KA BUKE ʻALUA A MOSE, I KAPA ʻIA PUKA ʻANA 7 - Ka Baibala Hemolele

1 Ka hele ʻana o Mose mā i o Paraʻo lā. 10 Kā lāua hana ʻana i nā hōʻailona a ke Akua i hāʻawi mai ai. 13 Ka hoʻopaʻakikī ʻana o Paraʻo. 14 Ka lilo ʻana o ka wai i koko.

MOKUNA VII.

¹ ¶ ʻĪ maila ʻo Iēhova iā Mose, “E nānā hoʻi, ua hoʻonoho wau iā ʻoe i akua no Paraʻo, a ʻo ʻAʻarona kou kaikuaʻana, ʻo ia nō auaneʻi kou kāula.

² “ʻO nā mea a pau aʻu e kauoha aku ai iā ʻoe, ʻo ia kāu e haʻi aku ai; a ʻo ʻAʻarona kou kaikuaʻana ke ʻōlelo aku iā Paraʻo, e hoʻouna aku ia i nā mamo a ʻIseraʻela mai kona ʻāina aku.

³ “A e hoʻopaʻakikī auaneʻi au i ka naʻau o Paraʻo, a e hana nō au i koʻu mau ʻōuli a nui, a me koʻu mau mea mana ma ka ʻāina ʻo ʻAigupita.

⁴ “ʻAʻole naʻe e hoʻolohe mai ʻo Paraʻo iā ʻolua, i kau aku ai au i koʻu lima ma luna o ʻAigupita, a e lawe mai i waho i koʻu poʻe kaua, i ka poʻe kānaka oʻu, i nā mamo a ʻIseraʻela, mai ka ʻāina ʻo ʻAigupita mai, me ka hoʻopaʻi nui aku.

⁵ “A e ʻike auaneʻi ko ʻAigupita, ʻo wau nō Iēhova, iaʻu e hoʻokākāuha aku ai i koʻu lima ma luna o ʻAigupita, a e lawe mai i nā mamo a ʻIseraʻela mai waena mai o lākou.”

⁶ Hana ihola ʻo Mose lāua ʻo ʻAʻarona, e like me kā Iēhova i kauoha mai ai iā lāua; pēlā lāua i hana aku ai.

⁷ He kanawalu nā makahiki o Mose, a he kanawalu nā makahiki o ʻAʻarona a me kumamākolu, i ka wā a lāua i ʻōlelo aku ai iā Paraʻo.

⁸ ¶ ʻŌlelo maila ʻo Iēhova iā Mose a me ʻAʻarona, ʻī maila,

⁹ “I ka wā e ʻōlelo mai ai ʻo Paraʻo iā ʻolua, i ka ʻī ʻana mai, ‘E hōʻike mai ʻolua i kekahi hana mana’; a laila e ʻōlelo aʻe ʻoe iā ʻAʻarona, ‘E lālau i kou koʻokoʻo, a e kiola iho i mua o Paraʻo, a e lilo ia i nahesa.’”

¹⁰ Hele akula ʻo Mose lāua ʻo ʻAʻarona i o Paraʻo lā, hana ihola lāua e like me ke kauoha ʻana a Iēhova, a kiola ihola ʻo ʻAʻarona i kona koʻokoʻo i mua o Paraʻo, a i mua o kāna poʻe kauā, a lilo ihola ia i nahesa.

¹¹ Kiʻi akula hoʻi ʻo Paraʻo i nā kānaka akamai, a me nā kilo; a ʻo nā māgoi o ʻAigupita, hana ihola hoʻi lākou pēlā, i ko lākou kilokilo ʻana.

¹² No ka mea, kiola ihola kēlā kanaka kēia kanaka a pau i kona koʻokoʻo iho, i lilo lākou i mau nahesa; akā, ʻo ke koʻokoʻo o ʻAʻarona, moni ihola ia i ko lākou mau koʻokoʻo.

