikaʻi nō au iā ia, nāna mai nā lāhui kanaka; a nāna mai nō hoʻi nā aliʻi o kānaka.”

¹⁷ A laila, moe ihola ʻo ʻAberahama i lalo kona maka, ʻakaʻaka ihola, a ʻī ihola i loko o kona naʻau, “E hānau ʻia anei ke keiki na ka mea nona nā makahiki he haneri? E hānau mai nō anei ʻo Sara, nona nā makahiki he kanaiwa?”

¹⁸ ʻĪ akula ʻo ʻAberahama i ke Akua, “Inā nō ʻo ʻIsemaʻela e ola i mua ou!”

¹⁹ ʻĪ maila ke Akua, “He ʻoiaʻiʻo, na Sara e hānau ke keiki kāne nāu, a e kapa aku ʻoe i kona inoa ʻo ʻIsaʻaka; a e hoʻopaʻa auaneʻi au i kaʻu berita me ia, a me kāna poʻe mamo ma hope ona, i berita mau loa.

²⁰ “A ʻo ʻIsemaʻela, ua hoʻolohe hoʻi au iā ʻoe nona. Aia hoʻi, ua hoʻopōmaikaʻi nō au iā ia, a e hoʻohua auaneʻi au i nā keiki nāna, a e hoʻomāhuahua nō hoʻi au iā ia; e hānau nāna nā aliʻi he ʻumikumamālua, a e hoʻolilo hoʻi au iā ia i lāhui kanaka nui.

²¹ “Akā, e hoʻopaʻa auaneʻi au i kuʻu berita iā ʻIsaʻaka, i ka mea a Sara e hānau mai ai nāu, i kēia manawa o kēlā makahiki aku.”

²² ¶ A oki ihola kāna kamaʻilio ʻana me ia, hoʻi akula ke Akua i luna mai o ʻAberahama aku.

²³ Lālau akula ʻo ʻAberahama i kāna keiki iā ʻIsemaʻela, a me nā mea a pau i hānau ma kona hale, a me nā mea a pau i kūʻai ʻia i kāna kālā, i nā kāne a pau o ko ʻAberahama mau ʻōhua, a ʻoki poepoe ihola i ka ʻiʻo o ko lākou ʻōmaka ia lā hoʻokahi nō, e like me kā ke Akua i ʻōlelo mai ai iā ia.

²⁴ He kanaiwa nā makahiki a me kumamāiwa o ko ʻAberahama ola ʻana, iā ia i ʻoki poepoe ʻia ai ma ka ʻiʻo o kona ʻōmaka.

²⁵ He ʻumikumamākolu nā makahiki o ʻIsemaʻela, iā ia i ʻoki poepoe ʻia ai ma ka ʻiʻo o kona ʻōmaka.

²⁶ Ia lā hoʻokahi nō, i ʻoki poepoe ʻia ai ʻo ʻAberahama, a me kāna keiki ʻo ʻIsemaʻela.

²⁷ Ua ʻoki poepoe pū ʻia me ia nā kānaka a pau o kona mau ʻōhua, i hānau ma kona hale, a i kūʻai ʻia i kona kālā na ke kanaka ʻē mai.