KA BUKE ʻALUA A MOSE, I KAPA ʻIA PUKA ʻANA 6 - Ka Baibala Hemolele

1 Ka ʻōlelo hou ʻana mai o Iēhova iā Mose. 14 Ke kūʻauhau no nā mamo a ʻIseraʻela.

MOKUNA VI.

¹ ¶ A laila ʻōlelo maila ʻo Iēhova iā Mose, “ʻĀnō, e ʻike auaneʻi ʻoe i ka mea aʻu e hana aku ai iā Paraʻo; no ka mea, e hoʻokuʻu aku nō ʻo ia iā lākou me ka lima ikaika, a me ka lima ikaika hoʻi ʻo ia e kipaku aku ai iā lākou, mai kona ʻāina aku.”

² ¶ ʻŌlelo maila ke Akua iā Mose, ʻī maila iā ia, “ʻO wau nō ʻo Iēhova.

³ “Hōʻike aku wau iaʻu iho iā ʻAberahama, iā ʻIsaʻaka, a iā Iakoba, ʻo ke Akua Mana; akā, ma koʻu inoa, ʻo IĒHOVA, ʻaʻole au i ʻike ʻia mai e lākou.

⁴ “Ua hoʻopaʻa nō hoʻi au i kuʻu berita me lākou, e hāʻawi aku ai no lākou i ka ʻāina ʻo Kanaʻana, i ka ʻāina i noho ai lākou, he mau malihini i laila.

⁵ “Ua lohe hoʻi au i ka ʻūʻū ʻana o nā mamo a ʻIseraʻela, ʻo ka poʻe i hoʻoluhi ʻia ai e ko ʻAigupita; a ua hoʻomanaʻo wau i kuʻu berita.

⁶ “No ia mea, e ʻōlelo aku ʻoe i nā mamo a ʻIseraʻela, ‘ʻO wau nō Iēhova, a e lawe mai ana nō wau iā ʻoukou mai lalo mai o nā mea kaumaha a ko ʻAigupita, a e hoʻopakele nō wau iā ʻoukou i ko lākou hoʻoluhi ʻana; a e hoʻōla wau iā ʻoukou me ka lima kākāuha, a me nā hoʻopaʻi ʻana he nui loa.

⁷ ‘A e hoʻonoho nō wau iā ʻoukou i poʻe kānaka noʻu, a ʻo wau auaneʻi hoʻi ko ʻoukou Akua; a e ʻike auaneʻi hoʻi ʻoukou, ʻo wau nō Iēhova, ʻo ko ʻoukou Akua, nāna ʻoukou e lawe aʻe, mai lalo aʻe o nā mea kaumaha a ko ʻAigupita.

⁸ ‘A e lawe aku nō au iā ʻoukou i ka ʻāina aʻu i paʻi ai i koʻu lima, e hāʻawi aku ia wahi no ʻAberahama, no ʻIsaʻaka a no Iakoba, ʻo ia kaʻu e hāʻawi aku ai no ʻoukou i wahi e noho ai; ʻo wau nō Iēhova.’”

⁹ Pēlā nō hoʻi ʻo Mose i ʻōlelo aku ai i nā mamo a ʻIseraʻela; ʻaʻole naʻe lākou i hoʻolohe i kā Mose, no ka ʻehaʻeha o ka naʻau, a no ka luhi koʻikoʻi.

¹⁰ ¶ ʻŌlelo maila ʻo Iēhova iā Mose, ʻī maila,

¹¹ “E hele ʻoe, e ʻōlelo aku iā Paraʻo i ke aliʻi o ʻAigupita, e hoʻokuʻu aku ʻo ia i nā mamo a ʻIseraʻela mai kona ʻāina aku.”

¹² ʻŌlelo aku ʻo Mose i mua o Iēhova, ʻī akula, “Aia hoʻi, ʻaʻole i hoʻolohe mai nā mamo a ʻIseraʻela iaʻu, pehea lā hoʻi e hoʻolohe mai ai ʻo Paraʻo iaʻu, i ka mea lehelehe hemahema?”

¹³ ʻŌlelo maila ʻo Iēhova iā Mose a iā ʻAʻarona, a hoʻouna iā lāua i nā mamo a ʻIseraʻela, a iā Paraʻo, no ka lawe ʻana mai i nā mamo a ʻIseraʻela mai ka ʻāina mai o ʻAigupita.

