KA BUKE MUA A MOSE, I KAPA ʻIA KINOHI 12 - Ka Baibala Hemolele

1 Kā ke Akua hoʻomaikaʻi ʻana iā ʻAberama a me ka ʻōlelo iā Kristo. 5 Ka hele o lākou me Lota i Sikema ma Kanaʻana. 7 Hāʻawi ʻia Kanaʻana nona. 10 Kona hele i ʻAigupita, a me kona wahaheʻe ʻana. 14 Lawe Paraʻo iā Sarai, a ma hope hoʻihoʻi mai iā ia.

MOKUNA XII.

¹ ¶ I ʻōlelo mai ʻo Iēhova iā ʻAberama: “E hele aku ʻoe mai kou ʻāina aku, A mai kou poʻe hoahānau aku, A mai ka hale o kou makua kāne aku, A hiki i ka ʻāina aʻu e kuhikuhi aku ai iā ʻoe.

² “A e hoʻolilo au iā ʻoe i lāhui kanaka nui, E hoʻomaikaʻi aku hoʻi au iā ʻoe, E hoʻokaulana hoʻi au i kou inoa, A e lilo ʻoe i mea e pōmaikaʻi ai.

³ “E hoʻopōmaikaʻi aku hoʻi au i ka poʻe hoʻomaikaʻi iā ʻoe, A e hōʻino aku au i ka mea hōʻino iā ʻoe, A iā ʻoe e pōmaikaʻi ai nā ʻohana a pau o ka honua.”

⁴ Hele akula ʻo ʻAberama e like me kā Iēhova i ʻōlelo mai ai iā ia; a hele pū ʻo Lota me ia. He kanahikukumamālima nā makahiki o ʻAberama, i kona wā i hele mai ai mai Harana mai.

⁵ Lawe aʻela ʻo ʻAberama i kāna wahine iā Sarai, a me Lota ke keiki a kona kaikuaʻana, a me ka waiwai a pau a lākou i hōʻiliʻili ai, a me nā ʻōhua a pau i loaʻa iā lākou ma Harana; a puka maila lākou e hele mai i ka ʻāina ʻo Kanaʻana; a hiki maila lākou i ka ʻāina ʻo Kanaʻana.

⁶ Kaʻahele aʻela ʻo ʻAberama i ka ʻāina, a hiki akula i kahi o Sekema, i ka lāʻau ʻoka o More. E noho ana nō nā mamo a Kanaʻana ma ia ʻāina ia manawa.

⁷ ʻIkea aʻela ʻo Iēhova e ʻAberama, ʻī maila ia, “E hāʻawi aku nō wau i kēia ʻāina no kāu poʻe mamo.” Ma laila ʻo ia i hana ai i kuahu no Iēhova, ka mea i ʻikea e ia.

⁸ Hele akula ia mai ia wahi aku a ka puʻu ma ka hikina o Betela, a kūkulu ihola i kona halelewa, ʻo Betela ma ke komohana, a ʻo ʻAi ma ka hikina; ma laila ʻo ia i hana ai i kuahu no Iēhova, a hea akula ia i ka inoa ʻo Iēhova.

⁹ Hele hou akula ʻo ʻAberama e neʻeneʻe ana i ke Kūkulu Hema.

¹⁰ ¶ He wī ma ia ʻāina; a hele akula ʻo ʻAberama i lalo i ʻAigupita e noho malihini ma laila; no ka mea, ua nui loa ka wī ma ka ʻāina.

¹¹ A kokoke akula ia e komo i ʻAigupita, ʻī akula ia i kāna wahine iā Sarai, “Eia hoʻi ke ʻike nei au he wahine maikaʻi ʻoe ke nānā ʻia aku.

¹² “No laila, a ʻike mai ko ʻAigupita iā ʻoe, e ʻōlelo auaneʻi lākou, ʻEia kāna wahine’; a e pepehi mai lākou iaʻu, a e hoʻōla aʻe lākou iā ʻoe.

¹³ “Ke nonoi aku nei au iā ʻoe, e ʻī aku ʻoe, he kaikuahine ʻoe noʻu, i pōmaikaʻi ai au iā ʻoe, a e mālama ʻia kuʻu ola nou.”

¹⁴ A hiki akula ʻo ʻAberama i ʻAigupita, ʻike maila ko ʻAigupita i ka wahine he maikaʻi loa.

¹⁵ A ʻike maila nā luna a Paraʻo iā ia, hoʻomaikaʻi lākou iā ia i mua o Paraʻo, a ua lawe ʻia akula ua wahine lā ma ka hale o Paraʻo.

¹⁶ Lokomaikaʻi maila ʻo ia iā ʻAberama no Sarai; a iā ia nā hipa, nā bipi, nā hoki, nā kauā kāne, nā kauā wahine, nā hoki wahine, a me nā kāmelo.

¹⁷ Hoʻoʻeha maila ʻo Iēhova iā Paraʻo a me kona poʻe ʻōhua i nā maʻi ʻeha loa, no Sarai ka wahine a ʻAberama.

¹⁸ Kāhea maila ʻo Paraʻo iā ʻAberama, ʻī maila, “He aha kēia mea āu i hana mai ai iaʻu? No ke aha lā i haʻi ʻole mai ʻoe iaʻu ʻo kāu wahine ia?

¹⁹ “No ke aha lā ʻoe i ʻōlelo mai ai, ʻʻO koʻu kaikuahine ia,’ i mea e lawe ai au iā ia i wahine naʻu? Eia hoʻi kāu wahine, e lawe ʻoe iā ia, a e hele aku.”

²⁰ Kauoha akula ʻo Paraʻo i kona poʻe kānaka nona, a hoʻihoʻi maila lākou iā ia, me kāna wahine, a me kāna mau mea a pau.