KA BUKE ʻALUA A MOSE, I KAPA ʻIA PUKA ʻANA 36 - Ka Baibala Hemolele

1 Hāʻawi ʻia nā makana i ka poʻe paʻahana. 5 Hoʻōki ʻia ka hāʻawi ʻana. 8 Nā pākū kerubima. 14 Nā pākū hulu kao. 19 Ka uhi ʻili. 20 Nā papa. 31 Nā ʻauamo. 35 Ka pākū. 37 Nā pākū o ka puka.

MOKUNA XXXVI.

¹ ¶ “A laila hana ʻo Bezalela, a me ʻAholiaba, a me nā kānaka a pau i akamai ka naʻau, nā mea a Iēhova i hāʻawi mai ai i ke akamai, a me ka naʻauao e ʻike ai i ka hana i nā hana a pau no ka ʻoihana o ke keʻena kapu, e like me nā mea a pau a Iēhova i kauoha mai ai.”

² ¶ A hea akula ʻo Mose iā Bezalela, a me ʻAholiaba, a me nā kānaka a pau i akamai ma ka naʻau, a Iēhova i hāʻawi mai ai i naʻau akamai, i nā mea a pau hoʻi i ikaika ma ko lākou naʻau e hele e kōkua i ka hana.

³ A loaʻa iā lākou, na Mose aʻe, nā haʻawina a pau a nā mamo a ʻIseraʻela i lawe mai ai no ka hana o ka ʻoihana o ke keʻena kapu, i mea e paʻa ai ka hana. A lawe mai nō lākou iā ia i makana hou i kēlā kakahiaka, i kēia kakahiaka.

⁴ A hele maila nā kānaka akamai a pau, ka poʻe i hana i nā hana a pau o ke keʻena kapu, mai ka hana mai, a lākou i hana ai.

⁵ A ʻōlelo maila lākou iā Mose, ʻī maila, “Ke lawe mai nei nā kānaka a nui ʻokoʻa aku, ma mua o ka lawelawe ʻana i ka hana a Iēhova i kauoha mai ai e hana.”

⁶ A kauoha aʻela ʻo Mose, a hoʻokala akula lākou ia, a puni kahi i hoʻomoana ai, ʻī aʻela, “Mai hana hou kekahi kanaka, ʻaʻole hoʻi kekahi wahine i hana no ka haʻawina o ke keʻena kapu. A hoʻōki ʻia ihola ka lawe ʻana mai o nā kānaka.”

⁷ No ka mea, ua lawa nā mea e paʻa ai ka hana a pau e hana ʻia ai a keu aku nō.

⁸ ¶ A ʻo ka poʻe mea naʻau akamai a pau i hana i ka hana o ka halelewa, hana lākou i ʻumi mau pale, he olonā i hilo ʻia, he uliuli, he poni, a me ka ʻulaʻula; hana nō ʻo ia ia mau mea nā kerubima, ʻo ka hana a ka poʻe akamai.

⁹ He iwakāluakumamāwalu kūbita ka lōʻihi o kekahi pale, ʻehā kūbita ka laulā o kekahi pale, ua like hoʻi ka nui o nā pale a pau.

¹⁰ A hui pū ʻo ia i nā pale ʻelima, kekahi i kekahi, a hui pū ʻo ia i kekahi mau lima, kekahi i kekahi.

¹¹ A hana ihola nō hoʻi ia i nā puka lou uliuli, ma ke kaʻe o kekahi pale, ma ka pelupelu ʻana ma loko o ka huina. A pēlā nō ʻo ia i hana ai, ma ke kihi loa o kekahi pale, ma kahi i hui ʻia ai me ka lua.

¹² Hana nō ʻo ia i kanalima puka lou ma kekahi pale, a hana nō hoʻi i kanalima puka lou ma ke kaʻe o ka pale, kahi i hui ʻia ai me ka lua. ʻO nā puka lou ka mea i paʻa ai kekahi i kekahi.

¹³ A hana ʻo ia i kanalima lou gula, a hui ʻo ia i nā pale, kekahi me kekahi a paʻa i nā lou. A lilo ihola ia i halelewa hoʻokahi.

¹⁴ ¶ A hana nō hoʻi ʻo ia i pale hulu kao no ka hale ma luna o ka halelewa; hana ʻo ia ia mau mea, he ʻumikumamākahi pale.

¹⁵ He kanakolu kūbita ka lōʻihi o kekahi pale, a ʻehā nō kūbita ka laulā o kekahi pale; ua like ka nui o nā pale he ʻumikumamākahi.

¹⁶ A hui ʻo ia i ʻelima mau pale a kaʻawale lākou, a i ʻeono mau pale a kaʻawale lākou.

