KA BUKE ʻALUA A MOSE, I KAPA ʻIA PUKA ʻANA 40 - Ka Baibala Hemolele

1 No ke kūkulu ʻana i ka halelewa. 9 Poni ʻia. 13 No ka poni ʻana iā ʻAʻarona a me kāna mau keiki. 16 Hana ʻo Mose e like me ke kauoha a ke Akua. 34 Uhi maila ke ao i ka halelewa.

MOKUNA XL.

¹ ¶ ʻŌlelo maila hoʻi ʻo Iēhova iā Mose, ʻī maila:

² “I ka lā mua o ka malama mua, e kūkulu ʻoe i ka halelewa o ka hale lole o ke anaina kanaka.

³ “A e waiho ʻoe ma loko o laila i ka pahu Kānāwai, a e uhi i ka pahu i ka pākū.

⁴ “A e lawe ʻoe i ka papa ʻaina i loko, a e hoʻonohonoho i nā ʻoihana ma luna iho; a e lawe mai hoʻi i ka ipukukui manamana, a e hoʻā hoʻi i kona mau ipu ʻaila.

⁵ “A e kau ʻoe i ke kuahu gula no ka mea ʻala i mua o ka pahu Kānāwai, a e kau aku i ka pale o ka puka o ka halelewa.

⁶ “A e hoʻonoho ʻoe i ke kuahu no ka mōhai kuni i mua o ka puka o ka halelewa o ka hale lole o ke anaina kanaka.

⁷ “A e kau ʻoe i ka ipu ʻauʻau ma waena o ka hale lole o ke anaina kanaka, a me ke kuahu, a e ninini hoʻi i ka wai ma loko.

⁸ “A e kūkulu ʻoe i ka pākū kahua a pau, a e kau aku i ka pale ma ka puka o ke kahua;

⁹ e lawe nō hoʻi ʻoe i ka ʻaila poni, a e poni iho i ka halelewa, a me nā mea a pau ma loko, a e hoʻolaʻa ia mea, a me kona ʻoihana a pau, a e lilo ia i mea laʻa;

¹⁰ a e poni nō hoʻi ʻoe i ke kuahu no ka mōhai kuni, a me kāna ʻoihana a pau, a e hoʻolaʻa i ke kuahu, a e lilo ia i kuahu laʻa loa;

¹¹ a e poni ʻoe i ka ipu ʻauʻau a me kona kumu, a e hoʻolaʻa ia mea;

¹² a e lawe mai ʻoe iā ʻAʻarona a me kāna mau keiki kāne i ka puka o ka halelewa o ke anaina kanaka, a e holoi iā lākou i ka wai;

¹³ a e hoʻokomo nō ʻoe ma luna o ʻAʻarona i nā kāhiko laʻa, a e poni iā ia, a e hoʻolaʻa iā ia, i lawelawe ʻo ia naʻu ma ka ʻoihana kahuna;

¹⁴ a e lawe mai nō hoʻi ʻoe i kāna mau keiki kāne, a e hoʻokomo ma luna o lākou i nā pālule.

¹⁵ “A e poni ʻoe iā lākou, e like me kou poni ʻana i ko lākou makua kāne, i lawelawe lākou naʻu ma ka ʻoihana kahuna; no ka mea, he ʻoiaʻiʻo, e lilo ko lākou poni ʻana, i mea e kahuna mau loa ai, i ko lākou mau hanauna aku.”

¹⁶ Pēlā ʻo Mose i hana ai: e like me nā mea a pau a Iēhova i kauoha mai ai iā ia, pēlā nō ia i hana ai.

¹⁷ ¶ A i ka malama mua o ka makahiki ʻalua, i ka lā mua o ka malama, ua kūkulu ʻia ka halelewa.

¹⁸ A kūkulu ʻo Mose i ka halelewa, a hoʻopaʻa ihola i kona mau kumu, a kūkulu hoʻi i kona mau papa, a hoʻokomo aʻela i kona mau ʻaukā e paʻa ai, a kūkulu nō hoʻi i kona mau pou.

