ʻO KA ʻEPISETOLE A PAULO KA LUNAʻŌLELO I KO GALATIA 5 - Ka Baibala Hemolele

1 Ua kauoha aku nō ia iā lākou, e kūpaʻa ma ka mea luhi ʻole, ʻaʻole hoʻi e mālama i ke ʻoki poepoe. 19 Nā hana o ke kino a me nā hua o ka ʻUhane.

MOKUNA V.

¹ ¶ No ia mea, e kūpaʻa ʻoukou i loko a ke ola a Kristo i hoʻōla mai ai iā kākou, ʻaʻole hoʻi e paʻa hou ʻoukou ma lalo o ka ʻauamo hoʻoluhi.

² ¶ Eia hoʻi, wau ʻo Paulo ke ʻī aku nei iā ʻoukou; a i ʻoki poepoe ʻia ʻoukou, ʻaʻole ʻoukou e pono iā Kristo.

³ Ke hōʻike hou aku nei au i kēlā mea i kēia mea i ʻoki poepoe ʻia, he ʻaiʻē kāna e mālama aku ai i ke Kānāwai a pau.

⁴ ʻOukou ka poʻe e ʻāpono ʻia ma ke kānāwai, ua hoʻokaʻawale ʻia ʻoukou mai o Kristo aku lā; ua hāʻule iho ʻoukou mai ka lokomaikaʻi aku.

⁵ Akā, ma ka ʻUhane mākou e kali nei i ka pono e lana ai ka naʻau ma ka manaʻoʻiʻo.

⁶ No ka mea, i loko o Kristo Iesū, ʻaʻole ke ʻoki poepoe ka mea e pono ai, ʻaʻole hoʻi ke ʻoki poepoe ʻole; akā, ʻo ka manaʻoʻiʻo e hana ana ma ke aloha.

⁷ Ua holo pono ʻoukou; na wai lā ʻoukou i keʻakeʻa, i hoʻolohe ʻole ai ʻoukou i ka ʻoiaʻiʻo?

⁸ ʻO ka Mea nāna ʻoukou i kāhea aku, ʻaʻole nona mai ia manaʻo.

⁹ ʻO kahi mea hū he ʻuʻuku, ke hoʻohū aʻela ia i ka pōpō palaoa a pau.

¹⁰ Ua maopopo kuʻu manaʻo iā ʻoukou ma ka Haku, ʻaʻole ʻoukou e manaʻo ma ka mea kūʻē; akā, ʻo ka mea nāna ʻoukou i hoʻopilikia aku, e uku ʻia ana ʻo ia.

¹¹ E nā hoahānau, inā paha wau e kauoha aku i ke ʻoki poepoe, no ke aha lā wau e hoʻomaʻau ʻia mai nei? Ua pau naʻe ka hihia o ke keʻa i laila.

¹² He pono i kuʻu manaʻo i hōʻoki ʻia aʻe ka poʻe hoʻokahuli iā ʻoukou.

¹³ ¶ E nā hoahānau, ua hea ʻia ʻoukou ma ka luhi ʻole; mai hoʻolilo naʻe ʻoukou i ua luhi ʻole lā i mea no ke kino; akā, ma ke aloha e mālama aku kekahi i kekahi.

¹⁴ No ka mea, ua mālama ʻia ke Kānāwai a pau ma ke kauoha hoʻokahi, ʻo ia hoʻi kēia, “«E aloha aku ʻoe i kou hoalauna e like me ʻoe iho».”

¹⁵ Akā, inā e ʻakiʻaki ʻoukou me ka hoʻopau i kekahi i kekahi; e ao o pau auaneʻi ʻoukou i kekahi i kekahi.

¹⁶ ¶ Ke ʻōlelo aku nei hoʻi au, e haele ʻoukou ma ko ka ʻUhane, ʻaʻole e hoʻokō ʻoukou i ke kuko hewa o ke kino.

¹⁷ No ka mea, ua kūʻē ke kuko o ke kino i ko ka ʻUhane, a ʻo ko ka ʻUhane i ko ke kino; a ua kūʻē ia mau mea i kekahi i kekahi, i hiki ʻole ai iā ʻoukou ke hana i nā mea a ʻoukou i makemake ai.

¹⁸ A i alakaʻi ʻia ʻoukou e ka ʻUhane, ʻaʻole nō ʻoukou ma lalo o ke Kānāwai.

¹⁹ A ua akāka aʻela nā hana o ke kino; ʻo ia ka moekolohe, ka hoʻokamakama, ka hoʻohaumia, ka makaleho,

²⁰ ka hoʻomana kiʻi, ka hoʻopiʻopiʻo, ka inaina, ka hakakā, ka ukiuki, ka huhū, ka hoʻopaʻapaʻa, ka mokuāhana, ka manaʻo kūʻē,

²¹ ka huāhuā, ka pepehi kanaka, ka ʻona ʻana, ka ʻuhaʻuha ʻana, a me nā mea like; nā mea aʻu e haʻi ʻē aku nei iā ʻoukou, me aʻu i haʻi ʻē aku ai ma mua, ʻo ka poʻe e hana i ua mau mea lā, ʻaʻole e hoʻoili ʻia no lākou ke aupuni o ke Akua.

²² Akā, ʻo ka hua na ka ʻUhane, ʻo ia ke aloha, ka ʻoliʻoli, ke kuʻikahi, ke ahonui, ka lokomaikaʻi, ka maikaʻi, ka manaʻoʻiʻo,

²³ ke akahai, ka pākiko; ʻaʻohe kānāwai pāpā mai ia mau mea.

²⁴ A ʻo ka poʻe no Kristo, ua kau aku lākou i ko ke kino, me nā manaʻo hewa, a me nā kuko hewa ma ke keʻa.

²⁵ ¶ A i noho kākou ma ko ka ʻUhane, e hele hoʻi kākou ma ko ka ʻUhane.

²⁶ Mai manaʻo kiʻekiʻe kākou, me ka hoʻonāukiuki aku i kekahi i kekahi, a me ka huāhuā i kekahi i kekahi.