KA BUKE ʻALUA A MOSE, I KAPA ʻIA PUKA ʻANA 37 - Ka Baibala Hemolele

1 Ka pahu. 6 Ka noho aloha me nā kerubima. 10 Ka papa ʻaina me kona ʻoihana. 17 Ka ipukukui a me nā ipu ʻaila. 25 Ke kuahu no ka mea ʻaiā. 29 Ka ʻaila poni a me ka mea ʻala maikaʻi.

MOKUNA XXXVII.

¹ ¶ A hana ihola ʻo Bezalela i ka pahu, he lāʻau sitima; ʻelua kūbita a me ka hapalua kona lōʻihi, a hoʻokahi kūbita a me ka hapalua kona laulā; a hoʻokahi kūbita a me ka hapalua kona kiʻekiʻe.

² A uhi ihola ʻo ia ia mea i ke gula maikaʻi, ma loko, a ma waho, a hana ihola ʻo ia nona i lei gula a puni.

³ A hoʻoheheʻe ʻo ia i ʻehā apo gula nona, no kona mau kihi ʻehā; i ʻelua apo ma kekahi ʻaoʻao ona, a i ʻelua apo ma kekahi ʻaoʻao ona.

⁴ A hana ihola ʻo ia i mau ʻauamo lāʻau sitima, a uhi ihola ia mau mea i ke gula.

⁵ Hoʻokomo aʻela ʻo ia i nā ʻauamo i loko o nā apo, ma nā ʻaoʻao o ka pahu e amo ai i ka pahu.

⁶ A hana ihola ʻo ia i ka noho aloha, he gula maikaʻi; ʻelua kūbita a me ka hapalua kona loa, a hoʻokahi kūbita a me ka hapalua kona laulā.

⁷ A hana ihola ʻo ia i ʻelua kerubima, he gula paʻa wale nō, hoʻokahi ʻāpana ia i hana ai iā lāua ma nā wēlau o ka noho aloha.

⁸ Hoʻokahi kerubima ma kekahi wēlau, ma kēia ʻaoʻao, a ʻo kekahi kerubima ma kekahi wēlau ma kēlā ʻaoʻao. Ma luna o ka noho aloha ʻo ia i hana ai i nā kerubima, ma kona mau wēlau ʻelua.

⁹ A hohola aʻela nā kerubima i ko lāua mau ʻēheu i luna, a uhi aʻela ko lāua mau ʻēheu i ka noho aloha, a kū pono ihola ko lāua mau maka kekahi i kekahi, ma ka noho aloha nā maka o nā kerubima.

¹⁰ ¶ Hana nō hoʻi ʻo ia i ka papa ʻaina, he lāʻau sitima; ʻelua kūbita kona loa, hoʻokahi kūbita kona laulā, a hoʻokahi kūbita a me ka hapa kona kiʻekiʻe.

¹¹ A uhi ihola ʻo ia ia i ke gula maikaʻi, a hana aʻela i lei gula nona a puni.

¹² A hana nō hoʻi ʻo ia i kaʻe a puni ia mea, i hoʻokahi lima ka laulā, a hana aʻela ia i lei gula no ua kaʻe lā a puni.

¹³ A hoʻoheheʻe ʻo ia nona i ʻehā apo gula, a kau ʻo ia i nā apo ma nā kihi ʻehā ma kona mau wāwae ʻehā.

¹⁴ I kū pono nā apo i ke kaʻe, nā wahi e komo ai nā ʻauamo e lawe i ka papa ʻaina.

¹⁵ A hana ihola ʻo ia i nā ʻauamo, he lāʻau sitima, a uhi ihola iā lākou i ke gula, i mea e lawe ai i ka papa ʻaina.

¹⁶ A hana nō hoʻi ʻo ia i ka ʻoihana ma luna o ka papa: i kona mau kīʻaha, a me kona mau puna, a me kona mau ipu, a me nā poʻi e ninini ai, he gula maikaʻi.

¹⁷ ¶ A hana ihola ia i ka ipukukui manamana he gula maikaʻi, hana ʻo ia i ka ipukukui he gula wale nō a paʻa, ʻo kona kumu, a me kona lālā, ʻo kona mau puʻupuʻu, a me kona mau pua, ʻo ia ʻāpana hoʻokahi nō.

¹⁸ ʻEono nō lālā e puka ana ma waho o kona mau ʻaoʻao: ʻekolu manamana o ka ipukukui mai kekahi ʻaoʻao ona mai, a ʻekolu manamana o ka ipukukui, mai kēlā ʻaoʻao ona mai.

¹⁹ ʻEkolu nō ipu e like me nā ʻalemona ma ka mana hoʻokahi, he puʻupuʻu, a me ka pua; a ʻekolu nō ipu e like me nā ʻalemona ma kekahi mana, he puʻupuʻu a me ka pua; a pēlā wale nō ma nā manamana ʻeono, e puka ana ma waho o ka ipukukui manamana.

²⁰ ʻEhā nō ipu ma ke kumu kukui, ua hana ʻia e like me nā ʻalemona, ʻo kona mau puʻupuʻu, a me kona mau pua.

²¹ A he puʻupuʻu ma lalo o kona mau lālā ʻelua, a he puʻupuʻu ma lalo iho o kona mau lālā ʻelua, a he puʻupuʻu ma lalo iho o kona mau lālā ʻelua, e like me nā lālā ʻeono, e puka mai ana ma waho ona.

²² Hoʻokahi nō ʻāpana ko lākou puʻupuʻu, a me ko lākou manamana. Hoʻokahi nō ʻāpana ia hana a pau, he gula maikaʻi.

²³ A hana nō hoʻi ʻo ia i kona mau ipu ʻaila ʻehiku, a me kona mau ʻūpā ahi, a me kona mau ʻūpā koli kukui, he gula maikaʻi.

²⁴ Hana nō ʻo ia ia mea, a me kona ʻoihana a pau, hoʻokahi tālena gula maikaʻi.

²⁵ ¶ A hana nō hoʻi ʻo ia i ke kuahu no ka mea ʻala, he lāʻau sitima; hoʻokahi kūbita kona loa, hoʻokahi kūbita kona laulā, he ʻahā like; a ʻelua kūbita kona kiʻekiʻe, a hoʻokahi nō ia ʻāpana me kona mau pepeiao ʻelua.

²⁶ A uhi ʻo ia ia mea i ke gula maikaʻi: ma ko luna ona a me kona mau ʻaoʻao a puni, a me kona mau pepeiao. A hana nō hoʻi ʻo ia i lei gula a puni ia mea.

²⁷ A hana ihola ʻo ia i ʻelua apo gula nona, ma lalo iho o kona lei, ma kona mau kihi ʻelua, ma nā ʻaoʻao ona ʻelua, i wahi no nā ʻauamo, e amo ai ia mea.

²⁸ A hana ihola ʻo ia i nā ʻauamo, he lāʻau sitima, a uhi ihola ia mau mea i ke gula.

²⁹ A hana ihola ʻo ia i ka ʻaila poni laʻa, a me ka mea ʻala maikaʻi i hua ʻala loa, e like me ka hana ʻana a ka mea kaʻawili lāʻau.