KA BUKE ʻALUA A MOSE, I KAPA ʻIA PUKA ʻANA 32 - Ka Baibala Hemolele

1 Ka hana ʻana i ka bipi keiki. 7 Huhū ke Akua. 11 Emi kona huhū no ka pule a Mose. 15 Iho maila ʻo Mose me nā papa. 19 Nahā. 20 Hoʻopau ʻo ia i ka bipi keiki. 25 Luku ʻia ka poʻe hoʻomana kiʻi. 30 Pule ʻo Mose no nā kānaka.

MOKUNA XXXII.

¹ ¶ A ʻike akula nā kānaka i ko Mose hoʻokaʻulua ʻana i ka iho mai, mai ka mauna mai, ʻākoakoa ihola na kānaka i o ʻAʻarona lā, ʻōlelo aʻela iā ia, “E kū ʻoe, e hana i akua no kākou, i mea hele ma mua o kākou; no ka mea, ʻo ua Mose lā, ke kanaka nāna kākou i alakaʻi mai nei, mai ka ʻāina ʻo ʻAigupita mai; ʻaʻole kākou ʻike i kona wahi i lilo aku ai.”

² ʻĪ maila ʻo ʻAʻarona iā lākou, “E uhaʻi ʻoukou i nā apo gula pepeiao, i nā mea i loko o nā pepeiao o kā ʻoukou wāhine, a me kā ʻoukou keiki kāne, a me kā ʻoukou kaikamāhine, a e lawe mai i oʻu nei.”

³ Uhaʻi ihola nā kānaka a pau i nā gula pepeiao, i nā mea i loko o ko lākou pepeiao, a lawe mai i o ʻAʻarona lā.

⁴ Lawe ihola ia, mai ko lākou lima aku, a koli ihola ia mea i ke kila, a hana aʻela i bipi keiki i hoʻoheheʻe ʻia; a ʻōlelo ihola lākou, “Eia kou akua, e kā ʻIseraʻela, nāna ʻoe i lawe mai nei, mai ka ʻāina ʻo ʻAigupita mai!”

⁵ A ʻike akula ʻo ʻAʻarona, hana ihola ia i kuahu i mua i ke alo o ia mea; hea akula ʻo ʻAʻarona, ʻī akula, Ē, ʻapōpō, he ʻahaʻaina na Iēhova.

⁶ A ia lā iho, ala koke aʻela lākou, a mōhai akula i mōhai kuni, a lawe mai nō hoʻi i mōhai hoʻomalu; a noho ihola nā kānaka e ʻai, a e inu, a kū aʻela i luna e pāʻani.

⁷ ʻĪ maila ʻo Iēhova iā Mose, “Ō hele ʻoe, e iho i lalo; ua hana hewa kou poʻe kānaka āu i lawe mai ai, mai ka ʻāina ʻo ʻAigupita mai.

⁸ “Ua huli koke aʻe lākou, mai ke ala aku aʻu i kauoha aku ai iā lākou; ua hana lākou i bipi keiki i hoʻoheheʻe ʻia no lākou, ua hoʻomana lākou ia mea, a ua mōhai hoʻi lākou iā ia, me ka ʻī ʻana aku, ‘E kā ʻIseraʻela ē, eia kou akua, nāna ʻoe i lawe mai nei, mai ka ʻāina ʻo ʻAigupita mai!”

⁹ ʻĪ maila ʻo Iēhova iā Mose, “Ua ʻike nō au i kēia poʻe kānaka, aia hoʻi, he poʻe kānaka ʻāʻī ʻoʻoleʻa!

¹⁰ “ʻĀnō hoʻi, e ʻae mai ʻoe iaʻu, i wela loa koʻu huhū iā lākou, i hoʻopau wau iā lākou; a naʻu nō e hana aku iā ʻoe i lāhui kanaka nui.”

¹¹ Nonoi akula ʻo Mose ma ke alo o Iēhova, ʻo kona Akua, ʻī akula, “E Iēhova, no ke aha lā i wela ai kou huhū i kou poʻe kānaka āu i lawe mai ai, mai ka ʻāina ʻo ʻAigupita mai, me ka mana nui, a me ka lima ikaika?

¹² “No ke aha lā e ʻōlelo mai ai ko ʻAigupita, me ka ʻī ʻana mai, ʻNo ka hewa i lawe mai ai ʻo ia iā lākou, e pepehi iā lākou ma nā mauna, a e luku aku iā lākou, mai ka maka aku o ka honua?’ E maliu mai ʻoe mai ka wela mai o kou huhū, a e aloha mai ʻoe no ka hewa e hiki mai ana i kou poʻe kānaka.

¹³ “E hoʻomanaʻo ʻoe iā ʻAberahama, iā ʻIsaʻaka, iā ʻIseraʻela, i kāu mau kauā, i kou hoʻohiki ʻana iā lākou ma ou iho; i kāu ʻōlelo ʻana mai iā lākou, ‘E hoʻonui ana au i kā ʻoukou ʻohana e like me nā hōkū o ka lani; a ʻo kēia ʻāina a pau aʻu i ʻōlelo ai, naʻu nō e hāʻawi aku no kā ʻoukou poʻe mamo, a e noho mau loa lākou ma ia ʻāina.’”

¹⁴ Maliu maila nō ʻo Iēhova mai ka hōʻino mai āna i manaʻo ai e hana mai i kona poʻe kānaka.

¹⁵ ¶ Huli maila ʻo Mose, a iho maila, mai ka mauna mai, aia hoʻi, ma loko o kona lima nā pōhaku papa Kānāwai ʻelua; ua palapala ʻia nā papa ma nā ʻaoʻao ʻelua, ua palapala ʻia nō ma kahi ʻaoʻao, a ma kahi ʻaoʻao.

