KA BUKE ʻALUA A MOSE, I KAPA ʻIA PUKA ʻANA 8 - Ka Baibala Hemolele

5 Nā Rana. 20 Nā makika. 24 Nā nalo nahu.

MOKUNA VIII.

¹ ¶ A laila, ʻī maila ʻo Iēhova iā Mose, “Ō hele ʻoe i o Paraʻo lā, a e ʻī aku iā ia, ‘Ke ʻī mai nei ʻo Iēhova penei, “E hoʻokuʻu mai ʻoe i koʻu poʻe kānaka, i hoʻokauā mai lākou naʻu.

² “A inā paha e hoʻokuʻu ʻole mai ʻoe, aia hoʻi, e hōʻino nō wau i kou mau mokuna a pau i nā rana.

³ “A e hoʻopuka nui mai ka muliwai i nā rana, a e hele mai lākou i loko o kou hale, a me kou keʻena moe, a ma luna o kou hikieʻe, a i loko o ka hale o kāu poʻe kauā, a ma luna o kou poʻe kānaka, a ma loko o kou mau imu, a ma loko hoʻi o kou mau pā wili ʻai.

⁴ “A e hele mai auaneʻi nā rana ma luna ou, a ma luna o kou poʻe kānaka, a ma luna o kāu poʻe kauā a pau.”’”

⁵ ʻĪ maila ʻo Iēhova iā Mose, “E ʻī aku ʻoe iā ʻAʻarona, ‘E ʻō aku kou lima me kou koʻokoʻo ma luna o nā kahawai, a me nā muliwai, a me nā loko, i hiki mai nā rana ma luna o ka ʻāina ʻo ʻAigupita.’”

⁶ ʻŌ akula nō ko ʻAʻarona lima ma luna o ka wai o ʻAigupita, a hiki maila nā rana, a hoʻouhi paʻapū aʻela i ka ʻāina ʻo ʻAigupita.

⁷ Hana ihola nō pēlā nā māgoi i kā lākou mea e kilokilo ai, i hoʻohiki mai ai i nā rana ma ka ʻāina ʻo ʻAigupita.

⁸ ¶ A laila, hea maila ʻo Paraʻo iā Mose a me ʻAʻarona, ʻī maila, “E pule aku ʻolua iā Iēhova, i lawe aku ia i nā rana mai oʻu aku nei, a mai koʻu poʻe kānaka aku, a e hoʻokuʻu nō wau i nā kānaka, i kaumaha ai lākou na Iēhova.”

⁹ ʻĪ akula ʻo Mose iā Paraʻo, “E kauoha pono mai ʻoe iaʻu, i ka manawa hea kaʻu e pule aku ai nou, a no kāu poʻe kauā hoʻi, a no kou poʻe kānaka, i lawe ʻia aku nā rana mai ou aku lā, a mai kou kauhale aku, a koe ma ka muliwai wale nō.”

¹⁰ ¶ ʻŌlelo maila kēlā, “ʻApōpō.” ʻĪ akula ia, “E like me kāu ʻōlelo, pēlā nō auaneʻi ia, i ʻike pono ai ʻoe, ʻaʻohe mea ʻē aʻe e like me Iēhova ko mākou Akua.

¹¹ “A e haʻalele mai nō nā rana iā ʻoe, a me kou hale, a me kāu poʻe kauā, a me kou poʻe kānaka, a e koe ma ka muliwai wale nō.”

¹² Hele akula ʻo Mose lāua ʻo ʻAʻarona mai o Paraʻo aku lā; uē akula ʻo Mose iā Iēhova no nā rana āna i lawe mai ai ma luna o Paraʻo.

¹³ Hana ihola ʻo Iēhova e like me kā Mose ʻōlelo ʻana, a make ihola nā rana ma nā hale, a ma nā pā hale a ma nā kula.

¹⁴ Hōʻiliʻili aʻela lākou i nā rana ma nā puʻu, a pilau ihola ka ʻāina.

¹⁵ A ʻike ihola ʻo Paraʻo, he maha, hoʻopaʻakikī ihola ia i kona naʻau, ʻaʻole i hoʻolohe mai i kā lāua; e like me kā Iēhova i ʻōlelo mai ai.

¹⁶ ¶ ʻŌlelo maila ʻo Iēhova iā Mose, “E ʻī aku ʻoe iā ʻAʻarona, ‘E ʻō aku ʻoe i kou koʻokoʻo, a e hahau i ka lepo o ka ʻāina, i lilo ia i makika ma ka ʻāina a pau o ʻAigupita.’”

¹⁷ Hana ihola lāua pēlā; ʻō akula nō ko ʻAʻarona lima me kona koʻokoʻo, hahau ihola i ka lepo o ka ʻāina, a lilo aʻela ia i makika ma nā kānaka, a ma nā holoholona; lilo nō nā huna lepo a pau o ka ʻāina i makika ma ka ʻāina a pau o ʻAigupita.

