KA BUKE ʻALUA A MOSE, I KAPA ʻIA PUKA ʻANA 35 - Ka Baibala Hemolele

1 Ka lā Sābati. 4 Nā mea hāʻawi no ka halelewa. 20 Makemake nā kānaka e hāʻawi. 30 Na Bezalela a me ʻAholiaba ka hana.

MOKUNA XXXV.

¹ ¶ Hoʻākoakoa ihola ʻo Mose i ka ʻaha kanaka a pau o kā ʻIseraʻela, ʻī maila iā lākou, “Eia nā ʻōlelo a Iēhova i kauoha mai ai, i hana ʻoukou ia mau mea.

² “I ʻeono lā e hana ʻia ai ka hana; akā ʻo ka hiku o ka lā, he lā hoʻāno ia, he Sābati e hoʻomaha ai no Iēhova. ʻO ka mea hana i ka hana ia lā, e pepehi ʻia ʻo ia.

³ “Mai hoʻā ʻoukou i ke ahi ma ko ʻoukou mau wahi e noho ai a pau loa, i ka lā Sābati.”

⁴ ¶ ʻŌlelo maila ʻo Mose i ka ʻaha kanaka a pau o kā ʻIseraʻela, ʻī maila, “Eia ka mea a Iēhova i kauoha mai ai, ʻī maila:

⁵ ‘E lawe ʻoukou, mai waena aku o ʻoukou, i mōhai na Iēhova; ʻo nā mea naʻau manawaleʻa a pau, e lawe mai lākou i mōhai na Iēhova: i gula, a i kālā, a i keleawe;

⁶ a i uliuli, a i poni, a i ʻulaʻula, a i olonā keʻokeʻo, a i hulu kao;

⁷ a me nā ʻili hipa kāne i hoʻoluʻu ʻulaʻula ʻia, a me nā ʻili tehasa, a me ka lāʻau sitima,

⁸ a me ka ʻaila no ka mālamalama, a me nā hua ʻala no ka ʻaila poni, a no ka mea ʻala maikaʻi;

⁹ a me nā pōhaku ʻonika, a me nā pōhaku e kau ai ma loko o ka ʻēpoda, a ma loko o ka pale umauma.

¹⁰ ¶ ‘A e hele mai nō nā mea naʻau akamai a pau, a e hana i nā mea a pau a Iēhova i kauoha mai ai:

¹¹ i ka halelewa, i kona hale lole a me kona uhi, a me kona mau lou, a me kona mau papa, a me kona mau ʻauamo, a me kona mau kia, a me kona mau kumu;

¹² i ka pahu, a me kona mau ʻauamo, a me ka noho aloha, a me ka pākū e uhi ai;

¹³ i ka papa ʻaina, a me kona mau ʻauamo, a me kona ʻoihana a pau, a me ka berena hōʻike;

¹⁴ i ka ipukukui hoʻi no ka mālamalama, a me kona ʻoihana, a me kona mau ipu ʻaila, me ka ʻaila no ka mālamalama;

¹⁵ i ke kuahu no ka mea ʻala, a me kona mau ʻauamo, a me ka ʻaila poni, a me ka mea ʻala maikaʻi, a me ka pākū no ka puka e komo aku ai i loko o ka halelewa;

¹⁶ i ke kuahu no ka mōhai kuni, a me kona papa manamana pukapuka, a me kona mau ʻauamo, a me kona mau ʻoihana a pau, a me ka ipu ʻauʻau, a me kona kumu;

¹⁷ i nā pākū o ke kahua, a me kona mau kia, a me ko lākou mau kumu, a me ka pākū no ka puka o ke kahua;

¹⁸ i nā mākia o ka halelewa, a me nā mākia o ke kahua, a me ko lākou mau kaula;

¹⁹ i nā lole no ka hana, e hana ai i ka hana ma kahi laʻa, i nā kāhiko laʻa no ʻAʻarona ke kahuna, a me nā kāhiko o kāna mau keiki kāne, e lawelawe ai ma ka ʻoihana kahuna.’”

²⁰ ¶ A hele akula ke anaina kanaka a pau o nā mamo a ʻIseraʻela, mai ko Mose alo aku.

