KA BUKE ʻALUA A MOSE, I KAPA ʻIA PUKA ʻANA 38 - Ka Baibala Hemolele

1 Ke kuahu no ka mōhai kuni. 8 Ka ipu ʻauʻau. 9 Ke kahua. 21 Ka nui o nā mea i hāʻawi ʻia.

MOKUNA XXXVIII.

¹ ¶ A hana nō hoʻi ʻo ia i ke kuahu no ka mōhai kuni; ʻelima kūbita kona lōʻihi, a ʻelima kūbita kona laulā, he ʻahā like: a ʻekolu kūbita kona kiʻekiʻe.

² A hana ʻo ia i kona mau pepeiao, ma nā kihi ʻehā ona; no ia mea hoʻokahi nō nā pepeiao, a uhi ʻo ia ia i ke keleawe.

³ A hana ʻo ia i nā ʻoihana a pau o ke kuahu: i nā ipu, a me nā pāpale, a me nā kīʻaha, a me nā ʻō ʻiʻo, a me nā ipu ahi; hana nō ʻo ia i kona ʻoihana a pau, he keleawe.

⁴ A hana nō hoʻi ʻo ia no ke kuahu, i papa manamana pukapuka ma lalo iho o ke kaʻe ona, ma waenakonu.

⁵ A hoʻoheheʻe ʻo ia i ʻehā mau apo no nā wēlau ʻehā o ua mea manamana keleawe lā, i wahi no nā ʻauamo.

⁶ A hana ʻo ia i nā ʻauamo, he lāʻau sitima, a uhi ihola iā lāua i ke keleawe.

⁷ A hoʻokomo ʻo ia i nā ʻauamo i loko o nā apo ma nā ʻaoʻao o ke kuahu i mea e lawe ai, a hana ʻo ia i ke kuahu, he papa lāʻau, ua kāwaha.

⁸ ¶ A hana ʻo ia i ka ipu ʻauʻau, he keleawe, ko loko o kona kumu, he keleawe, a me nā aniani keleawe o ka poʻe e ʻākoakoa nui ana, ka poʻe i ʻākoakoa ma ka puka o ka halelewa o ke anaina.

⁹ ¶ A hana ʻo ia i ke kahua, ma ka ʻaoʻao hema, ma ka hema hoʻi; a ʻo nā pale o ke kahua, he olonā ia i hilo ʻia, hoʻokahi haneri kūbita.

¹⁰ ʻO ko lākou mau pou, he iwakālua, ʻo ko lākou mau kumu keleawe, he iwakālua. ʻO nā lou o nā pou, a me ko lākou ʻaukā e paʻa ai, he kālā.

¹¹ A no ka ʻaoʻao ʻākau, hoʻokahi haneri kūbita, ʻo ko lākou mau pou, he iwakālua, a ʻo ko lākou mau kumu keleawe, he iwakālua. ʻO nā lou o nā pou, a me ko lākou ʻaukā e paʻa ai, he kālā.

¹² A no ka ʻaoʻao komohana, he pale nō, he kanalima kūbita ka lōʻihi, ʻo ko lākou mau pou, he ʻumi, a ʻo ko lākou mau kumu he ʻumi. ʻO nā lou o nā pou a me ko lākou ʻaukā e paʻa ai, he kālā.

¹³ A no ka ʻaoʻao hikina ma ka hikina, he kanalima kūbita.

¹⁴ A ʻo nā pale ma kekahi ʻaoʻao o ka puka, he ʻumikumamālima kūbita; a ʻo ko lākou mau pou ʻekolu, a ʻo ko lākou mau kumu, ʻekolu.

¹⁵ A no kēlā ʻaoʻao o ka puka o ke kahua, he mau pale ma kēia ʻaoʻao a ma kēlā ʻaoʻao, he ʻumikumamālima kūbita, ʻo ko lākou mau pou ʻekolu, a ʻo ko lākou mau kumu ʻekolu.

¹⁶ ʻO nā pale a pau a puni ke kahua, he olonā nō i hilo ʻia.

