KA BUKE ʻALUA A MOSE, I KAPA ʻIA PUKA ʻANA 4 - Ka Baibala Hemolele

1 Ua hāʻawi mai ke Akua i na hōʻailona mana iā Mose, i mea hōʻike i mua o Paraʻo. 13 Kona huhū ʻana iā Mose. 20 Ka hele ʻana o Mose mā i ʻAigupita. 24 ʻOki poepoe ʻo Zipora i kāna keiki kāne. 27 Hālāwai ia me ʻAʻarona.

MOKUNA IV.

¹ ¶ ʻŌlelo akula ʻo Mose, ʻī akula, “Aia hoʻi; ʻaʻole paha auaneʻi lākou e manaʻoʻiʻo mai iaʻu, ʻaʻole hoʻi e hoʻolohe mai i koʻu leo; no ka mea, e ʻōlelo auaneʻi lākou, ‘ʻAʻole i ʻike ʻia aku ʻo Iēhova e ʻoe.’”

² ʻĪ maila ʻo Iēhova iā ia, “He aha kēlā mea ma kou lima?” ʻĪ akula ia, “He koʻokoʻo.”

³ ʻĪ maila kēlā, “E hoʻolei ia i lalo i ka honua.” Hoʻolei ihola ia i lalo i ka honua, a lilo aʻela ia i nahesa; a holo akula ʻo Mose mai kona maka aku.

⁴ ʻĪ maila ʻo Iēhova iā Mose, “E kīkoʻo aku kou lima, a e lālau aku ma kona huelo.” Kīkoʻo akula kona lima a lālau ihola, a hoʻi hou aʻela ia i koʻokoʻo ma kona lima.

⁵ “I laila e manaʻoʻiʻo ai lākou, ua ʻikea e ʻoe ʻo Iēhova ke Akua o ko lākou poʻe kūpuna, ke Akua o ʻAberahama, ke Akua o ʻIsaʻaka, ke Akua hoʻi o Iakoba.”

⁶ ʻŌlelo hou maila ʻo Iēhova iā ia, “E hoʻoholo ʻoe i kou lima ma kou umauma iho.” Hoʻoholo aʻela ia i kona lima ma kona umauma, a i kona unuhi ʻana mai, aia hoʻi, ua lēpera ia e like me ka hau.

⁷ ʻĪ maila ʻo ia, “E hoʻoholo hou aʻe ʻoe i kou lima ma kou umauma.” Hoʻoholo hou i kona lima ma kona umauma, a unuhi hou mai, aia hoʻi, ua hoʻi hou aʻela nō e like me kekahi ʻiʻo ona.

⁸ “A inā ʻaʻole lākou e manaʻoʻiʻo mai iā ʻoe, ʻaʻole hoʻi e hoʻolohe mai i ka leo o ka hōʻailona mua, e manaʻoʻiʻo paha lākou i ka leo o ka hōʻailona hope.

⁹ “A inā ʻaʻole lākou e manaʻoʻiʻo mai i kēia mau hōʻailona ʻelua, ʻaʻole hoʻi e hoʻolohe i kou leo, a laila e lawe aʻe ʻoe i kahi wai o ka muliwai, a e ninini ma kahi maloʻo, a e lilo auaneʻi ka wai āu e lawe ai mai loko mai o ka muliwai, i koko ma kahi maloʻo.”

¹⁰ ¶ ʻĪ akula ʻo Mose iā Iēhova, “E kuʻu Haku ē, he kanaka akamai ʻole wau i ka ʻōlelo, ʻaʻole ma mua mai a hiki i kēia wā āu e ʻōlelo mai ai i kāu kauā nei, he kali koʻu waha, a he kali hoʻi koʻu elelo.”

¹¹ ʻĪ maila ʻo Iēhova iā ia, “Na wai i hana ka waha o ke kanaka? Na wai hoʻi i hana i ka ʻāʻā, a me ke kuli, a me ka ʻike, a me ka makapō? ʻAʻole anei naʻu, na Iēhova?

¹² “No laila, ō hele, a ʻo wau pū nō me kou waha, e aʻo aku ana iā ʻoe i ka mea āu e ʻōlelo aku ai.”

¹³ ʻĪ akula ia, “E kuʻu Haku ē, ke noi aku nei au iā ʻoe, e hoʻouna aku ʻoe ma ka lima o ka mea āu e hoʻouna aku ai.”

¹⁴ Wela maila ka inaina o Iēhova iā Mose, ʻī maila kēlā, “ʻAʻole anei ke kaikuaʻana ou ʻo ʻAʻarona kā Levi? Ua ʻike nō au e hiki nō iā ia ke ʻōlelo; aia hoʻi ke hele mai nei ia e hālāwai me ʻoe; aia ʻike mai kēlā iā ʻoe, e ʻoliʻoli auaneʻi ʻo ia ma kona naʻau.

