KA BUKE MUA A MOSE, I KAPA ʻIA KINOHI 1 - Ka Baibala Hemolele

1 No kā ke Akua hana ʻana i ka lani a me ka honua, ke kanaka a me nā holoholona.

MOKUNA I.

¹ ¶ I kinohi hana ke Akua i ka lani a me ka honua.

² He ʻano ʻole ka honua, ua ʻōlohelohe; a ma luna nō o ka hohonu ka pouli. Hoʻopūnana ihola ka ʻUhane o ke Akua ma luna o ka wai.

³ ʻĪ ihola ke Akua, “I mālamalama,” a ua mālamalama aʻela.

⁴ Nānā aʻela ke Akua i ka mālamalama, ua maikaʻi; a hoʻokaʻawale aʻela ke Akua ma waena o ka mālamalama a me ka pouli.

⁵ Kapa maila ke Akua i ka mālamalama, he Ao, a kapa mai hoʻi ia i ka pouli, he Pō. A ʻo ke ahiahi a me ke kakahiaka, ʻo ka lā mua ia.

⁶ ¶ ʻĪ ihola ke Akua, “I aouli ma waena o nā wai, i mea hoʻokaʻawale i kekahi wai me kekahi wai.”

⁷ Hana ihola ke Akua i ke aouli; a hoʻokaʻawale aʻela ia i ka wai ma lalo o ke aouli, me ka wai ma luna o ke aouli; a pēlā ʻiʻo nō.

⁸ Kapa ihola ke Akua i ke aouli, he Lani. A ʻo ke ahiahi a me ke kakahiaka, ʻo ka lua ia o ka lā.

⁹ ¶ ʻĪ ihola ke Akua, “E hui pū nā wai ma lalo o ka lani i kahi hoʻokahi, i ʻikea ai kahi maloʻo”; a pēlā ʻiʻo nō.

¹⁰ Kapa ihola ke Akua i kahi maloʻo, he ʻĀina; a kapa ihola ʻo ia i nā wai i hui pū ʻia ai, ʻo nā Moana; a nānā aʻela ke Akua, ua maikaʻi.

¹¹ ʻĪ ihola ke Akua, “E hoʻoulu mai ka honua i ka mauʻu, a me ka lau nahele e hua ana i ka hua, a me ka lāʻau hua e hua ana hoʻi ma kona ʻano iho, i loko ona iho kona hua ma luna o ka honua”; a pēlā ʻiʻo nō.

¹² A hoʻoulu maila ka honua i ka mauʻu, a me ka lau nahele e hua ana i ka hua ma kona ʻano iho, a me ka lāʻau e hua ana i ka hua, i loko ona kona hua ma kona ʻano iho; nānā ihola hoʻi ke Akua, ua maikaʻi.

¹³ A ʻo ke ahiahi a me ke kakahiaka, ʻo ke kolu ia o ka lā.

¹⁴ ¶ ʻĪ ihola ke Akua, “I mau mālamalama i loko o ke aouli o ka lani, i mea hoʻokaʻawale i ke ao a me ka pō; i mau hōʻailona lākou no nā kau, a no nā lā, a me nā makahiki;

¹⁵ i mau kukui hoʻi lākou i loko o ke aouli o ka lani, e hoʻomālamalama mai ai i ka honua”; a pēlā ʻiʻo nō.

¹⁶ Hana ihola ke Akua i nā mālamalama nui ʻelua: ʻo ka mālamalama nui, e aliʻi ai ma luna o ke ao, a ʻo ka mālamalama ʻuʻuku iho, e aliʻi ai ma luna o ka pō, a me nā hōkū hoʻi.

¹⁷ Kau akula ke Akua ia mau mea ma ke aouli o ka lani, e hoʻomālamalama mai ai i ka honua,

¹⁸ E hoʻoaliʻi hoʻi ma luna o ke ao a me ka pō, a e hoʻokaʻawale aʻe i ka mālamalama a me ka pouli; a nānā ihola ke Akua, ua maikaʻi.

¹⁹ A ʻo ke ahiahi a me ke kakahiaka, ʻo ka hā ia o ka lā.

²⁰ ¶ ʻĪ ihola ke Akua, “E hoʻohua nui mai nā wai i nā mea ola e holo ana, a me nā manu e lele aʻe ma luna o ka honua, ma ka lewa ākea o ka lani.”

²¹ Hana ihola ke Akua i nā iʻa nui, a me nā mea ola a pau e holo ana, a ka wai i hoʻohua nui mai ai ma ko lākou ʻano iho a me nā mea ʻēheu hoʻi a pau ma ko lākou ʻano iho; a nānā ihola ke Akua, ua maikaʻi.

²² Hoʻomaikaʻi ihola ke Akua ia mau mea, ʻī ihola, “E hoʻohua aʻe ʻoukou e hoʻolaha nui hoʻi, a e hoʻopiha i nā wai o nā moana; a e hoʻolaha aʻe nā manu ma luna o ka honua.”

²³ ʻO ke kakahiaka a me ke ahiahi, ʻo ka lima ia o ka lā.

²⁴ ¶ ʻĪ ihola ke Akua, “E hoʻohua mai ka honua i ka mea ola ma kona ʻano iho, i ka holoholona laka, me ka mea kolo, a me ka holoholona hihiu ma kona ʻano iho”; a pēlā ʻiʻo nō.

²⁵ Hana ihola ke Akua i ka holoholona hihiu ma kona ʻano iho, me nā holoholona laka ma ko lākou ʻano iho, a me nā mea kolo a pau o ka honua ma ko lākou ʻano iho; a nānā ihola ke Akua, ua maikaʻi.

²⁶ ʻĪ ihola ke Akua, “E hana kākou i ke kanaka e kū iā kākou, ma ka like ʻana me kākou iho; a e hoʻoaliʻi iā ia ma luna o nā iʻa o ke kai, ma luna hoʻi o nā manu o ka lewa, ma luna hoʻi o nā holoholona laka, a ma luna hoʻi o ka honua a pau, a ma luna nō hoʻi o nā mea kolo a pau e kolo ana ma ka honua.”

²⁷ Hana ihola ke Akua i ke kanaka ma kona ʻano iho, ma ke ʻano o ke Akua ʻo ia i hana ai iā ia; hana maila ia i kāne a i wahine.

²⁸ Hoʻomaika‘i maila ke Akua iā lāua, ʻī maila hoʻi ke Akua iā lāua, “E hoʻohua aʻe ʻolua, e hoʻolaha hoʻi, e hoʻopiha i ka honua, a e lanakila ma luna, a e noho aliʻi ma luna o nā iʻa o ke kai, a me nā manu o ka lewa, a me nā mea a pau e kolo ana ma luna o ka honua.”

²⁹ ʻĪ maila ke Akua, “Aia hoʻi, ua hāʻawi aku au na ʻolua i nā lau nahele a pau e hua ana i ka hua ma luna o ka honua a pau, a me nā lāʻau a pau i loko ona ka hua o ka lāʻau e hua ana i ka hua; he mea ʻai ia na ʻolua.

³⁰ “A na ka poʻe holoholona a pau o ka honua, me nā manu a pau o ka lewa, a me nā mea a pau e kolo ana ma ka honua, nā mea e ola ana, na lākou ka nāhelehele a pau i mea ʻai”; a pēlā ʻiʻo nō.

³¹ Nānā ihola ke Akua i nā mea a pau āna i hana ai, aia hoʻi, ua maikaʻi wale nō. A ʻo ke ahiahi a me ke kakahiaka, ʻo ke ono ia o ka lā.