ʻO KA ʻEPISETOLE A PAULO KA LUNAʻŌLELO I KO GALATIA 4 - Ka Baibala Hemolele

1 ʻO ka poʻe manaʻoʻiʻo, ua hoʻopakele ʻia aku lākou i ke Kānāwai, a ua lilo i poʻe keiki na ʻAberahama.

MOKUNA IV.

¹ ¶ Ke ʻōlelo aku nei hoʻi au, ʻo ka hoʻoilina i kona wā ʻōpiopio, ʻaʻole he ʻano ʻē kona i ko ke kauā; akā, nona ka waiwai a pau;

² aia nō ia ma lalo o nā kumu a me nā kahu, a hiki i ka manawa i hōʻike ʻia mai ai e ka makua.

³ Pēlā nō kākou i ko kākou wā kamaliʻi, ua hoʻoluhi ʻia e nā ʻoihana mua o ke ao nei.

⁴ Akā, i ka hiki ʻana mai o ka manawa maopopo, hoʻouna maila ke Akua i kāna Keiki, a ka wahine i hānau ai, i hānau ma lalo o ke Kānāwai.

⁵ E hoʻopakele aʻe i ka poʻe ma lalo o ke Kānāwai, i hoʻokama ʻia mai ai kākou he poʻe keiki.

⁶ No ka mea, no ko ʻoukou keiki ʻana, ua hoʻouna maila ke Akua i ka ʻUhane o kāna Keiki i loko o ko ʻoukou mau naʻau, e kāhea ana, “E ʻAba, ka Makua!”

⁷ No ia mea, ʻaʻole he kauā luhi ʻoe ma ia hope aku; akā, he keiki nō; inā he keiki, he hoʻoilina nō hoʻi na ke Akua ma o Kristo lā.

⁸ ¶ Akā, i ka manawa i ʻike ʻole ai ʻoukou i ke Akua, hoʻokauā akula ʻoukou na nā akua ʻoiaʻiʻo ʻole.

⁹ ʻĀnō hoʻi, ua ʻike ʻoukou i ke Akua, he ʻoiaʻiʻo ua ʻike ʻia mai e ke Akua, pehea lā hoʻi ʻoukou i huli hou aku ai i nā ʻoihana mua palupalu ʻilihune, i nā mea a ʻoukou i makemake hou ai e hoʻokauā aku na lākou?

¹⁰ Ke mālama nei ʻoukou i nā lā, a me nā mahina, i nā manawa a me nā makahiki.

¹¹ Ua hopohopo wau iā ʻoukou, o makehewa paha kuʻu hoʻoluhi ʻana no ʻoukou.

¹² ¶ E nā hoahānau, ke nonoi aku nei au iā ʻoukou, i like ʻoukou me aʻu; no ka mea, ua like hoʻi au me ʻoukou; ʻaʻole nō ʻoukou i hana ʻino iki mai iaʻu.

¹³ Ua ʻike nō ʻoukou me ka palupalu o ke kino i haʻi aku ai au i ka ʻeuanelio iā ʻoukou i kinohou.

¹⁴ ʻAʻole nō ʻoukou i hoʻowahāwahā mai i ka ʻino o kuʻu kino, ʻaʻole hoʻi ʻoukou i hoʻopailua mai; akā, ua hoʻokipa mai nō ʻoukou iaʻu me he ʻānela lā no ke Akua, me Kristo Iesū hoʻi.

¹⁵ He aha lā hoʻi ko ʻoukou pōmaikaʻi ʻana? No ka mea, ke hōʻike maka aku nei au no ʻoukou, inā he mea hiki ia, inā ua pōʻalo aʻe ʻoukou i ko ʻoukou mau maka a hāʻawi mai iaʻu.

¹⁶ Ua lilo anei au i ʻenemi no ʻoukou, i kuʻu haʻi ʻana aku i ka ʻoiaʻiʻo iā ʻoukou?

¹⁷ Ua hū mai ko lākou aloha iā ʻoukou, ʻaʻole naʻe ma ka pono; ke ake nei lākou e hoʻokaʻawale iā ʻoukou, i hū mai ko ʻoukou aloha iā lākou.

¹⁸ Akā, he mea pono nō ke hū aʻe a mau mai ke aloha i ka mea maikaʻi, ʻaʻole i ka wā wale nō e noho ai au me ʻoukou.

¹⁹ E kuʻu mau keiki liʻiliʻi, ka poʻe aʻu e haʻakōhi nei e hoʻohānau hou aku, a loaʻa mai ʻo Kristo i loko o ʻoukou,

²⁰ ke ake nei au e ʻike iā ʻoukou i nēia manawa, a e hoʻololi aʻe i kuʻu leo; no ka mea, ke haʻohaʻo nui nei au iā ʻoukou.

²¹ ¶ E haʻi mai ʻoukou iaʻu, e ka poʻe i makemake e noho ma lalo o ke kānāwai, ʻaʻole anei ʻoukou i lohe i ke kānāwai?

²² No ka mea, ua palapala ʻia, ʻelua a ʻAberahama keiki kāne; hoʻokahi na ke kauā wahine, hoʻokahi hoʻi na ka haku wahine.

²³ ʻO ka mea na ke kauā wahine, ua hānau ia ma ko ke kino; akā, ʻo ka mea na ka haku wahine, ma ka ʻōlelo hoʻopōmaikaʻi mai ʻo ia.

²⁴ ʻO kēia mau mea, he hōʻailona ia; ʻo lāua nō nā kauoha ʻelua; ʻo kekahi naʻe no ke kuahiwi no Sinai mai, e hānau ana i nā keiki kauā, ʻo ia ʻo Hagara.

²⁵ No ka mea, ʻo ua Hagara lā ʻo ia ke kuahiwi ʻo Sinai i ʻArabia; ua like hoʻi ia me Ierusalema i nēia manawa, a e hoʻoluhi ana ʻo ia me kāna poʻe keiki.

²⁶ Akā, ʻo ka Ierusalema ma luna ka haku wahine, ʻo ia ka makuahine o kākou a pau.

²⁷ No ka mea, ua palapala ʻia, “«E ʻoliʻoli ʻoe, e ka mea pā, i hānau ʻole i keiki; E pohā aku me ka hea nui, e ka mea i hānau keiki ʻole; No ka mea, he nui nā keiki a ka mea i haʻalele ʻia, He hapa kā ka mea kāne».”

²⁸ E nā hoahānau, he poʻe keiki nō hoʻi kākou ma ka ʻōlelo hoʻopōmaikaʻi mai e like me ʻIsaʻaka.

²⁹ E like ma mua, hoʻomaʻau akula ka mea i hānau ma ke kino i ka mea i hānau ma ka ʻUhane, pēlā nō hoʻi i nēia manawa.

³⁰ Akā, he aha kā ka Palapala Hemolele i ʻī mai ai? “«E hoʻokuke aku ʻoe i ua kauā wahine lā a me kāna keiki; No ka mea, ʻaʻole e hoʻoili pū ʻia aku ka waiwai i ke keiki a ke kauā wahine me ke keiki a ka haku wahine».”

³¹ No laila, e nā hoahānau, ʻaʻole he poʻe keiki kākou na ke kauā wahine, na ka haku wahine nō.