KA BUKE MUA A MOSE, I KAPA ʻIA KINOHI 13 - Ka Baibala Hemolele

1 Ka hoʻi ʻana mai o ʻAberama lāua ʻo Lota mai ʻAigupita mai. 6 Ko lāua hoʻokaʻawale ʻana. 10 Ko Lota hele i Sodoma. 14 ʻŌlelo hou ke Akua iā ʻAberama i ka ʻāina a me kāna poʻe mamo. 18 Kona noho ʻana ma Heberona.

MOKUNA XIII.

¹ ¶ Piʻi hou maila ʻo ʻAberama mai ʻAigupita mai, ʻo ia me kāna wahine, a me kāna mau mea a pau, a me ia nō ʻo Lota, i kauahi o ke Kūkulu Hema.

² Ua waiwai nui loa ʻo ʻAberama i nā holoholona, i ke kālā a me ke gula.

³ Hele aʻela ia i kona hele ʻana mai ke Kūkulu Hema mai a Betela, kahi i kū ai ʻo kona halelewa ma mua, ma waena o Betela a me ʻAi;

⁴ kahi o ke kuahu āna i hana ai ma mua; i laila ʻo ʻAberama i kāhea aku ai i ka inoa ʻo Iēhova.

⁵ A ʻo Lota hoʻi, ka mea i hele pū me ʻAberama, he hipa nō kāna me nā bipi a me nā halelewa.

⁶ ʻAʻole i pono ka ʻāina no lāua, i noho pū ai lāua, no ka nui o ko lāua waiwai, ʻaʻole i hiki iā lāua ke noho pū.

⁷ Hakakā aʻela ka poʻe kahu bipi a ʻAberama me ka poʻe kahu bipi a Lota; e noho ana nō kā Kanaʻana a me kā Pereza ma ia ʻāina ia manawa.

⁸ ʻĪ akula ʻo ʻAberama iā Lota, “ʻEā, ʻaʻole make hakakā kāua, kekahi i kekahi, ʻaʻole hoʻi kaʻu poʻe kahu bipi me kāu poʻe kahu bipi; no ka mea, he mau hoahānau kāua.

⁹ “ʻAʻole anei ma kou alo ka ʻāina a pau? Ke noi aku nei au iā ʻoe, e hoʻokaʻawale kāua; inā ʻoe ma ka lima hema, a laila e hele au ma ka lima ʻākau; a ma ka lima ʻākau ʻoe, a laila e hele au ma ka lima hema.”

¹⁰ ʻAlawa aʻela ko Lota mau maka, ʻike akula i nā wahi pāpū ʻo Ioredane, he nui ka wai ma ia wahi a pau i kou hele ʻana mai i Zoara, ma mua o ko Iēhova luku ʻana iā Sodoma a me Gomora, e like me ka mahina ʻai o Iēhova, a e like me ka ʻāina i ʻAigupita.

¹¹ A laila, wae ihola ʻo Lota i ka pāpū a pau o Ioredane; a hele akula ʻo Lota ma ka hikina; a hoʻokaʻawale aʻela lāua i ke kekahi me kekahi.

¹² Noho ihola ʻo ʻAberama ma ka ʻāina i Kanaʻana, a noho akula ʻo Lota ma nā kūlanakauhale o ua pāpū lā, a kūkulu ihola i kona halelewa ma Sodoma.

¹³ A ʻo nā kānaka o Sodoma, he poʻe hewa lākou, he lawehala loa i mua o Iēhova.

¹⁴ ¶ ʻŌlelo maila ʻo Iēhova iā ʻAberama ma hope mai o ko Lota hoʻokaʻawale ʻana aʻe mai ona aku lā, “E ʻalawa aʻe ʻoe i kou mau maka, a e nānā aku mai kou wahi e noho nei, i ke kūkulu ʻākau a i ke kūkulu hema, a i ka hikina hoʻi a i ke komohana;

¹⁵ no ka mea, ʻo ka ʻāina a pau āu e ʻike nei, naʻu ia e hāʻawi aku nou, a no kāu poʻe mamo ma hope mau loa aku.

¹⁶ “E hoʻomāhuahua aku nō wau i kāu poʻe mamo e like me ka lepo o ka honua, inā e hiki i ke kanaka ke helu i nā huna lepo o ka honua, a laila e helu ʻia kāu poʻe mamo.

¹⁷ “E kū aʻe, e kaʻahele i ka ʻāina ma kona loa a ma kona laulā; no ka mea, naʻu nō ia e hāʻawi aku nou.”

¹⁸ A laila lawe aʻela ʻo ʻAberama i kona halelewa, hele akula ia a noho ihola ma nā lāʻau ʻoka no Mamere, aia nō ma Heberona, a hana ihola ia i laila i kuahu no Iēhova.