KA BUKE MUA A MOSE, I KAPA ʻIA KINOHI 15 - Ka Baibala Hemolele

1 ʻŌlelo hoʻohoihoi a ke Akua iā ʻAberama. 2 ʻAʻohe āna keiki. 4 Ka ʻōlelo i keiki a me ka poʻe mamo. 6 Hoʻāpono ʻia ʻo ʻAberama ma ka manaʻoʻiʻo. 7 ʻŌlelo hou ke Akua i ka hāʻawi i ka ʻāina, iā Kanaʻana nona. 9 Kā ʻAberama mōhai. 12 Kona hihiʻo. 13 E hele kāna poʻe mamo i ʻAigupita. 18 Ka berita a ke Akua me ia.

MOKUNA XV.

¹ ¶ Ma hope mai o ia mau mea, hiki maila ka ʻōlelo a Iēhova iā ʻAberama ma ka hihiʻo, ʻī maila, “Mai makaʻu ʻoe, e ʻAberama, ʻo wau nō kou pale kaua a me kāu uku nui loa.”

² ʻĪ akula ʻo ʻAberama, “E ka Haku, e Iēhova ē, he aha kāu mea e hāʻawi mai ai iaʻu; no ka mea, ke hele keiki ʻole nei au, a ʻo ka puʻukū o kuʻu hale, ʻo ia ʻo ʻEliezera no Damaseko?”

³ ʻĪ akula ʻo ʻAberama, “Aia hoʻi, ʻaʻole ʻoe i hāʻawi mai i keiki naʻu; a ʻo kekahi i hānau i loko o koʻu hale, ʻo ia kuʻu hoʻoilina.”

⁴ Aia hoʻi, hiki maila ka ʻōlelo a Iēhova iā ia, i ka ʻī ʻana mai, “ʻAʻole kēia o kou hoʻoilina; akā, ʻo ka mea e hele mai ana mai loko mai ou iho, ʻo kou hoʻoilina ia.”

⁵ Kaʻi akula ʻo ia iā ia ma waho, ʻī maila, “E nānā aku ʻoe i luna i ka lani, e helu i nā hōkū, inā e hiki iā ʻoe ke helu.” ʻĪ maila kēlā iā ia, “Pēlā auaneʻi kāu poʻe mamo.”

⁶ Manaʻoʻiʻo akula ʻo ia iā Iēhova, a hoʻoili maila ʻo ia ia mea i pono nona.

⁷ ʻĪ maila kēlā iā ia, “ʻO wau nō Iēhova nāna ʻoe i lawe mai nei, mai ʻUra o ko Kaledea mai, e hāʻawi aku nou i kēia ʻāina i wahi e noho ai.”

⁸ ʻĪ akula ia, “E ka Haku, e Iēhova ē, pehea lā au e ʻike ai, e ili mai ana kēia ʻāina noʻu?”

⁹ ʻĪ maila kēlā iā ia, “E lālau ʻoe naʻu i bipi wahine ʻakolu makahiki ona, i kao wahine ʻakolu makahiki ona, i hipa kāne ʻakolu ona makahiki, i manu kuhukukū, a me ka nūnū ʻōpiopio.”

¹⁰ Lawe maila ʻo ia ia mau mea a pau i ona lā, a mahele aʻela iā lākou ma waena, a waiho ihola i kēlā ʻāpana i kēia ʻāpana e kū pono aku i kona hoa; akā, ʻaʻole ia i mahele i nā manu.

¹¹ A lele maila nā manu ma luna iho o nā mōhai, hoʻopuehu akula ʻo ʻAberama iā lākou.

¹² ¶ A i ka napoʻo ʻana o ka lā, ua paʻuhia ʻo ʻAberama i ka hiamoe nui; aia hoʻi, kau maila ka weliweli a me ka pouli nui ma luna iho ona.

¹³ ʻŌlelo maila ia iā ʻAberama, “E ʻike pono ʻoe, e lilo ana kāu poʻe mamo i malihini ma ka ʻāina ʻē ʻaʻole no lākou, a e hoʻokauā aku na lākou; a e hōʻino ʻia mai lākou e kēlā poʻe i nā haneri makahiki ʻehā.

¹⁴ “A ʻo ua lāhui kanaka lā nāna lākou e hoʻoluhi mai, naʻu lākou e hoʻohewa aku; a ma hope iho, e puka mai lākou i waho me ka waiwai nui.

¹⁵ “E hui ʻia aku ʻoe i ou mau mākua me ka malu; a e kanu ʻia ʻoe i ka wā ʻelemakule maikaʻi.

¹⁶ “Akā, e hoʻi hou mai nō lākou i ʻaneʻi i ka hā o ka hanauna; no ka mea, ʻaʻole i lawa ka hewa o kā ʻAmora i nei manawa.”

¹⁷ A napoʻo ihola ka lā, a pōʻeleʻele ihola, aia hoʻi, neʻe aʻela ka umu ahi e pūnohu ana a me ke kukui e ʻā ana ma waena o ua mau ʻāpana lā.

¹⁸ Ia lā nō, hoʻopaʻa ihola ʻo ia i berita me ʻAberama, i ka ʻī ʻana mai, “Ua hāʻawi aku nō wau i kēia ʻāina no kāu poʻe mamo, Mai ka muliwai o ʻAigupita a hiki aku i ka muliwai nui, ka muliwai ʻo ʻEuperate:

¹⁹ i kā Kena, i kā Keniza, i kā Kademona,

²⁰ i kā Heta, i kā Pereza, me kā Repaima,

²¹ i kā ʻAmora, i kā Kanaʻana, i kā Giregasa, a me kā Iebusa.”