ʻO KA ʻEPISETOLE A PAULO KA LUNAʻŌLELO I KO GALATIA 3 - Ka Baibala Hemolele

1 ʻO ka poʻe paulele iā Iesū, ʻaʻole i ke Kānāwai, ua hoʻomaikaʻi pū ʻia lākou me ʻAberahama.

MOKUNA III.

¹ ¶ E nā Galatia naʻaupō, na wai ʻoukou i hoʻowalewale mai i hoʻolohe ʻole ai ʻoukou i ka ʻoiaʻiʻo, i mua o ko ʻoukou maka ua waiho ʻia ʻo Iesū Kristo i kaulia ma ke keʻa i waena o ʻoukou?

² Eia wale nō koʻu makemake e hōʻike ʻia mai e ʻoukou: ma nā hana o ke Kānāwai anei i loaʻa ai iā ʻoukou ka ʻUhane, a ma ka hoʻolohe aku o ka manaʻoʻiʻo anei?

³ Pēlā anei ko ʻoukou naʻaupō? I hoʻomaka iho ai ʻoukou ma ko ka ʻUhane, a ke hoʻōki nei anei ʻoukou ma ko ke kino?

⁴ Ua makehewa anei kēlā mau mea pilikia i hiki mai ai i o ʻoukou lā? Inā pēlā ua makehewa paha.

⁵ No ia hoʻi, ʻo ka mea i hāʻawi mai i ka ʻUhane no ʻoukou, a hana mai hoʻi i nā hana mana i waena o ʻoukou, ma nā hana o ke Kānāwai anei ia, a ma ka hoʻolohe ʻana o ka manaʻoʻiʻo anei?

⁶ E like me ʻAberahama «i manaʻoʻiʻo ai i ke Akua, a ua hoʻolilo ʻia aʻe ia i pono nona».

⁷ No ia mea, e ʻike ʻoukou, ʻo ka poʻe ma ka manaʻoʻiʻo, ʻo lākou ka poʻe keiki na ʻAberahama.

⁸ ʻIke ʻē ihola ka Palapala Hemolele, e hoʻopono ana ke Akua i nā lāhui kanaka ma ka manaʻoʻiʻo, haʻi ʻē akula ia ma mua i ka ʻeuanelio iā ʻAberahama, “«Ma ou aku lā e hoʻopōmaikaʻi ʻia ai nā lāhui kanaka a pau».”

⁹ No laila hoʻi, ʻo nā mea ma ka manaʻoʻiʻo, ua hoʻopōmaikaʻi pū ʻia lākou me ʻAberahama ka mea manaʻoʻiʻo.

¹⁰ No ka mea, ʻo ka poʻe a pau ma nā hana o ke Kānāwai, aia nō lākou ma lalo o ka hoʻāhewa ʻia; penei i palapala ʻia ai, “«E hoʻāhewa ʻia aku nā mea a pau i hoʻomau ʻole e hana i nā mea a pau i kākau ʻia ma loko o ka buke o ke kānāwai.”

¹¹ Akā, ua akāka kēia, ʻaʻole kekahi e hoʻāpono ʻia i mua o ke Akua ma ke Kānāwai; no ka mea, “«ʻO ka mea i pono, e ola ia ma ka manaʻoʻiʻo».”

¹² A ʻo ke Kānāwai, ʻaʻole ia ma ka manaʻoʻiʻo; akā, “ʻO ke kanaka e hana ana ia mau mea, e ola ia i laila».”

¹³ Ua hoʻōla aʻela ʻo Kristo iā kākou mai ka hoʻāhewa ʻia e ke Kānāwai, i kona lilo ʻana i ka hoʻāhewa ʻia no kākou; no ka mea, ua palapala ʻia, “«Ua hoʻāhewa ʻia nā mea a pau i kau ʻia ma luna o ka lāʻau»;”

¹⁴ i kau mai ai ka hoʻopōmaikaʻi ʻia ʻo ʻAberahama ma luna o ko nā ʻāina ʻē ma o Iesū Kristo lā; i loaʻa mai ai iā kākou ma ka manaʻoʻiʻo ka mea i ʻōlelo ʻia mai, ʻo ka ʻUhane.