¹⁷ A ʻo nā kumu no nā pou, he keleawe ia. ʻO nā lou o nā pou, a me ko lākou mau ʻaukā e paʻa ai, he kālā nō. A ʻo ka uhi ʻana o ko lākou mau poʻo, he kālā; a paʻa nō nā pou a pau o ke kahua i nā ʻaukā kālā.

¹⁸ A ʻo ka pale o ka puka o ke kahua, he hana nō ia a ka mea humuhumu lope ʻano ʻē, he uliuli, he poni, he ʻulaʻula, he olonā i hilo ʻia; he iwakālua kūbita ka lōʻihi, a ʻo ke kiʻekiʻe ma ka laulā, ʻelima nō kūbita, e like me nā pale o ke kahua.

¹⁹ A ʻo ko lākou mau pou, ʻehā, a ʻo ko lākou mau kumu, ʻehā nō, he keleawe; ʻo ko lākou lou, he kālā, a ʻo ka uhi ʻana o ko lākou mau poʻo, a ʻo ko lākou mau ʻaukā e paʻa ai, he kālā nō.

²⁰ A ʻo nā mākia a pau o ka halelewa, a me ke kahua e puni ana, he keleawe nō ia.

²¹ ¶ Eia ka huina o ka halelewa, ʻo ka halelewa hoʻi o ke Kānāwai, e like me ia i helu ʻia, ma muli o ke kauoha a Mose, no ka hana a ko Levi, ma ka lima o ʻItamara, ke keiki a ʻAʻarona, ke kahuna.

²² A hana ihola ʻo Bezalela, ke keiki a ʻUri, ke keiki a Hura, no ka ʻohana a Iuda, i nā mea a pau a Iēhova i kauoha mai ai iā Mose.

²³ A me ia pū nō ʻo ʻAholiaba, ke keiki a ʻAhisamaka, no ka ʻohana a Dana, he kahuna kālai, he mea akamai i ka hana, a he mea humuhumu lope ʻano ʻē, he uliuli, a he poni, a he ʻulaʻula, a me ke olonā keʻokeʻo.

²⁴ ¶ A ʻo ke gula a pau i hana ʻia ma ka hana o ia mea laʻa, ʻo ke gula laʻa he iwakāluakumamāiwa tālena a me nā sekela ʻehiku haneri me kanakolu, ma ka sekela o ke keʻena kapu.

²⁵ A ʻo ke kālā o ka poʻe i helu ʻia o ka ʻaha kanaka, hoʻokahi haneri tālena, a me nā sekela hoʻokahi tausani, ʻehiku haneri, me kanahikukumamālima, ma ka sekela o ke keʻena kapu.

²⁶ He beka no kēlā kanaka kēia kanaka, he hapalua sekela hoʻi, ma ka sekela o ke keʻena kapu, no kēlā mea kēia mea i hele aʻe i ka helu ʻana, mai ka iwakālua o ka makahiki a keu aku, no nā kānaka ʻeono haneri kumamākolu tausani, ʻelima haneri, a me kanalima.

²⁷ A no loko o ia haneri tālena kālā, i hoʻoheheʻe ʻia ai nā kumu o ke keʻena kapu, a me nā kumu o ka pākū; hoʻokahi haneri kumu, no loko o ia mau haneri tālena, hoʻokahi tālena, hoʻokahi kumu.

²⁸ A no loko mai o ke tausani sekela a me nā haneri keu ʻehiku, a me kanahikukumamālima, hana ihola ʻo ia i mau lou no nā pou, a uhi ihola i ko lākou poʻo, a hoʻopaʻa aʻela iā lākou i nā ʻaukā.

²⁹ A ʻo ke keleawe o ka haʻawina, he kanahiku ia mau tālena, a me nā sekela keu ʻelua tausani, a me nā haneri ʻehā.

³⁰ A no loko o laila hana aʻela ʻo ia i nā kumu no ka puka o ka halelewa o ke anaina kanaka, a me ke kuahu keleawe, a me kona papa manamana pukapuka, a me ka ʻoihana a pau o ke kuahu,

³¹ a me nā kumu o ke kahua a puni, a me nā kumu o ka puka o ke kahua, a me nā mākia a pau o ka halelewa, a me nā mākia a pau o ke kahua a puni.