KA BUKE MUA A MOSE, I KAPA ʻIA KINOHI 11 - Ka Baibala Hemolele

1 Hoʻokahi ʻōlelo ma ka honua. 3 Ka hale pākuʻi ʻo Babela. 7 Hoʻokāhuli ʻia kā lākou ʻōlelo. 10 Ke kūʻauhau no Sema. 27 No Tera hoʻi ka makua kāne o ʻAberama. 31 Ko Tera mā haele ʻana mai ʻUra a Harana.

MOKUNA XI.

¹ ¶ Hoʻokahi nō lehelehe, hoʻokahi hoʻi ʻōlelo a ko ka honua a pau.

² A i ko lākou hele ʻana mai ka hikina mai, loaʻa iā lākou kahi pāpū ma ka ʻāina ʻo Sinara; a noho ihola lākou i laila.

³ ʻŌlelo aʻela kekahi kanaka i kona hoa, “Inā kākou, e hana kākou i nā pōhaku ʻula, e kahu a moʻa loa.” ʻO ko lākou pōhaku, he pōhaku ʻula, a he bitumena ko lākou puna.

⁴ ʻŌlelo aʻela lākou, “Inā kākou, e hana kākou i kūlanakauhale no kākou, a me ka hale pākuʻi e kiʻekiʻe aʻe kona wēlau i ka lani; a e hoʻokaulana i ko kākou inoa, o hoʻopuehu ʻia aku kākou ma luna o ka honua a pau.”

⁵ Iho maila ʻo Iēhova i lalo e nānā i ke kūlanakauhale a me ka hale pākuʻi a nā keiki a kānaka i hana ai.

⁶ ʻĪ ihola ʻo Iēhova, “Aia hoʻi, hoʻokahi nō ka poʻe kānaka, hoʻokahi hoʻi ko lākou lehelehe; eia kā lākou e hoʻomaka nei e hana; a ma hope aku, ʻaʻohe mea keʻakeʻa iā lākou ke hana i nā mea a pau a lākou e manaʻo ai.

⁷ “Inā kākou, e iho iho kākou, a ma laila kākou e hoʻokāhuli ai i kā lākou ʻōlelo, i hoʻomaopopo ʻole ai lākou i ka ʻōlelo a kekahi.”

⁸ Pēlā ʻo Iēhova i hoʻopuehu aku ai iā lākou ma luna o ka honua a pau; a oki ihola kā lākou hana ʻana i ua kūlanakauhale lā.

⁹ No ia mea, ua kapa ʻia ka inoa o ia wahi, ʻo Babela; no ka mea, i laila ʻo Iēhova i hoʻokāhuli ai i ka ʻōlelo a ko ka honua a pau; a mai ia wahi aku i hoʻopuehu aku ai ʻo Iēhova iā lākou ma luna o ka honua a pau.

¹⁰ ¶ Eia ka moʻoʻōlelo no Sema: hoʻokahi haneri makahiki o Sema, a hānau mai ʻo ʻArepakada nāna, ʻelua makahiki ma hope mai o ke kai a Kahinaliʻi.

¹¹ Ma hope mai o ka hānau ʻana o ʻArepakada, ʻalima haneri nō makahiki o ko Sema ola ʻana, a nāna mai nā keiki kāne a me nā kaikamāhine.

¹² ¶ He kanakolu nā makahiki a me kumamālima o ko ʻArepakada ola ʻana, a hānau mai ʻo Sala nāna.

¹³ Ma hope mai o ka hānau ʻana o Sala, ʻahā haneri nā makahiki a me kumamākolu o ko ʻArepakada ola ʻana, a nāna mai nā keiki kāne a me nā kaikamāhine.

¹⁴ ¶ He kanakolu nā makahiki o ko Sala ola ʻana, a hānau mai ʻo ʻEbera nāna.

¹⁵ Ma hope mai o ka hānau ʻana o ʻEbera, ʻahā haneri nā makahiki me kumamākolu o ko Sala ola ʻana, a nāna mai nā keiki kāne a me nā kaikamāhine.

¹⁶ ¶ He kanakolu nā makahiki a me kumamāhā o ko ʻEbera ola ʻana, a hānau mai ʻo Pelega nāna.

¹⁷ Ma hope mai o ka hānau ʻana o Pelega, ʻahā haneri nā makahiki a me kanakolu o ko ʻEbera ola ʻana, a nāna mai nā keiki kāne a me nā kaikamāhine.

¹⁸ ¶ He kanakolu nā makahiki o ko Pelega ola ʻana, a hānau mai ʻo Reu nāna.

¹⁹ Ma hope mai o ko Reu hānau ʻana, ʻalua haneri nā makahiki a me kumamāiwa o ko Pelega ola ʻana, a nāna mai nā keiki kāne a me nā kaikamāhine.

²⁰ ¶ He kanakolu nā makahiki a me kumamālua o ko Reu ola ʻana, a hānau mai ʻo Seruga nāna.

²¹ ʻElua haneri nā makahiki a me kumamāhiku o ko Reu ola ʻana ma hope mai o ka hānau ʻana o Seruga, a nāna mai nā keiki kāne a me nā kaikamāhine.

²² ¶ He kanakolu nā makahiki o ko Seruga ola ʻana, a hānau mai ʻo Nahora nāna.

²³ Ma hope mai o ka hānau ʻana o Nahora, ʻelua haneri nā makahiki o ko Seruga ola ʻana, a nāna mai nā keiki kāne a me nā kaikamāhine.

²⁴ ¶ He iwakālua nā makahiki a me kumamāiwa o ko Nahora ola ʻana, a hānau mai ʻo Tera nāna.

²⁵ Ma hope mai o ka hānau ʻana o Tera, he haneri nā makahiki a me ka ʻumikumamāiwa o ko Nahora ola ʻana, a nāna mai nā keiki kāne a me nā kaikamāhine.

²⁶ ¶ He kanahiku nā makahiki o ko Tera ola ʻana, a hānau mai ʻo ʻAberama, ʻo Nahora, a ʻo Harana.

²⁷ ¶ Eia ka moʻoʻōlelo no Tera: na Tera ʻo ʻAberama, ʻo Nahora, a ʻo Harana; na Harana ʻo Lota.

²⁸ Make ihola ʻo Harana ma mua o kona makua kāne ʻo Tera, ma kona ʻāina i hānau ai, ma ʻUra no ko Kaledea.

²⁹ Lawe aʻela ʻo ʻAberama lāua ʻo Nahora i mau wāhine na lāua: ʻo Sarai ka inoa o ka wahine a ʻAberama; a ʻo Mileka ka inoa o ka wahine a Nahora, ʻo ia ke kaikamahine a Harana, a ka makua kāne o Mileka, a ʻo ka makua kāne hoʻi ʻo ʻIseka.

³⁰ A he pā ʻo Sarai; ʻaʻohe āna keiki.

³¹ Lawe aʻela ʻo Tera i kāna keiki iā ʻAberama, a me kāna moʻopuna iā Lota, ke keiki a Harana, a me Sarai kāna hūnōna wahine, ʻo ka wahine a kāna keiki a ʻAberama; a haele pū maila lākou mai ʻUra mai no ko Kaledea, i ka hele ʻana ma ka ʻāina ʻo Kanaʻana; hiki maila lākou i Harana, a noho ihola i laila.

³² ʻO nā lā o Tera, ʻelua ia haneri makahiki a me kumamālima; a make ihola ʻo Tera ma Harana.