²¹ A hele mai nō lākou, ʻo kēlā mea kēia mea i hoʻoʻeuʻeu ʻia e kona naʻau, ʻo kēlā mea kēia mea hoʻi i hoʻoikaika ʻia e kona ʻuhane, a lawe mai lākou i ko Iēhova haʻawina no ka hana o ka halelewa o ke anaina kanaka, a no kāna hana a pau, a no nā kāhiko laʻa.

²² A hele mai lākou, ʻo nā kāne, a me nā wāhine, ʻo ka poʻe a pau i makemake ma ka naʻau, a lawe maila i nā kūpeʻe lima, a me nā gula pepeiao, a me nā apo, a me nā gula ʻāʻī, a me nā mea gula a pau loa; a ʻo kēlā mea, kēia mea i hāʻawi, hāʻawi ʻo ia i gula no Iēhova.

²³ A ʻo kēlā kanaka kēia kanaka i loaʻa iā ia ka uliuli, ka poni, a me ka ʻulaʻula, a me ke olonā keʻokeʻo, a me ka hulu kao, a me nā ʻili ʻulaʻula o nā hipa kāne, a me nā ʻili tehasa, lawe mai nō lākou ia mau mea.

²⁴ ʻO kēlā mea kēia mea i hāʻawi i ka haʻawina kālā, a keleawe, lawe mai nō ʻo ia i kā Iēhova haʻawina. A ʻo kēlā kanaka kēia kanaka i loaʻa iā ia ka lāʻau sitima no kahi hana e hana ai, lawe maila ʻo ia ia.

²⁵ A ʻo nā wāhine a pau i akamai ma ka naʻau, milo lākou me ko lākou lima, a lawe maila i ka mea a lākou i milo ai, i ka uliuli, a me ka poni, a me ka ʻulaʻula, a me ke olonā keʻokeʻo.

²⁶ A ʻo nā wāhine a pau i hoʻoikaika ʻia ma ka naʻau, i mea e akamai ai, milo lākou i ka hulu kao.

²⁷ A lawe mai nā aliʻi i pōhaku ʻonika, a me nā pōhaku e kau ai ma ka ʻēpoda, a ma ka pale umauma;

²⁸ a me nā mea ʻala, a me ka ʻaila no ka mālamalama, a no ka ʻaila poni a me ka mea ʻala maikaʻi.

²⁹ Lawe mai nō nā mamo a ʻIseraʻela i makana aloha no Iēhova, ʻo kēlā kāne kēia kāne i makemake ma ka naʻau e lawe, no ka hana a pau a Iēhova i kauoha mai ai ma ka lima o Mose.

³⁰ ¶ ʻŌlelo maila ʻo Mose i nā mamo a ʻIseraʻela, “E nānā hoʻi, ma ka inoa nō i hea mai ai ʻo Iēhova iā Bezalela, i ke keiki a ʻUri, i ke keiki a Hura, no ka ʻohana a Iuda;

³¹ a ua hoʻopiha iā ia i ka ʻUhane o ke Akua, i ke akamai, a i ka naʻauao, a i ka ʻike, a i ke ʻano o nā hana a pau;

³² i ʻimi ʻo ia i nā hana akamai, e hana i ke gula, a i ke kālā, a i ke keleawe,

³³ a i ke ʻokiʻoki pōhaku ʻana, a me ke kāpilipili, i ke kālai lāʻau, a me ka hana i nā hana akamai a pau.

³⁴ A ua hāʻawi hoʻi ʻo ia i loko o kona naʻau i ke aʻo aku, ʻo ia, a me ʻAholiaba, ke keiki a ʻAhisamaka, no ka ʻohana a Dana.

³⁵ “Ua hoʻopiha ʻo ia iā lāua i ke akamai o ka naʻau, e hana i nā hana a pau, ʻo ka mea kahakaha, a me ka mea hana akamai, a me ka mea humuhumu i ka uliuli, a me ka poni, a me ka ʻulaʻula, a me ke olonā keʻokeʻo, a me ka mea ʻupena, a me ka mea hana i nā hana a pau, a me ka mea ʻimi i ka hana akamai.