KA BUKE ʻALUA A MOSE, I KAPA ʻIA PUKA ʻANA 33 - Ka Baibala Hemolele

1 Hōʻole mai ʻo Iēhova ʻaʻole e hele pū me nā kānaka. 4 Uē iho nō lākou. 7 Lawe ʻia ka halelewa i waho o kahi hoʻomoana ai. 9 Kamaʻilio mai ʻo Iēhova me Mose a kamaʻilio aku kēlā.

MOKUNA XXXIII.

¹ ¶ ʻŌlelo maila ʻo Iēhova iā Mose, “Ō hele, e piʻi aku, ʻo ʻoe a me nā kānaka āu i alakaʻi mai nei, mai ka ʻāina ʻo ʻAigupita mai, a i ka ʻāina aʻu i hoʻohiki ai iā ʻAberahama, a iā ʻIsaʻaka, a iā Iakoba, i ka ʻī ʻana iho, ‘Ke hāʻawi nei au ia na kāu poʻe mamo.’

² “A e hoʻouna aku au i koʻu ʻānela i mua ou; a naʻu nō e kipaku aku i kā Kanaʻana, i kā ʻAmora, i kā Heta, i kā Pereza, i kā Heva, a i kā Iebusa.

³ “A i ka ʻāina e kahe ana o ka waiū a me ka mele; no ka mea, ʻaʻole au e piʻi aku i waena ou; no ka mea, he poʻe kānaka ʻāʻī ʻoʻoleʻa ʻoukou; o hoʻopau auaneʻi au iā ʻoe ma ke ala.”

⁴ “A lohe nā kānaka i kēia ʻōlelo o ka hewa, uē ihola lākou, ʻaʻohe kanaka i hoʻokomo i kona kāhiko ʻana.

⁵ No ka mea, ua ʻōlelo mai ʻo Iēhova iā Mose, “E ʻī aku ʻoe i nā mamo a ʻIseraʻela, ‘He poʻe kānaka ʻāʻī ʻoʻoleʻa ʻoukou; i ka minute hoʻokahi, e piʻi aku nō au i waenakonu ou, a e hoʻopau iā ʻoe. No laila, e wehe ʻoe i kou kāhiko ʻana mai ou aku lā, i ʻike au i ka mea e hana aku ai iā ʻoe.’”

⁶ A wehe nā mamo a ʻIseraʻela i ko lākou kāhiko ʻana, ma ka mauna ʻo Horeba.

⁷ ¶ A lawe aʻela ʻo Mose i ka halelewa, a kūkulu ihola ma waho o kahi e hoʻomoana ai, ma kahi mamao aku o ke kahua i hoʻomoana ai; a kapa aʻela ʻo ia ia mea, ʻo ka halelewa o ke anaina kanaka. A ʻo kēlā mea kēia mea i ʻimi iā Iēhova, hele akula ia i waho i ka halelewa o ke anaina kanaka, ka mea ma waho o kahi i hoʻomoana ai.

⁸ A i ka hele ʻana aku o Mose i ka halelewa, ala aʻela nā kānaka a pau i luna, a kū nō kēlā kanaka kēia kanaka ma ka puka o kona halelewa, a nānā akula ma hope o Mose, a hala ia i loko o ka halelewa.

⁹ A i ko Mose komo ʻana i loko o ka halelewa, iho maila ke kia ao, a kū ma ka puka o ka halelewa, a kamaʻilio maila ʻo Iēhova me Mose.

¹⁰ A ʻike aʻela nā kānaka a pau i ke kia ao e kū ana ma ka puka o ka halelewa, a kū aʻela nā kānaka a pau i luna, a hoʻomana akula, ʻo kēlā kanaka kēia kanaka ma ka puka o kona halelewa.

¹¹ A kamaʻilio maila ʻo Iēhova iā Mose, he maka nō he maka, e like me ke kamaʻilio ʻana o ke kanaka me kona hoa. A hoʻi akula ia i loko o kahi e hoʻomoana ai, a me kāna kauā, ʻo Iosua, ke keiki a Nuna, he kanaka ʻōpiopio; akā, ʻaʻole ia i hele i waho o ka halelewa.

¹² ¶ ʻĪ akula ʻo Mose iā Iēhova, “E nānā hoʻi, ke ʻōlelo mai nei ʻoe iaʻu, ‘E kaʻi mai ʻoe i kēia poʻe kānaka’; ʻaʻole naʻe ʻoe i hōʻike mai iaʻu i ka mea āu e hoʻouna pū ai me aʻu. Akā, ua ʻōlelo mai nō, ‘Ua ʻike nō wau iā ʻoe ma ka inoa, a e loaʻa iā ʻoe ka lokomaikaʻi ʻia i koʻu mau maka.’

¹³ “No laila, ke nonoi aku nei au iā ʻoe, inā i loaʻa iaʻu ka lokomaikaʻi ʻia i kou mau maka, e hōʻike mai ʻoe iaʻu i kou ʻaoʻao, i ʻike aku au iā ʻoe, i loaʻa iaʻu ka lokomaikaʻi ʻia i kou mau maka; a e hoʻomanaʻo hoʻi, ʻo kou aupuni nō kēia poʻe kānaka.”

¹⁴ ʻĪ maila kēlā, “E hele pū nō koʻu maka, a naʻu nō ʻoe e hoʻomaha aku.”

¹⁵ ʻĪ akula kēia, “I ʻole e hele pū kou maka, mai lawe aku ʻoe iā mākou.

¹⁶ “Ma hea lā e ʻike ʻia ai ua loaʻa iaʻu a me kou poʻe kānaka ka lokomaikaʻi ʻia i kou maka? ʻAʻole anei ma kou hele pū ʻana me mākou? A pēlā mākou e hoʻokaʻawale ʻia ai, ʻo wau a me koʻu poʻe kānaka, mai nā kānaka ʻē aku a pau loa e noho ana ma luna o ka honua.”

¹⁷ ¶ ʻŌlelo maila ʻo Iēhova, iā Mose, “E hana nō hoʻi au i kēia mea āu i ʻōlelo mai ai; no ka mea, ua loaʻa iā ʻoe ka lokomaikaʻi ʻia i koʻu maka, a ua ʻike aku au iā ʻoe ma ka inoa.”

¹⁸ A ʻī akula kēia, “Ke nonoi aku nei au iā ʻoe, e hōʻike mai ʻoe i kou nani iaʻu.”

¹⁹ ʻŌlelo maila ia, “E hoʻohele au i koʻu maikaʻi a pau i mua o kou maka, a e hea aku au i ka inoa ʻo Iēhova i mua o kou maka; a e lokomaikaʻi aku au i ka mea aʻu e manaʻo ai e lokomaikaʻi aku, a e aloha aku au i ka mea aʻu e manaʻo ai e aloha aku.”

²⁰ A ʻī maila ia, “ʻAʻole hiki iā ʻoe ke ʻike mai i koʻu maka; no ka mea, ʻaʻohe kanaka e ʻike mai iaʻu, a ola.”

²¹ A ʻī maila ʻo Iēhova, “Aia kahi e kokoke ana iaʻu, a e kū nō ʻoe ma luna o ka pōhaku.

²² “A i ka wā e hele aʻe koʻu nani, e hoʻokomo nō wau iā ʻoe i loko o ka mauae o ka pōhaku, a e uhi aku au iā ʻoe i koʻu lima, iaʻu e hele aʻe ana.

²³ “A e lawe aku au i koʻu lima, a e ʻike mai ʻoe i koʻu kua; akā, ʻaʻole e ʻike ʻia koʻu maka.”