KA BUKE ʻALUA A MOSE, I KAPA ʻIA PUKA ʻANA 9 - Ka Baibala Hemolele

1 ʻO ke ahulau. 8 Ka maʻi puʻupuʻu. 22 Nā huahekili.

MOKUNA IX.

¹ ¶ ʻŌlelo maila ʻo Iēhova iā Mose, “E hele ʻoe i o Paraʻo lā, a e ʻī aku iā ia, ‘Ke ʻōlelo mai nei ʻo Iēhova ke Akua o nā Hebera penei: “E hoʻokuʻu mai ʻoe i koʻu poʻe kānaka, i hoʻokauā mai ai lākou naʻu.

² “No ka mea, inā ʻaʻole ʻoe e hoʻokuʻu mai, a e hoʻopaʻa loa iā lākou,

³ aia hoʻi, e kau ana nō ʻo Iēhova i kona lima ma luna o kāu poʻe holoholona ma ke kula, ma luna o nā lio, a ma luna o nā hoki, a ma luna o nā kāmelo, a ma luna o nā bipi, a ma luna o nā hipa; he ahulau nui loa.

⁴ “A e hoʻokaʻawale ʻo Iēhova ma waena o nā holoholona a kā ʻIseraʻela, a me nā holoholona a ko ʻAigupita. ʻAʻole nō e make kekahi mea a ka poʻe mamo a ʻIseraʻela.”’”

⁵ Hāʻawi maila ʻo Iēhova i wā maopopo, ʻī maila, “ʻApōpō e hana mai ai ʻo Iēhova i kēia mea ma ka ʻāina.”

⁶ A ia lā iho nō, hana maila ʻo Iēhova i ua mea lā, a make ihola nā holoholona a pau o ʻAigupita; akā, ʻo nā holoholona a nā mamo a ʻIseraʻela, ʻaʻole kekahi i make.

⁷ Hoʻouna akula ʻo Paraʻo, aia hoʻi, ʻaʻole i make kekahi o kā ʻIseraʻela poʻe holoholona. A ua hoʻopaʻakikī ʻia ka naʻau o Paraʻo, ʻaʻole ia i hoʻokuʻu aku i nā kānaka.

⁸ ¶ ʻŌlelo maila ʻo Iēhova iā Mose a me ʻAʻarona, “E lālau ʻolua a piha ko ʻolua mau poho lima i ka lehu o ke kapuahi, a na Mose e lū aku ia mea ma ka lani i mua o nā maka o Paraʻo.

⁹ “A e lilo nō ia i lepo makaliʻi ma ka ʻāina a pau o ʻAigupita, a e lilo ia i puʻupuʻu e pohā ana i nā maʻi hēhē, ma luna o nā kānaka, a ma luna o nā holoholona, ma ka ʻāina a pau o ʻAigupita.”

¹⁰ Lālau aʻela lāua i lehu o ke kapuahi, a kū ihola i mua o Paraʻo; a lū aʻela ʻo Mose i luna i ka lani, a lilo aʻela ia mea i puʻupuʻu e pohā ana i nā maʻi hēhē ma luna o kānaka, a ma luna o nā holoholona.

¹¹ ʻAʻole i hiki i nā māgoi ke kū i mua o Mose, no nā maʻi hēhē; no ka mea, ma luna nō o ka poʻe māgoi ua maʻi hēhē lā, a ma luna nō o ko ʻAigupita a pau.

¹² Hoʻopaʻakikī maila ʻo Iēhova i ka naʻau o Paraʻo, a hoʻolohe ʻole maila ʻo ia iā lāua, e like me kā Iēhova i ʻōlelo mai ai iā Mose.

¹³ ¶ ʻĪ maila ʻo Iēhova iā Mose, “E ala aʻe ʻoe i kakahiaka nui, a e kū i mua o Paraʻo, a e ʻōlelo aku iā ia, ‘Ke ʻī mai nei ʻo Iēhova ke Akua o ka poʻe Hebera penei, “E hoʻokuʻu mai i koʻu poʻe kānaka i hoʻokauā mai lākou naʻu;

¹⁴ no ka mea, ma kēia hope aku, e hoʻouna aku nō wau i koʻu mau mea hōʻino a pau ma luna o kou naʻau, a ma luna o kāu poʻe kauā, a ma luna o kou poʻe kānaka, i ʻike pono ai ʻoe, ʻaʻohe mea ʻē aʻe e like me aʻu ma ka honua a pau.

¹⁵ “No ka mea, ʻānō e ʻō aku ana koʻu lima, i hahau aku ai au iā ʻoe, a me kou poʻe i ke ahulau, a e hoʻōki ʻia aʻe ʻoe mai ka honua aku.

¹⁶ “Akā, no kēia mea, i hoʻokū aʻe au iā ʻoe, i mea e hōʻike aku ai au i koʻu mana ma ou lā, a i kaulana aku ai koʻu inoa ma ka honua a pau.

¹⁷ “Ke hoʻokiʻekiʻe nei anei ʻoe iā ʻoe iho a hiki i kēia wā, e kūʻē i koʻu poʻe kānaka, i ʻole ai e hoʻokuʻu aku iā lākou?