¹³ A hoʻopaʻakikī ʻia maila ka naʻau o Paraʻo, i hoʻolohe ʻole ai ʻo ia iā lāua, e like me ka mea a Iēhova i ʻōlelo mai ai.

¹⁴ ¶ ʻĪ maila ʻo Iēhova iā Mose: “Ua hoʻopaʻakikī ʻia ko Paraʻo naʻau, i ʻole ai ia e hoʻokuʻu mai i ka poʻe kānaka.

¹⁵ “A kakahiaka aʻe, e hele ʻoe i o Paraʻo lā, aia e hele ana nō ia i ka wai; e kū ʻoe ma ke kapa o ka muliwai e hālāwai me ia; a e lawe ʻoe ma kou lima i ke koʻokoʻo i lilo ai i nahesa.

¹⁶ “A e ʻōlelo aku ʻoe iā ia, ‘Ua hoʻouna mai nei ke Akua o ka poʻe Hebera iaʻu i ou nei, ua ʻī mai, “E hoʻokuʻu mai ʻoe i koʻu poʻe kānaka, i hoʻokauā mai lākou naʻu ma ka wao nahele”; aia hoʻi, ʻaʻole ʻoe i manaʻo e hoʻolohe ma mua!

¹⁷ ‘Ke ʻōlelo mai nei ʻo Iēhova penei, “Ma kēia mea e ʻike auaneʻi ʻoe, ʻo wau nō Iēhova; aia hoʻi, e hahau nō wau i kēia koʻokoʻo ma kuʻu lima, ma luna o ka wai ma loko o ka muliwai, a e lilo ia i koko.

¹⁸ “A e make nō ka iʻa ma loko o ka muliwai, a e hoʻopailua ko ʻAigupita ke inu i ka wai o ka muliwai.”’”

¹⁹ ʻĪ maila ʻo Iēhova iā Mose, “E ʻōlelo aku ʻoe iā ʻAʻarona, ‘E lālau ʻoe i kou koʻokoʻo, a e ʻō aku kou lima ma luna o nā wai o ʻAigupita, ma nā kahawai, a ma nā muliwai, a ma nā loko, a ma nā huinawai a pau o lākou, i lilo ai lākou i koko; i hiki mai ke koko ma nā ʻāina a pau o ʻAigupita nei, ma loko o ka lāʻau, a ma loko o ka pōhaku.’”

²⁰ ¶ A hana ihola ʻo Mose lāua ʻo ʻAʻarona e like me ka mea a Iēhova i ʻōlelo mai ai. Hāpai aʻela ia i ke koʻokoʻo a hahau ihola i ka wai ma loko o ka muliwai, i mua i ke alo o Paraʻo, a i mua i ke alo o kāna poʻe kauā; a lilo aʻela ka wai a pau o ka muliwai i koko.

²¹ A make ihola ka iʻa ma loko o ka muliwai; pilau maila ka muliwai; ʻaʻole i hiki i ko ʻAigupita ke inu i ka wai o ua muliwai lā; a he koko nō ma ka ʻāina ʻo ʻAigupita a pau.

²² Hana ihola no pēlā nā māgoi o ʻAigupita i ko lākou mea e kilokilo ai; a ua hoʻopaʻakikī ʻia ka naʻau o Paraʻo, ʻaʻole hoʻi ia i hoʻolohe mai iā lāua, e like nō me ka mea a Iēhova i ʻōlelo mai ai.

²³ Huli aʻela ʻo Paraʻo, a hoʻi akula i kona hale; ʻaʻole hoʻi ia i kau aku i kona manaʻo ma ia mea.

²⁴ Kōhi ihola ko ʻAigupita a pau i nā wahi e kokoke ana i ka muliwai, i loaʻa ai ka wai e inu; no ka mea, ʻaʻole i hiki iā lākou ke inu i ka wai o ka muliwai.

²⁵ A ua hala aʻela nā lā ʻehiku mai ka wā mai o ko Iēhova hahau ʻana i ka muliwai.