KA BUKE ʻALUA A MOSE, I KAPA ʻIA PUKA ʻANA 39 - Ka Baibala Hemolele

1 Ka lole hana, a me ke kāhiko laʻa. 2 Ka ʻēpoda. 8 Ka pale umauma. 22 Ka holokū o ka ʻēpoda. 27 Ka pālule a me ka pāpale a me ke kāʻei. Ka lei kapu. 32 ʻĀpono ʻia ia mau mea a pau e Mose.

MOKUNA XXXIX.

¹ ¶ A hana lākou i lole hana, he uliuli, he poni, he ʻulaʻula, i mea hana ma loko o kahi kapu, a hana nō hoʻi lākou i nā kāhiko laʻa no ʻAʻarona, e like me kā Iēhova i kauoha mai ai iā Mose.

² ¶ A hana ihola ʻo ia i ka ʻēpoda, he gula, he uliuli, he poni, he ʻulaʻula, a me ke olonā i hilo ʻia.

³ A kuʻi lākou i ke gula a lahilahi, a ʻokiʻoki ihola i kaula, i mea hana pū me ka uliuli, a me ka poni, a me ka ʻulaʻula, a me ke olonā i hilo ʻia, he hana na ka mea akamai.

⁴ Hana nō hoʻi lākou i mau ʻāpana poʻohiwi no ka ʻēpoda, i mea e uhi ʻia ʻo ia a paʻa. Ua hui ʻia ma nā kihi a ʻelua.

⁵ A ʻo ke kāʻei o kona ʻēpoda, ka mea ma luna ona, ʻo ia ʻano hoʻokahi nō, e like me ia i hana ʻia, he gula, he uliuli, he poni, he ʻulaʻula, a me ke olonā i hilo ʻia, me kā Iēhova i kauoha mai ai iā Mose.

⁶ ¶ A hana ihola lākou i pōhaku ʻonika, i hoʻopaʻa ʻia a puni i loko o nā kāwaha gula, i kahakaha ʻia e like me ke kahakaha ʻana o nā hōʻailona me nā inoa o nā keiki a ʻIseraʻela.

⁷ A kau akula ʻo ia ia mau mea ma luna o nā poʻohiwi o ka ʻēpoda, i pōhaku paipai manaʻo no nā mamo a ʻIseraʻela, me kā Iēhova i kauoha mai ai iā Mose.

⁸ ¶ A hana ihola ʻo ia i ka pale umauma, he hana na ka mea akamai, e like me ka hana ʻana i ka ʻēpoda, he gula, he uliuli, he poni, he ʻulaʻula, a me ke olonā i hilo ʻia.

⁹ He ʻahā like ia; a hana lākou i ka pale umauma a pāpālua; hoʻokahi kīkoʻo kona loa, a hoʻokahi kīkoʻo kona laulā, a ua pāpālua.

¹⁰ A kau lākou i loko o laila i ʻehā lālani pōhaku: he saredio, he topazo, he paea, ʻo ia ka lālani mua.

¹¹ A ʻo ka lālani lua: he ʻōmaʻomaʻo, he sapeiro, he daimana.

¹² A ʻo ka lālani kolu: he lesema, he ʻula, he ʻametuseto.

¹³ A ʻo ka lālani ʻahā: he berulo, he ʻonika, he iāsepi. Ua hoʻopaʻa ʻia ia mau mea i loko o nā kāwaha gula, ʻo ia ko lākou mea i paʻa ai.

¹⁴ A ua like nā pōhaku me nā keiki a ʻIseraʻela, he ʻumikumamālua: ma ko lākou inoa, e like me ke kahakaha ʻana o ka hōʻailona, ʻo kēlā mea kēia mea ma kona inoa, ma nā ʻohana he ʻumikumamālua.

¹⁵ A hana nō hoʻi lākou ma ka pale umauma i mau kaula ma nā wēlau, he gula maikaʻi i hilo ʻia.

¹⁶ A hana lākou i ʻelua kāwaha gula, a ʻelua hoʻi apo gula, a hoʻokomo aʻela i nā apo ʻelua i loko o nā wēlau o ka pale umauma.

¹⁷ A hoʻokomo lākou i nā kaula gula ʻelua i hilo ʻia a i loko ʻo nā apo ʻelua ma nā wēlau o ka pale umauma.

¹⁸ A hoʻopaʻa lākou i nā piko o nā kaula hilo ʻelua a i nā kāwaha ʻelua, a kau akula iā lāua ma luna o nā ʻāpana poʻohiwi o ka ʻēpoda, a ma kona alo.

¹⁹ A hana ihola lākou i ʻelua apo gula, a kau akula ma nā wēlau ʻelua o ka pale umauma, ma kona kaʻe, ma ka ʻaoʻao ma loko o ka ʻēpoda.

²⁰ A hana nō hoʻi lākou i ʻelua apo gula, a kau akula iā lāua ma nā ʻaoʻao ʻelua o ka ʻēpoda ma lalo iho, ma kona alo, e kū pono ana i ka huina, ma luna o ke kāʻei o ka ʻēpoda.