¹⁸ Hana ihola nō pēlā nā māgoi, me ko lākou mea kilokilo, i hiki mai ai ka makika, ʻaʻole naʻe i hiki iā lākou. He makika nō naʻe ma luna o nā kānaka, a ma luna o nā holoholona.

¹⁹ A laila ʻōlelo aʻela nā māgoi iā Paraʻo, “Eia nō ka lima o ke Akua.” Ua hoʻopaʻakikī ʻia nō naʻe ko Paraʻo naʻau; ʻaʻole ia i hoʻolohe i kā lāua, e like me kā Iēhova i ʻōlelo mai ai.

²⁰ ¶ ʻŌlelo maila ʻo Iēhova iā Mose, “A kakahiaka nui, e ala aʻe ʻoe, a e kū i mua i ke alo o Paraʻo, aia hoʻi, e hele mai nō ia i waho i ka wai, a e ʻī aku ʻoe iā ia, ‘Ke ʻōlelo mai nei ʻo Iēhova penei, “E hoʻokuʻu ʻoe i koʻu poʻe kānaka, i hoʻokauā mai lākou naʻu.

²¹ “Akā hoʻi, inā ʻaʻole ʻoe e hoʻokuʻu mai i koʻu poʻe kānaka, aia hoʻi, e hoʻouna aku nō au i nā nalo nahu ma luna ou, a ma luna o kāu poʻe kauā, a ma luna o kou poʻe kānaka, a ma loko o kou mau hale; a e piha nā hale o ko ʻAigupita i nā nalo nahu, a me ka ʻāina hoʻi kahi a lākou e noho ai.

²² “Ia lā hoʻi, e hoʻokaʻawale auaneʻi au i ka ʻāina ʻo Gosena, i kahi e noho nei koʻu poʻe kānaka, i hiki ʻole ai ka nalo nahu i laila; i mea e ʻike ai ʻoe, ʻo wau nō Iēhova ma waena o ka honua.

²³ “A e kau nō au i pale ma waena o koʻu poʻe kānaka a me kou poʻe kānaka. ʻApōpō e hiki mai kēia mea.”’”

²⁴ Hana ihola nō ʻo Iēhova pēlā; a hiki maila nā nalo nahu he nui loa ma loko o ka hale o Paraʻo, a me nā hale o kāna poʻe kauā, a ma ka ʻāina a pau o ʻAigupita; ua oki loa ka ʻāina i nā nalo nahu.

²⁵ ¶ Hea maila ʻo Paraʻo iā Mose a me ʻAʻarona, ʻī maila, “E hele ʻoukou, a e kaumaha aku i ko ʻoukou Akua ma loko o ka ʻāina nei.”

²⁶ ʻĪ akula ʻo Mose, “ʻAʻole pono ke hana pēlā; no ka mea, e kaumaha auaneʻi mākou na Iēhova ko mākou Akua i ka mea hoʻopailua a ko ʻAigupita nei; a inā e kaumaha aku mākou i ka mea hoʻopailua a ko ʻAigupita nei i mua o ko lākou maka, ʻaʻole anei lākou e hailuku mai iā mākou i ka pōhaku?

²⁷ “E hele nō mākou i ʻekolu lā hele i loko o ka wao nahele, a e kaumaha aku na Iēhova ko mākou Akua, e like me kāna e kauoha mai ai iā mākou.”

²⁸ ʻĪ maila ʻo Paraʻo, “E hoʻokuʻu aku nō wau iā ʻoukou, i kaumaha aku ai ʻoukou na Iēhova ko ʻoukou Akua, ma ka wao nahele; akā, mai hele aku ʻoukou i kahi mamao. E pule aku ʻolua noʻu.”

²⁹ ʻĪ akula ʻo Mose, “Aia hoʻi, ke hele aku nei au mai ou aku nei, a e nonoi aku au iā Iēhova e lawe aku ia i nā nalo nahu mai o Paraʻo aku, a mai kāna poʻe kauā aku, a mai kona poʻe kānaka aku; aia ʻapōpō. Akā, mai hoʻopunipuni hou mai ʻo Paraʻo, i ka hoʻokuʻu ʻole i nā kānaka e kaumaha aku na Iēhova.”

³⁰ Hele akula ʻo Mose mai o Paraʻo aku, a nonoi akula iā Iēhova.

³¹ Hana maila ʻo Iēhova e like me ka ʻōlelo a Mose, a lawe akula ia i nā nalo nahu mai o Paraʻo aku, a mai kāna poʻe kauā aku, a mai kona poʻe kānaka aku; ʻaʻole hoʻokahi i koe.

³² Hoʻopaʻakikī hou ihola ʻo Paraʻo i kona naʻau ia manawa nō hoʻi, ʻaʻole i hoʻokuʻu aku i nā kānaka.