¹⁵ “Nāu e ʻōlelo aku iā ia, a e waiho aku i nā hua ma kona waha; a ʻo wau pū nō me kou waha, a me kona waha, a e aʻo aku iā ʻolua i kā ʻolua mea e hana ai.

¹⁶ “A ʻo ia nō kou mea nāna e ʻōlelo aku i nā kānaka; a e lilo nō ʻo ia i waha nou, a ʻo ʻoe hoʻi nona e like me ke Akua.

¹⁷ “E lawe pū aku ʻoe i kēia koʻokoʻo ma loko o kou lima, i mea e hana aku ai i nā hōʻailona.”

¹⁸ ¶ A laila hele akula ʻo Mose a hoʻi akula i o Ietero lā i kona makuahōnōwai kāne, ʻī akula iā ia, “E hele paha au, a hoʻi hou i oʻu poʻe hoahānau aia ma ʻAigupita, i ʻike ai au i ko lākou ola ʻana.” ʻĪ maila ʻo Ietero iā Mose, “Ō hele ʻoe me ka maluhia.”

¹⁹ ʻĪ maila ʻo Iēhova iā Mose ma Midiana, “E hele ʻoe, a e hoʻi hou i ʻAigupita; no ka mea, ua make nā kānaka a pau, ka poʻe i ʻimi e lawe i kou ola.”

²⁰ Lawe aʻela ʻo Mose i kāna wahine, a me kāna mau keiki kāne, a hoʻonoho akula iā lākou ma luna o ka hoki, a hoʻi akula ia i ka ʻāina ʻo ʻAigupita. A lawe pū akula ʻo Mose i ke koʻokoʻo o ke Akua ma loko o kona lima.

²¹ ʻĪ maila ʻo Iēhova iā Mose, “I kou hele ʻana aku e hoʻi i ʻAigupita, e ao ʻoe, e hana aku i mua o Paraʻo i nā hana mana a pau aʻu i waiho ai ma loko o kou lima; a naʻu nō e hoʻopaʻakikī i kona naʻau, i hoʻokuʻu ʻole ai ia i nā kānaka.

²² “E ʻōlelo aku ʻoe iā Paraʻo, ‘Ke ʻī mai nei ʻo Iēhova penei, “ʻO ʻIseraʻela nō kaʻu keiki kāne, ʻo kaʻu hiapo hoʻi.”’

²³ “Ke ʻōlelo aku nei au iā ʻoe, ‘E hoʻokuʻu ʻoe i kaʻu keiki, i mālama mai ia iaʻu: a inā e hōʻole mai ʻoe i kona hoʻokuʻu ʻia, aia hoʻi, e pepehi aku nō au i kāu keiki kāne, i kāu hiapo hoʻi.’”

²⁴ ¶ A hiki mai hoʻi ia ma ke ala, ma loko o ka hale kipa, hālāwai maila ʻo Iēhova me ia, a ʻimi ihola e pepehi iā ia.

²⁵ Lālau akula ʻo Zipora i pahi, a ʻoki poepoe ihola i ka ʻōmaka o kāna keiki kāne, a hoʻolei ihola ma kona mau wāwae, ʻī maila, “He kāne koko ʻoe naʻu.”

²⁶ Hoʻokuʻu ihola ʻo ia iā ia. A laila ʻōlelo aʻela ia, “He kāne koko ʻoe no ke ʻoki poepoe ʻana.”

²⁷ ¶ ʻĪ maila ʻo Iēhova iā ʻAʻarona, “E hele ʻoe e hālāwai me Mose ma ka wao nahele.” Hele akula ia, a hālāwai ihola ma ke kuahiwi o ke Akua, a honi aʻela iā ia.

²⁸ Haʻi aʻela ʻo Mose iā ʻAʻarona i nā ʻōlelo a pau a Iēhova, nāna ia i hoʻouna mai, a me nā ʻōuli a pau āna i kauoha mai ai iā ia.

²⁹ Hele akula ʻo Mose lāua ʻo ʻAʻarona, hoʻākoakoa ihola lāua i nā lunakahiko a pau o nā mamo a ʻIseraʻela.

³⁰ Haʻi akula ʻo ʻAʻarona i nā ʻōlelo a pau a Iēhova i ʻōlelo mai ai iā Mose; a hana ihola ia i nā ʻōuli i mua o nā maka o kānaka.

³¹ Manaʻoʻiʻo ihola nō hoʻi nā kānaka; a lohe pono nō lākou, ua ʻike mai ʻo Iēhova i ka poʻe mamo a ʻIseraʻela, a ua nānā mai hoʻi ʻo ia i ko lākou pōpilikia, a laila kūlou ihola ko lākou poʻo, a hoʻomana akula.