ʻO KA ʻEPISETOLE A PAULO KA LUNAʻŌLELO I KO GALATIA 2 - Ka Baibala Hemolele

1 No ke ʻoki poepoe ʻole i nā lāhui kanaka ʻē, i mea e ola ai; ua kūʻēʻē ʻo Paulo iā Petero mā, i ko lākou launa ʻole me nā hoahānau ʻoki poepoe ʻole.

MOKUNA II.

¹ ¶ A hala nā makahiki he ʻumikumamāhā, piʻi hou akula au i Ierusalema, me Barenaba, a lawe pū aku nō hoʻi iā Tito.

² Piʻi akula au no ka hōʻike ʻia mai, a hoʻākāka akula au iā lākou i ka ʻeuanelio aʻu i haʻi aku ai i ko nā ʻāina ʻē; akā, hoʻākāka malū akula au i ka poʻe i manaʻo maikaʻi ʻia aʻe, malia o holo hewa paha auaneʻi au, a ua holo hewa paha ma mua.

³ Akā, ʻo Tito ka Helene i noho pū me aʻu, ʻaʻole ia i lilo i ke koi ʻia mai e ʻoki poepoe ʻia.

⁴ No ka poʻe hoahānau hoʻopunipuni i hoʻokipa malū ʻia, kai komo malū mai i loko e hoʻomakākiu mai i ko kākou luhi ʻole i loko o Kristo Iesū, i hoʻoluhi mai ai lākou iā kākou.

⁵ ʻAʻole mākou i hoʻolohe aku iā lākou me ka hoʻopili aku i hoʻokahi hora; i mau ai ka ʻoiaʻiʻo o ka ʻeuanelio me ʻoukou.

⁶ Akā, ʻo ka poʻe i manaʻo maikaʻi ʻia, he ʻoia paha, he mea ʻole ia iaʻu; ʻaʻole ke Akua i manaʻo mai i ko ke kanaka kino. No ka mea, ʻaʻohe mea hou a ka poʻe i manaʻo maikaʻi ʻia i hāʻawi mai ai iaʻu.

⁷ Akā, a ʻike ihola lākou, ua hāʻawi ʻia mai iaʻu ka ʻeuanelio no ka poʻe i ʻoki poepoe ʻole ʻia, e like me ia i hāʻawi ʻia mai iā Petero no ka poʻe i ʻoki poepoe ʻia;

⁸ (no ka mea, ʻo ka Mea nāna i hoʻoikaika mai iā Petero ma ka ʻoihana lunaʻōlelo no ka poʻe i ʻoki poepoe ʻia, ʻo ia kai hoʻoikaika mai iaʻu no nā kānaka ʻē);

⁹ a ʻike maila Iakobo me Kepa a me Ioane i manaʻo ʻia he mau kia, i ka maikaʻi i hāʻawi ʻia mai iaʻu, hāʻawi maila lākou iā māua me Barenaba i nā lima ʻākau e hoʻolauna pū ai; i hele māua i ko nā ʻāina ʻē, a ʻo lākou i ka poʻe ʻoki poepoe ʻia.

¹⁰ I manaʻo hoʻi māua i ka poʻe ʻilihune, ʻo ia hoʻi kaʻu i manaʻo nui ai e hana.

¹¹ ¶ A hele maila Petero i ʻAnetioka, kūʻē akula au iā ia i mua o kona alo; no ka mea, ua hewa ia.

¹² No ka mea, ma mua o ka hiki ʻana mai o kekahi poʻe mai o Iakobo mai, ua ʻai pū ihola ia me ko nā ʻāina ʻē; a hiki maila lākou, hoʻokaʻawale aʻela ʻo ia iā ia iho, e makaʻu ana i ka poʻe i ʻoki poepoe ʻia.

¹³ A hoʻomāhuʻi pū akula ka poʻe Iudaio ʻē aʻe me ia; a lilo akula ʻo Barenaba ma muli o ko lākou hoʻokamani ʻana.

¹⁴ A ʻike akula au, ʻaʻole i kūpono ko lākou hele ʻana ma ka ʻoiaʻiʻo o ka ʻeuanelio, ʻī akula au iā Petero i mua o lākou a pau, “Inā ʻo ʻoe he Iudaio e noho like ana me ko nā ʻāina ʻē, ʻaʻole me ka poʻe Iudaio, pehea lā kāu e koi aku nei i ko nā ʻāina ʻē e noho like me ko kā Iudaio?

¹⁵ “ʻO kākou nā Iudaio maoli, ʻaʻole nā lawehala o ko nā ʻāina ʻē,

¹⁶ ke ʻike nei kākou, ʻaʻole e hoʻāpono ʻia ke kanaka ma nā hana o ke Kānāwai; akā, ma ka manaʻoʻiʻo iā Iesū Kristo; ʻo kākou hoʻi kekahi i manaʻoʻiʻo iā Iesū Kristo, i hoʻāpono ʻia mai kākou ma ka manaʻoʻiʻo iā Kristo, ʻaʻole ma nā hana o ke Kānāwai; no ka mea, ʻaʻole e hoʻāpono ʻia mai kekahi kanaka ma nā hana o ke Kānāwai.

¹⁷ “Inā paha e ʻimi kākou e hoʻāpono ʻia mai ma o Kristo lā, a ʻikea mai kākou he poʻe hewa, ke kumu anei ʻo Kristo no ka hewa? ʻAʻole loa!

¹⁸ “No ka mea, a i kūkulu hou au i nā mea aʻu i wāwahi ai, ua hoʻolilo ihola au iaʻu iho i lawehala.

¹⁹ “A ʻo wau nei ma ke Kānāwai, ua make i ke Kānāwai, i ola aku ai au i ke Akua.

²⁰ “Ua kau pū ʻia aku au me Kristo ma ke keʻa; ua ola nō hoʻi au, ʻaʻole naʻe ʻo wau iho; akā, e ola ana ʻo Kristo i loko oʻu; a ʻo ke ola e ola nei au i loko o ke kino, e ola ana au ma ka manaʻoʻiʻo aku i ke Keiki a ke Akua, nāna au i aloha mai, a hāʻawi maila iā ia iho noʻu.

²¹ “ʻAʻole au e hoʻolilo i ka lokomaikaʻi o ke Akua i mea ʻole; no ka mea, inā ma ke Kānāwai ka pono, inā ua ʻano ʻole ko Kristo make ʻana.”