¹⁸ “Aia hoʻi, a hiki i kēia hora o ka lā ʻapōpō, a laila e hoʻoua iho nō au i ka huahekili he nui loa, ʻaʻole lua e like me ia ma ʻAigupita nei, mai kona wā i hoʻokumu ʻia ai a hiki i kēia manawa.

¹⁹ “No laila lā, e hoʻouna aku ʻoe e hoʻākoakoa aʻe i kāu poʻe holoholona a me kāu mau mea a pau ma ke kula; ʻo nā kānaka a me nā holoholona a pau e koe ma ke kula, ʻaʻole e hoʻihoʻi ʻia ma loko o ka hale, e hāʻule mai nō ka huahekili ma luna iho o lākou, a e make lākou.”’”

²⁰ A ʻo ka mea i waena o nā kauā a Paraʻo i makaʻu i ka ʻōlelo a Iēhova, hoʻākoakoa ihola ia i kāna poʻe kauā, a me kāna poʻe holoholona i loko o nā hale.

²¹ A ʻo ka mea huli ʻole i kona naʻau ma ka ʻōlelo a Iēhova, waiho ihola ia i kāna poʻe kauā a me kāna poʻe holoholona ma ke kula.

²² ¶ ʻĪ maila ʻo Iēhova iā Mose, “E ʻō aku i kou lima ma ka lani, i hiki mai ai ka huahekili ma ka ʻāina a pau o ʻAigupita, ma luna o nā kānaka, a ma luna o nā holoholona, a ma luna o nā mea uliuli a pau o ke kula, a puni ka ʻāina ʻo ʻAigupita.”

²³ ʻŌ akula ʻo Mose i kona koʻokoʻo ma ka lani; a hoʻouka maila ʻo Iēhova i ke hekili a me ka huahekili, a naholo maila ka uila ma luna o ka honua; a hoʻoua maila ʻo Iēhova i ka huahekili ma luna o ka ʻāina ʻo ʻAigupita.

²⁴ He huahekili nō, a ua hui pū ka uila me ka huahekili, he nui loa, ʻaʻohe mea e like ai ma ka ʻāina a pau o ʻAigupita, mai ka manawa i lilo ai ia i aupuni.

²⁵ Paopao maila ka huahekili ma ka ʻāina a pau o ʻAigupita, i nā mea a pau ma ke kula, i nā kānaka a me nā holoholona; paopao maila ka huahekili i nā mea uliuli a pau o ke kula, a weluwelu ihola nā lāʻau a pau ma ke kula.

²⁶ ʻO ka ʻāina i Gosena wale nō, ʻo kahi i noho ai nā mamo a ʻIseraʻela, ʻaʻohe huahekili i laila.

²⁷ ¶ Hoʻouna maila ʻo Paraʻo, hea maila iā Mose a me ʻAʻarona, ʻī maila iā lāua, “Ua hewa nō wau i kēia manawa; ua hemolele ʻo Iēhova; akā, ʻo wau a me koʻu poʻe kānaka, ua hewa mākou.

²⁸ “E nonoi aku ʻolua iā Iēhova, uoki; i ʻole ai e kuʻi hou ke hekili o ke Akua, a i pau hoʻi ka huahekili; a e hoʻokuʻu aku nō wau iā ʻoukou, ʻaʻole ʻoukou e kali hou aku.”

²⁹ ʻĪ akula ʻo Mose iā ia, “I koʻu puka ʻana aku ma waho o ke kūlanakauhale, e kīkoʻo aku nō wau i koʻu mau lima iā Iēhova; a e pau nō ke hekili, ʻaʻole hoʻi e huahekili hou, i ʻike ai ʻoe, no Iēhova ka honua.

³⁰ “Akā, ʻo ʻoe, a me kāu poʻe kauā, ua ʻike nō au, ʻaʻole nō ʻoukou e makaʻu i kēia manawa iā Iēhova ke Akua.”

³¹ A make ihola ke olonā, a me ka palaoa huluhulu; no ka mea, ua pua aʻela ka palaoa huluhulu, a ua pua ke olonā.

³² Akā, ʻo ka palaoa, a me ka palaoa ʻeleʻele, ʻaʻole i make; no ka mea, ua ʻōpiopio.

³³ Hele akula ʻo Mose ma waho o ke kūlanakauhale, mai o Paraʻo aku, a kīkoʻo akula i kona mau lima i mua o Iēhova; a ua pau ihola ke hekili a me ka huahekili, ʻaʻole i ninini hou ʻia mai ka ua ma luna o ka honua.

³⁴ A ʻike ihola ʻo Paraʻo, ua pau ka ua, a me ke hekili, hewa hou ihola nō ia, a hoʻopaʻakikī ihola i kona naʻau, ʻo ia a me kāna poʻe kauā.

³⁵ Ua hoʻopaʻakikī ʻia ka naʻau o Paraʻo, ʻaʻole hoʻi ia i hoʻokuʻu aku i nā mamo a ʻIseraʻela, e like me kā Iēhova i ʻōlelo mai ai ma o Mose lā.