¹⁹ A haʻaliʻi aʻela ʻo ia i ka hale lole ma luna o ka halelewa, a kau akula i ka uhi o ka hale lole ma luna aku; e like me kā Iēhova i kauoha mai ai iā Mose.

²⁰ A lawe ʻo ia, a waiho akula i ke Kānāwai i loko o ka pahu, a hoʻonoho i ka noho aloha ma luna ma ka pahu.

²¹ A lawe aʻela ʻo ia i ka pahu i loko o ka halelewa, a kau akula ma luna i ka pākū e uhi ai, a uhi aʻela i ka pahu Kānāwai; e like me kā Iēhova i kauoha mai ai iā Mose.

²² A waiho akula ʻo ia i ka papa ʻaina i loko o ka hale lole o ke anaina kanaka, ma ka ʻaoʻao ʻākau o ka halelewa, ma waho o ka pākū;

²³ a hoʻonohonoho ʻo ia i ka berena ma luna o laila, i mua o Iēhova; e like me kā Iēhova i kauoha mai ai iā Mose.

²⁴ A kau akula ʻo ia i ka ipukukui manamana ma loko o ka halelewa o ke anaina e kū pono ana i ka papa ʻaina, ma ka ʻaoʻao hema o ka halelewa;

²⁵ a hoʻā ihola ʻo ia i nā kukui i mua o Iēhova; e like me kā Iēhova i kauoha mai ai iā Mose.

²⁶ A waiho akula ʻo ia i ke kuahu gula ma loko o ka hale lole o ke anaina kanaka, i mua o ka pākū.

²⁷ A puhi ihola ʻo ia i ka mea ʻala maikaʻi ma luna o laila; e like me kā Iēhova i kauoha mai ai iā Mose.

²⁸ A kau akula ʻo ia i ka pale o ka puka o ka halelewa.

²⁹ A waiho akula ʻo ia i ke kuahu o ka mōhai kuni ma ka puka o ka halelewa o ka hale lole o ke anaina kanaka, a kaumaha akula ma luna o laila i ka mōhai kuni, a me ka mōhai ʻai; e like me kā Iēhova i kauoha mai ai iā Mose.

³⁰ A kau akula ʻo ia i ka ipu ʻauʻau ma waena o ka hale lole o ke anaina kanaka, a me ke kuahu, a ninini ihola i ka wai i loko, i mea e holoi ai.

³¹ A holoi nō Mose, a me ʻAʻarona, a me kāna mau keiki kāne i ko lākou mau lima, a me ko lākou mau wāwae ma laila.

³² A iā lākou i komo ai i loko o ka hale lole o ke anaina kanaka, a iā lākou i hoʻokokoke ai i ke kuahu, holoi nō lākou; me kā Iēhova i kauoha mai ai iā Mose.

³³ A kūkulu nō hoʻi ʻo ia i ka pākū kahua a puni ka halelewa a me ke kuahu, a kau akula i ka pale o ka puka o ke kahua; pēlā ʻo Mose i hoʻopau ai i ka hana.

³⁴ ¶ A laila, uhi maila ke ao i ka hale lole o ke anaina kanaka, a hoʻopiha maila ka nani o Iēhova i ka halelewa.

³⁵ ʻAʻole hiki iā Mose ke komo i loko o ka hale lole o ke anaina kanaka; no ka mea, kau mau nō ke ao ma luna o laila, a hoʻopiha hoʻi ka nani o Iēhova i ka halelewa.

³⁶ A i ka piʻi ʻana o ke ao mai ka halelewa aku, a laila, hele akula nā mamo a ʻIseraʻela i ko lākou hele ʻana a pau.

³⁷ A i ʻole e piʻi aku ke ao, a laila, ʻaʻole lākou i hele, a hiki i ka lā i piʻi aku ai ia.

³⁸ No ka mea, aia nō ma luna o ka halelewa, ua ao lā o Iēhova i ke ao, a he ahi hoʻi ma luna o laila i ka pō, i mua o nā maka o ko ka hale a pau o kā ʻIseraʻela, i ko lākou hele ʻana a pau.