¹⁷ A hana ihola nō ʻo ia i kanalima puka lou ma ke kaʻe loa o kekahi pale ma ka hui ʻana, a hana nō hoʻi ʻo ia i kanalima puka lou ma ke kaʻe o ka pale i hui me ka lua.

¹⁸ A hana nō hoʻi ʻo ia i kanalima lou keleawe e paʻa ai ka hale, i lilo ia i hoʻokahi.

¹⁹ A hana nō hoʻi ʻo ia i uhi no ka hale, he mau ʻili hipa kāne i hoʻoluʻu ʻulaʻula ʻia, a ma luna aku, i uhi hou, he mau ʻili tehasa.

²⁰ ¶ A hana nō hoʻi ʻo ia i mau papa no ka halelewa, he lāʻau sitima, e kū pono ana i luna.

²¹ He ʻumi kūbita ka loa o kekahi papa, a hoʻokahi kūbita a me ka hapalua ka laulā o kekahi papa.

²² ʻElua nō komo ko ka papa hoʻokahi, ua like nō ke kaʻawale ʻana o kekahi, a me kekahi. Pēlā nō ia i hana ai no nā papa a pau o ka halelewa.

²³ A hana ʻo ia i papa no ka halelewa, he iwakālua papa no ka ʻaoʻao hema ma ka hema.

²⁴ A hana ʻo ia i hoʻokahi kanahā kumu kālā ma lalo iho o nā papa he iwakālua; ʻelua kumu ma lalo o ka papa hoʻokahi, no kona mau komo ʻelua, a ʻelua hoʻi kumu ma lalo o kekahi papa no kona mau komo ʻelua.

²⁵ A no kēlā ʻaoʻao hoʻi o ka halelewa, ma ke kihi ʻākau, hana nō ʻo ia i iwakālua papa,

²⁶ a me ko lākou kumu kālā he kanahā: ʻelua kumu ma lalo iho o kekahi papa, ʻelua hoʻi kumu ma lalo iho o kekahi papa.

²⁷ A no nā ʻaoʻao o ka halelewa, ma ke komohana, hana ʻo ia i ʻeono papa.

²⁸ A hana ʻo ia i ʻelua papa no nā kihi o ka halelewa, ma nā ʻaoʻao ʻelua.

²⁹ A ua hui ʻia ia mau mea ma lalo, a ua hui ʻia ma nā poʻo ma ke apo hoʻokahi. Pēlā nō ʻo ia i hana ai iā lāua a ʻelua, ma nā kihi ʻelua.

³⁰ ʻEwalu nō ia mau papa, a ʻo ko lākou mau kumu, he ʻumikumamāono kumu kālā, ʻelua nō kumu, a ʻelua hoʻi kumu ma lalo o ka papa hoʻokahi.

³¹ ¶ A hana nō ʻo ia i mau lāʻau kī, he lāʻau sitima: i ʻelima no nā papa ma kekahi ʻaoʻao o ka halelewa,

³² a i ʻelima hoʻi kī no nā papa o kekahi ʻaoʻao o ka halelewa, a i ʻelima hoʻi kī no nā papa o ka halelewa no nā ʻaoʻao ma ke komohana.

³³ A hana ihola ʻo ia i ka lāʻau kī ma waenakonu, e puka loa, mai kekahi kala a i kekahi kala.

³⁴ A wahī ihola ʻo ia i nā papa i ke gula, a hana ihola i ko lākou mau apo, he gula, i wahi no nā lāʻau kī, a wahī ihola i nā kī i ke gula.

³⁵ ¶ A hana ihola ʻo ia i pākū, he uliuli, a he ʻulaʻula, a he olonā i hilo ʻia, a hana nō hoʻi i nā kerubima, he hana na ka mea akamai.

³⁶ A hana ʻo ia i ʻehā kia nona, he lāʻau sitima, a uhi ʻo ia ia mau mea i ke gula. He gula nō ko lākou mau lou, a hoʻoheheʻe ʻo ia no lākou i mau kumu kālā ʻehā.

³⁷ Hana ihola nō hoʻi ʻo ia i pale no ka puka komo o ka halelewa, he uliuli, he poni, he ʻulaʻula, a me ke olonā i hilo ʻia, ka hana a ka mea humuhumu lope ʻano ʻē;

³⁸ a me nā kia ona ʻelima, a me ko lākou mau lou; a uhi nō hoʻi ʻo ia i ko lākou mau poʻo, a me ko lākou mau ʻaukā e paʻa ai i ke gula. Akā, he keleawe nō ko lākou mau kumu ʻelima.