²¹ A nakinaki lākou i ka pale umauma ma nā apo ona, a paʻa i nā apo o ka ʻēpoda me ke kaula uliuli, i kau ia ma luna o ke kāʻei o ka ʻēpoda, i ʻole ai e wehe ʻia ka pale umauma mai ka ʻēpoda aku, me kā Iēhova i kauoha mai ai iā Mose.

²² ¶ A hana ihola ʻo ia i ka holokū o ka ʻēpoda, he hana na ka mea ulana, he uliuli wale nō.

²³ A he puka nō ma waenakonu o ka holokū, e like me ka puka o ka pūliki koa, ua pelupelu ʻia a puni ka puka, i ʻole ia e nahae.

²⁴ A hana lākou i mau pomegerane ma nā lepa o ka holokū, he uliuli, he poni, he ʻulaʻula, a me ke olonā i hilo ʻia.

²⁵ A hana nō hoʻi lākou i mau bele he gula maikaʻi, a kau akula i nā bele ma waena o nā pomegerane, ma ka lepa o ka holokū a puni nā pomegerane ma waena;

²⁶ he bele a me ka pomegerane, he bele a me ka pomegerane, a puni ka lepa o ka holokū hana, me kā Iēhova i kauoha mai ai iā Mose.

²⁷ ¶ A hana nō hoʻi lākou i mau pālule, he olonā i hilo ʻia, ʻo ka hana a ka mea ulana, no ʻAʻarona, a no kāna mau keiki kāne,

²⁸ a me ka pāpale hainakā, he olonā keʻokeʻo, a me nā pāpale migebo, he olonā keʻokeʻo, a me nā wāwae, he olonā i hilo ʻia,

²⁹ a me ke kāʻei he olonā i hilo ʻia, he uliuli, he poni, a me ka ʻulaʻula, he mea i humuhumu ʻia; me kā Iēhova i kauoha mai ai iā Mose.

³⁰ ¶ A hana nō hoʻi lākou i ka papa o ka pāpale laʻa, he gula maikaʻi, a palapala ihola i ka palapala e like me ke kahakaha ʻana o ka hōʻailona, “UA LAʻA NO IĒHOVA.”

³¹ A nakinaki lākou ia me ke kaula uliuli, i mea e paʻa ai ia ma luna, ma ka pāpale; me kā Iēhova i kauoha mai ai iā Mose.

³² ¶ A paʻa ihola ka hana a pau o ka halelewa, ka hale lole hoʻi o ke anaina kanaka. A hana ihola nā mamo a ʻIseraʻela, e like me nā mea a pau a Iēhova i kauoha mai ai iā Mose, pēlā lākou i hana ai.

³³ A lawe mai lākou i ka halelewa iā Mose, i ka hale lole, a me kona ʻoihana a pau, i kona mau lou, i kona mau papa, i kona mau ʻaukā e paʻa ai, i kona mau pou, i kona mau kumu;

³⁴ a me ka uhi ʻili hipa kāne i hoʻoluʻu ʻulaʻula ʻia, a me ka uhi ʻili tehasa, a me ka pākū e uhi ai;

³⁵ i ka pahu Kānāwai, a me kona mau ʻauamo, a me ka noho aloha;

³⁶ i ka papa ʻaina, a me kona ʻoihana, a me ka berena hōʻike;

³⁷ i ka ipukukui manamana maikaʻi, a me kona mau ipu ʻaila, e kū pololei ana, a me kona ʻoihana a pau, a me ka ʻaila no ka mālamalama;

³⁸ i ke kuahu gula, a me ka ʻaila poni a me ka mea ʻala maikaʻi, a me ka pale no ka puka o ka halelewa;

³⁹ i ke kuahu keleawe, a me kona pā keleawe manamana pukapuka, a me kona mau ʻauamo, a me kona ʻoihana a pau, i ka ipu ʻauʻau a me kona kumu;

⁴⁰ i nā pale o ke kahua, a me kona mau pou, a me kona mau kumu, a me ka pale no ka puka o ke kahua, a me kona mau kaula, a me kona mau mākia, a me nā mea hana a pau no ka halelewa, no ka hale lole o ke anaina kanaka;

⁴¹ i ka lole hana e hana ai i loko o kahi laʻa, a me nā kāhiko laʻa no ʻAʻarona ke kahuna, a me nā kāhiko o kāna mau keiki, e lawelawe ai ma ka ʻoihana kahuna.

⁴² E like me kā Iēhova i kauoha mai ai iā Mose, pēlā i hana ai nā mamo a ʻIseraʻela i ka hana a pau.

⁴³ A mākaʻikaʻi aʻela ʻo Mose i ka hana a pau, aia hoʻi, ua hana lākou ia e like me kā Iēhova i kauoha mai ai, pēlā nō lākou i hana ai. A hoʻomaikaʻi aʻela ʻo Mose iā lākou.