¹⁵ ¶ E nā hoahānau, ke ʻōlelo aku nei au ma kā ke kanaka: inā i hoʻopaʻa ʻia ka berita a kānaka wale nō, ʻaʻole kekahi e hōʻole ia mea, ʻaʻole hoʻi e hana hou.

¹⁶ A ua haʻi ʻia mai nō nā ʻōlelo iā ʻAberahama a me kāna mamo. ʻAʻole ia i ʻōlelo mai no nā mamo he nui; akā, no ka mea hoʻokahi, “No kāu mamo,” ʻo ia hoʻi ʻo Kristo.

¹⁷ ʻO kēia kaʻu e ʻōlelo aku nei, ʻo ka berita i hoʻopaʻa ʻē ʻia ma mua e ke Akua no Kristo, ʻaʻole e hiki i ke Kānāwai i kau ʻia ma hope mai o nā haneri makahiki ʻehā a me kanakolu ke hōʻole aku, i hāʻule ai ka ʻōlelo.

¹⁸ A inā ma ke kānāwai ka hoʻoili ʻana, ʻaʻole nō ia ma ka ʻōlelo; akā, na ke Akua ia i hāʻawi wale mai iā ʻAberahama ma ka ʻōlelo.

¹⁹ I mea aha hoʻi ke Kānāwai? Ua kau ʻia mai ia no nā hala, a hiki mai ka mamo nona ka ʻōlelo; a ua hoʻolaha ʻia aʻela ia e nā ʻānela ma ka lima o ka mea ʻuao.

²⁰ A ʻo ka mea ʻuao, ʻaʻole ia no ka mea hoʻokahi; akā, ʻo ke Akua, hoʻokahi nō ia.

²¹ Ua kūʻē nō anei ke Kānāwai i nā ʻōlelo a ke Akua? ʻAʻole loa; no ka mea, inā i hāʻawi ʻia mai ke kānāwai e hiki iā ia ke hoʻōla, inā nō ma ke kānāwai ka pono.

²² Akā, ua papapau pū nā mea a pau i ka Palapala Hemolele ma lalo o ka hewa, i hāʻawi ʻia mai ai ka ʻōlelo ma ka manaʻoʻiʻo iā Iesū Kristo na ka poʻe manaʻoʻiʻo aku.

²³ ¶ A ma mua o ka hiki ʻana mai o ka manaʻoʻiʻo, ua hoʻopaʻa ʻia kākou ma lalo o ke kānāwai, ua pio hoʻi a hiki i ka manawa e hoʻākāka ʻia mai ai ka manaʻoʻiʻo.

²⁴ No laila, ua lilo aʻela ke Kānāwai i kumu alakaʻi no kākou i o Kristo lā, i hoʻāpono ʻia mai ai kākou ma ka manaʻoʻiʻo.

²⁵ Akā, i ka hiki ʻana mai o ka manaʻoʻiʻo, ʻaʻole e noho hou kākou ma lalo o ke kumu alakaʻi.

²⁶ No ka mea, he poʻe keiki ʻoukou a pau na ke Akua ma ka manaʻoʻiʻo iā Kristo Iesū.

²⁷ No ka mea, ʻo nā mea a pau o ʻoukou i bapetizo ʻia i loko o Kristo, ua ʻaʻahu iho ʻoukou iā Kristo.

²⁸ ʻAʻole he Iudaio, ʻaʻole hoʻi he Helene, ʻaʻole he mea paʻa, ʻaʻole hoʻi he mea paʻa ʻole, ʻaʻole he kāne, ʻaʻole hoʻi he wahine; no ka mea, hoʻokahi nō ʻoukou a pau i loko o Kristo Iesū.

²⁹ Inā paha no Kristo ʻoukou, a laila he poʻe mamo ʻoukou na ʻAberahama, a me nā hoʻoilina hoʻi ma muli o ka ʻōlelo hoʻopōmaikaʻi.