KA BUKE MUA A MOSE, I KAPA ʻIA KINOHI 16 - Ka Baibala Hemolele

1 Hāʻawi ʻo Sarai iā Hagara i wahine na ʻAberama. 4 Kona hoʻowahāwahā iā Sarai, a me ka mahuka. 7 Hoʻihoʻi mai ka ʻānela iā ia. 11 Kā ka ʻānela ʻōlelo no kāna keiki. 15 Hānau ʻia ʻo ʻIsemaʻela.

MOKUNA XVI.

¹ ¶ ʻO Sarai ka wahine a ʻAberama, ʻaʻole ia i hānau keiki nāna; a iā ia kekahi kauā wahine no ʻAigupita, ʻo Hagara kona inoa.

² ʻĪ maila ʻo Sarai iā ʻAberama, “Aia hoʻi, ua pā wau iā Iēhova; ke nonoi aku nei au iā ʻoe, e komo aʻe ʻoe i loko i kaʻu kauā wahine, i loaʻa paha iaʻu nā keiki ma ona lā.” Hoʻolohe akula ʻo ʻAberama i ka leo o Sarai.

³ Lālau akula ʻo Sarai ʻo ka wahine a ʻAberama iā Hagara i kāna kauā wahine no ʻAigupita, i ka ʻumi o ka makahiki a ʻAberama i noho ai ma ka ʻāina ʻo Kanaʻana, a hāʻawi maila iā ia i wahine na kāna kāne na ʻAberama.

⁴ Komo akula ia i loko i o Hagara lā, a kō aʻela ia; a ʻike ihola ia ua kō, ua hoʻowahāwahā ʻia kona haku wahine i mua o kona maka.

⁵ ʻĪ maila ʻo Sarai iā ʻAberama, “I luna iho ou koʻu hōʻino ʻia; ua hāʻawi aku au i kaʻu kauā wahine i loko o kou poli; a ʻike ihola ia, ua kō ʻo ia, hoʻowahāwahā ʻia nō au e ia; e hoʻoponopono mai ʻo Iēhova ma waena o kāua.”

⁶ ʻĪ akula ʻo ʻAberama iā Sarai, “Aia hoʻi, i loko nō o kou lima kāu kauā wahine, e hana aku ʻoe iā ia e like me kou makemake.” A hoʻopilikia akula ʻo Sarai iā ia, mahuka akula ia mai kona alo aku.

⁷ ¶ A loaʻa ʻo ia i ka ʻānela o Iēhova ma ka pūnāwai i loko o ka wao nahele, ma ka pūnāwai o ke alanui e hele ai i Sura.

⁸ ʻĪ maila ia, “E Hagara, e ke kauā wahine a Sarai, no hea mai ʻoe? E hele ana hoʻi ʻoe i hea?” ʻĪ akula kēlā, “Ke mahuka aku nei au mai ke alo o koʻu haku wahine, mai o Sarai aku.”

⁹ ʻŌlelo maila ka ʻānela o Iēhova iā ia, “E hoʻi hou ʻoe i kou haku wahine, a e noho iho ʻoe ma lalo o kona mau lima.”

¹⁰ ʻĪ maila hoʻi ka ʻānela o Iēhova iā ia, “E hoʻonui loa nō wau i kāu poʻe mamo, ʻaʻole lākou e hiki ke helu ʻia no ka lehulehu.”

¹¹ ʻĪ maila hoʻi ka ʻānela o Iēhova iā ia, “Aia hoʻi, ua hāpai ʻoe, A e hānau mai nō ʻoe i keiki kāne, A e kapa ʻoe i kona inoa ʻo ʻIsemaʻela; No ka mea, ua lohe nō ʻo Iēhova i kou pōpilikia.

¹² “E lilo auaneʻi ia i kanaka hihiu, E kūʻē aku nō kona lima i nā kānaka a pau, A e kūʻē mai nō hoʻi ka lima o nā kānaka a pau iā ia. A e noho auaneʻi nō ia ma ke alo o kona poʻe hoahānau a pau.”

¹³ Kapa akula ia i ka inoa ʻo Iēhova nāna i ʻōlelo mai iā ia, “ʻO ʻoe e ke Akua ka mea i ʻike mai iaʻu”; no ka mea, ʻī ihola ia, “Ua ʻimi aku nō anei au i ka Mea ʻike mai iaʻu?”

¹⁴ No laila, ua kapa ʻia ua pūnāwai lā, ʻo Beʻera Lahai Roi; aia nō ia ma waena o Kadesa a ʻo Bereda.

¹⁵ ¶ Hānau maila ʻo Hagara i keiki kāne na ʻAberama; kapa akula ʻo ʻAberama i ka inoa o kāna keiki a Hagara i hānau ai, ʻo ʻIsemaʻela.

¹⁶ He kanawalukumamāono nā makahiki o ʻAberama, i ka wā a Hagara i hānau ai iā ʻIsemaʻela na ʻAberama.