¹⁴ ¶ Eia hoʻi nā mea mua o ko lākou mau ʻohana kupuna: ʻO nā keiki a Reubena, a ka hiapo a ʻIseraʻela: ʻo Hanoka, ʻo Palu, ʻo Hezerona, a ʻo Karemi; ʻo lākou nā ʻohana a Reubena.

¹⁵ A ʻo nā keiki a Simeona: ʻo Iemuʻela, a ʻo Iamina, ʻo ʻOhada, ʻo Iakina, ʻo Zohara, a ʻo Saula ke keiki a kekahi wahine Kanaʻana; ʻo lākou nā ʻohana a Simeona.

¹⁶ Eia hoʻi nā inoa o nā keiki a Levi, ma ko lākou mau hanauna: ʻo Geresona, ʻo Kohata, a ʻo Merari; a ʻo nā makahiki o ko Levi ola ʻana, hoʻokahi haneri me kanakolukumamāhiku nā makahiki.

¹⁷ ʻO nā keiki a Geresona: ʻo Libeni, a ʻo Simi; ma kā lāua mau ʻohana.

¹⁸ A ʻo nā keiki a Kohata: ʻo ʻAmerama, ʻo ʻIzehara, ʻo Heberona, a me ʻUziʻela; a ʻo nā makahiki o ko Kohata ola ʻana, hoʻokahi haneri me kanakolukumamākolu nā makahiki.

¹⁹ A ʻo nā keiki a Merari: ʻo Mahali a ʻo Musi; ʻo lākou nei nā ʻohana a Levi, ma nā hanauna o lākou.

²⁰ Lawe ihola o ʻAmerama iā Iokebeda, i ke kaikuahine o kona makua kāne, i wahine nāna; a hānau maila nāna ʻo ʻAʻarona lāua ʻo Mose; a ʻo nā makahiki o ko ʻAmerama ola ʻana, hoʻokahi haneri me kanakolukumamāhiku nā makahiki.

²¹ A ʻo nā keiki a ʻIzehara: ʻo Kora, ʻo Nepega, a me Zikeri.

²² A ʻo nā keiki a ʻUziʻela: ʻo Misaʻela, ʻo ʻElezapana, a me Ziteri.

²³ Lawe aʻela ʻo ʻAʻarona iā ʻEliseba, i ke kaikamahine a ʻAminadaba, ʻo ke kaikuahine o Nahesona i wahine nāna, a hānau maila nāna: ʻo Nadaba, ʻo ʻAbihu, ʻo ʻEleazara a me ʻItamara.

²⁴ A ʻo nā keiki a Kora: ʻo ʻAsira, ʻo ʻElekana, a ʻo ʻAbiasapa; ʻo lākou nā ʻohana a Kora.

²⁵ Lawe aʻela ʻo ʻEleazara ke keiki a ʻAʻarona i kekahi kaikamahine a Putiʻela i wahine nāna: a ua hānau mai nāna ʻo Pinehasa; ʻo lākou nā mea mua o nā mākua o kā Levi, ma kā lākou mau ʻohana.

²⁶ ʻO ia ʻo ua ʻAʻarona lā lāua ʻo ua Mose lā, nā mea a Iēhova i ʻōlelo mai ai, “E lawe mai ʻolua i nā mamo a ʻIseraʻela mai ʻAigupita mai, ma ko lākou poʻe kaua.”

²⁷ ʻO lāua nō nā mea i ʻōlelo iā Paraʻo i ke aliʻi o ʻAigupita, no ka lawe ʻana mai i nā mamo a ʻIseraʻela, mai ʻAigupita mai; ʻo ua Mose lā nō kēia lāua ʻo ʻAʻarona.

²⁸ ¶ A i ka lā a Iēhova i ʻōlelo mai ai iā Mose ma ka ʻāina ʻo ʻAigupita,

²⁹ ʻōlelo maila ʻo Iēhova iā Mose, ʻī maila, “ʻO wau nō Iēhova; e haʻi aku ʻoe iā Paraʻo i ke aliʻi o ʻAigupita, i nā mea a pau aʻu e ʻōlelo aku ai iā ʻoe.”

³⁰ ʻŌlelo aku ʻo Mose i mua o Iēhova, “Aia hoʻi, he lehelehe hemahema koʻu, pehea lā e hoʻolohe mai ai ʻo Paraʻo iaʻu?”