¹⁶ ʻO ia mau papa kā ke Akua i hana ai, a ʻo ka palapala, na ke Akua ka palapala, ua kahakaha ʻia ma loko o nā papa.

¹⁷ A lohe ʻo Iosua i ka walaʻau o kānaka i ko lākou ʻuāʻuā ʻana, ʻī aʻela ia iā Mose, “He walaʻau kaua kā ma kahi e hoʻomoana ai.”

¹⁸ ʻĪ maila kēlā, “ʻAʻole ia he leo no ka poʻe ʻuāʻuā lanakila, ʻAʻole hoʻi ka leo o ka poʻe uē i ke pio ʻana; Akā, ʻo ka walaʻau mele kaʻu e lohe nei.”

¹⁹ A kokoke ia i hiki i kahi o lākou i hoʻomoana ai, ʻike akula ia i ka bipi keiki, a me ka haʻa ʻana; ulu puni ihola ko Mose huhū, kiola akula ia i nā papa, mai kona lima aku, a nahā ihola lāua ma lalo iho o ka mauna.

²⁰ Lawe ihola ia i ka bipi keiki a lākou i hana ai, a puhi akula i ke ahi, a hoʻowali ihola a okaoka, a lūlū akula ia ma luna o ka wai, a hoʻohāinu akula i nā mamo a ʻIseraʻela i ka wai.

²¹ ¶ ʻĪ akula ʻo Mose iā ʻAʻarona, “He aha ka mea a kēia poʻe kānaka i hana ai iā ʻoe, i hoʻoili mai ai ʻoe i kēia hewa nui ma luna o lākou?”

²² ʻĪ maila ʻo ʻAʻarona, “Mai ulu puni mai ka huhū o kuʻu haku, ua ʻike nō ʻoe i ka poʻe kānaka, ua paʻa lākou ma ke kolohe.

²³ “No ka mea, ʻōlelo mai lākou iaʻu, ‘E hana ʻoe i nā akua no kākou, e hele aku i mua o kākou; no ka mea, ʻo ua Mose nei, ke kanaka nāna kākou i lawe mai nei, mai ka ʻāina ʻo ʻAigupita mai, ʻaʻole kākou i ʻike i kona wahi i lilo aku ai.’

²⁴ “ʻĪ akula au iā lākou, ‘ʻO ka mea iā ia kekahi gula, e uhaʻi ʻo ia ia mea.’ Hāʻawi mai nō hoʻi lākou iaʻu; a laila hahao akula au ia mea i loko o ke ahi, a puka maila ma waho ua bipi keiki nei.”

²⁵ ¶ A ʻike maila ʻo Mose i nā kānaka, ua haunaele; (no ka mea, ua hoʻohaunaele ʻo ʻAʻarona iā lākou i ka luku ʻia i mua o ko lākou poʻe ʻenemi);

²⁶ a laila kū maila ʻo Mose ma ka puka o kahi a lākou i hoʻomoana ai, ʻī maila, “ʻO wai ka mea ma ko Iēhova ʻaoʻao? E hele mai ia i oʻu nei!” A ʻākoakoa pū maila nā mamo a pau a Levi i ona lā.

²⁷ ʻĪ maila ia iā lākou, “Ke ʻī mai nei ʻo Iēhova ʻo ke Akua o ʻIseraʻela penei, ‘E kau nā kānaka a pau i nā pahi kaua a lākou ma ko lākou ʻaoʻao, e hele aʻe lākou a hoʻi mai, ma kēlā ʻīpuka a kēia ʻīpuka o kahi hoʻomoana, a e pepehi ke kanaka i kona hoahānau, a ʻo ke kanaka i kona makamaka, a ʻo ke kanaka i kona hoalauna.’”

²⁸ Hana ihola nā mamo a Levi e like me ka ʻōlelo a Mose; a hāʻule ihola iā lākou ia lā nā kānaka ʻekolu paha tausani.

²⁹ No ka mea, ua ʻōlelo mai ʻo Mose, “E hoʻolaʻa ʻoukou iā ʻoukou iho no Iēhova i kēia lā, ʻo ke kanaka ma luna o kāna keiki a ma luna o kona hoahānau; i hoʻomaikaʻi mai kēlā iā ʻoukou i kēia lā.”

³⁰ ¶ A ia lā iho, ʻī maila ʻo Mose i nā kānaka, “Ua lawehala loa ʻoukou; ke piʻi aku nei nō hoʻi au i o Iēhova lā; e hana paha wau i mea e kala ʻia mai ai ko ʻoukou hewa.”

³¹ Hoʻi akula ʻo Mose i o Iēhova lā, ʻī akula, “Auē hoʻi, ua lawehala loa kēia poʻe kānaka, a ua hana i akua gula no lākou!

³² “ʻĀnō hoʻi, inā paha e kala mai ʻoe i ko lākou hewa—akā, i ʻole, ke nonoi aku nei au iā ʻoe e holoi mai ʻoe iaʻu, mai ka buke āu i palapala ai.”

³³ ʻĪ maila ʻo Iēhova iā Mose, “ʻO ka mea i lawehala i kaʻu, e holoi aku au iā ia, mai kaʻu buke aku.

³⁴ “No ia mea, ō hele ʻoe, e alakaʻi ia poʻe kānaka i kahi aʻu i ʻōlelo ai iā ʻoe: aia hoʻi, e hele nō koʻu ʻānela ma mua ou; akā hoʻi, i koʻu lā e hoʻopaʻi ai, e hoʻopaʻi aku au i ko lākou hewa ma luna o lākou.”

³⁵ Hahau maila Iēhova i nā kānaka no kā lākou hana ʻana i ka bipi keiki a ʻAʻarona i hana ai.