KA BUKE ʻALUA A MOSE, I KAPA ʻIA PUKA ʻANA 5 - Ka Baibala Hemolele

1 Ka hana ʻino ʻana a Paraʻo. 20 Lohe nō Mose lāua ʻo ʻAʻarona, a haʻi aku lāua i ke Akua.

MOKUNA V.

¹ ¶ Ma hope iho, hele akula ʻo Mose lāua ʻo ʻAʻarona, a haʻi akula iā Paraʻo, “Ke ʻī mai nei ʻo Iēhova ke Akua o kā ʻIseraʻela penei, ‘E hoʻokuʻu mai ʻoe i koʻu poʻe kānaka, i ʻahaʻaina lākou naʻu ma ka wao nahele.’”

² ʻĪ maila ʻo Paraʻo, “ʻO wai lā ʻo Iēhova i hoʻolohe ai au i kona leo, e hoʻokuʻu aku ai i kā ʻIseraʻela? ʻAʻole au i ʻike iā Iēhova, ʻaʻole hoʻi au e hoʻokuʻu aku i kā ʻIseraʻela.”

³ ʻĪ akula lāua, “Ua hālāwai mai me mākou ke Akua o ka poʻe Hebera; no ia mea, e hoʻokuʻu ʻoe iā mākou e hele i ka wao nahele, i kahi ʻekolu lā hiki, e kaumaha aku ai na Iēhova ʻo ko mākou Akua, o kau mai ia ma luna o mākou i ke ahulau a me ka pahi kaua.”

⁴ ʻĪ maila ke aliʻi o ʻAigupita iā lāua, “No ke aha lā ʻolua, e Mose a me ʻAʻarona, e hoʻōki nei i kānaka i kā lākou hana? E hoʻi ʻoukou ma ko ʻoukou luhi.”

⁵ ʻŌlelo maila ʻo Paraʻo, “Aia hoʻi, ua nui loa nā kānaka o ka ʻāina, a ke hoʻōki nei ʻolua iā lākou i ko lākou luhi.”

⁶ Ia lā nō, kauoha maila ʻo Paraʻo i nā luna hoʻoluhi o nā kānaka; a me ko lākou mau luna iho, ʻī maila,

⁷ “Mai hāʻawi hou aku i ka mauʻu i kānaka no nā pōhaku lepo, e like ma mua. E hele lākou e hōʻiliʻili i kā lākou mauʻu.

⁸ “A ʻo ka nui o nā pōhaku lepo a lākou i hana ai ma mua, pēlā ʻoukou e hāʻawi hou aku ai iā lākou; mai hoʻēmi iki ia mea; no ka mea, ua moloā lākou; no ia mea, ke uē mai nei lākou, i ka ʻī ʻana mai, ‘E hele mākou e kaumaha aku na ko mākou Akua.’

⁹ “E kau i ka hana kaumaha ma luna o nā kānaka, i hana aku ai lākou i laila, i hoʻolohe ʻole ai hoʻi lākou i nā ʻōlelo wahaheʻe.”

¹⁰ ¶ Hele akula nā luna hoʻoluhi o nā kānaka, a me ko lākou poʻe luna iho, ʻōlelo aʻela i kānaka, ʻī aʻela, “Ke ʻī mai nei ʻo Paraʻo penei, ‘ʻAʻole au e hāʻawi aku i mauʻu iā ʻoukou.

¹¹ ‘E hele ʻoukou, e kiʻi i mauʻu na ʻoukou iho i kahi e loaʻa ai iā ʻoukou; no ka mea, ʻaʻole loa e hoʻēmi iki ʻia kā ʻoukou mea hana.’”

¹² No ia mea, ʻauana wale aku nō nā kānaka ma ka ʻāina a pau o ʻAigupita, e hōʻiliʻili i ka ʻōpala i mauʻu.

¹³ Wikiwiki maila nā luna hoʻoluhi, ʻī maila iā lākou, “E hoʻolawa i kā ʻoukou hana, i ka hana o kēlā lā o kēia lā, e like me ka wā mauʻu.”

¹⁴ A ʻo nā luna o nā mamo a ʻIseraʻela, ʻo ka poʻe i hoʻonoho ʻia ma luna o lākou e nā luna hoʻoluhi o Paraʻo, ua hahau ʻia mai lākou, me ka nīnau ʻia mai, “No ke aha lā ʻoukou i hoʻolawa ʻole ai i kā ʻoukou hana i nā pōhaku lepo i nehinei, a i kēia lā hoʻi, e like ma mua?”

¹⁵ ¶ Hele akula nā luna o nā mamo a ʻIseraʻela, a uē akula iā Paraʻo, ʻī akula, “No ke aha lā ʻoe e hana mai ai pēlā i kāu poʻe kauā nei?

¹⁶ “ʻAʻole i hāʻawi ʻia mai ka mauʻu i kāu poʻe kauā, a ke ʻī mai nei lākou iā mākou, ʻE hana ʻoukou i nā pōhaku lepo’; aia hoʻi, ua hahau ʻia mai nei kāu poʻe kauā; akā, no kou poʻe kānaka iho ka hewa.”

¹⁷ ʻĪ maila kēlā, “Ua palela ʻoukou, ua palela ʻoukou; no ia mea, ke ʻōlelo mai nei ʻoukou, ‘E hoʻokuʻu mai ʻoe iā mākou e hele, e kaumaha aku na Iēhova.’

¹⁸ “E hele hoʻi ʻoukou pēlā e hana; no ka mea, ʻaʻole loa e hāʻawi ʻia aku ka mauʻu na ʻoukou; akā, e hoʻolawa ʻoukou i ka hana o nā pōhaku lepo.”

¹⁹ ʻIke ihola nā luna o nā mamo a ʻIseraʻela, ua nui ko lākou pilikia, i ka ʻī ʻana mai, “Mai hoʻēmi iki ʻoukou i nā pōhaku lepo i kā ʻoukou hana ʻana i kēlā lā i kēia lā.”

²⁰ Hālāwai lākou me Mose lāua ʻo ʻAʻarona, e kū ana ma ke alanui i ko lākou hele ʻana mai, mai o Paraʻo mai.

²¹ ʻĪ aʻela lākou iā lāua, “E nānā mai ʻo Iēhova iā ʻolua, a e hoʻāhewa mai; no ka mea, ua hoʻolilo ʻolua i ko mākou ʻala i mea pilau i mua o Paraʻo, a i mua o kāna poʻe kauā, i ka hāʻawi ʻana i ka pahi kaua ma loko o ko lākou lima, e pepehi mai ai iā mākou.”

²² ¶ Hoʻi hou akula ʻo Mose i o Iēhova lā, ʻī akula iā ia, “E ka Haku ē, no ke aha lā ʻoe i hana ʻino mai ai i kēia poʻe kānaka? No ke aha lā ʻoe i hoʻouna mai nei iaʻu?

²³ “No ka mea, mai ka manawa aʻu i hele aku ai i o Paraʻo lā e ʻōlelo aku ma kou inoa, ua hana ʻino mai kēlā i kēia poʻe kānaka, ʻaʻole hoʻi ʻoe i hoʻokuʻu iki mai i kou poʻe kānaka.”