KA BUKE ʻALUA A MOSE, I KAPA ʻIA PUKA ʻANA 31 - Ka Baibala Hemolele

1 Hoʻomākaukau ʻia ʻo Bezalela a me ʻAholiaba no ka hana i ka halelewa. 12 Ka lā Sābati. 18 Loaʻa iā Mose nā papa Kānāwai.

MOKUNA XXXI.

¹ ¶ ʻŌlelo mai ʻo Iēhova iā Mose, ʻī maila:

² “E nānā hoʻi, ua kāhea aku au ma ka inoa, iā Bezalela, i ke keiki a ʻUri, i ke keiki a Hura, no ka ʻohana a Iuda.

³ “A ua hoʻopiha au iā ia i ka ʻUhane o ke Akua, ma ke akamai, ma ka naʻauao, ma ka ʻike, a ma ka hana ʻana i nā mea a pau,

⁴ e ʻimi i nā mea akamai, e hana hoʻi ma ke gula, a ma ke kālā, a ma ke keleawe,

⁵ a i ke ʻokiʻoki pōhaku, i mea kāpili; a i ke kālai ʻana i ka lāʻau, e hana hoʻi i nā hana a pau.

⁶ “A ʻo wau, aia hoʻi, ua hāʻawi nō wau iā ʻAholiaba nona, i ke keiki a ʻAhisamaka, no ka ʻohana a Dana; a ua hāʻawi nō wau i ke akamai ma loko o ka naʻau o ka poʻe a pau i naʻauao, i hana lākou i nā mea a pau aʻu i kauoha aku ai iā ʻoe:

⁷ i ka halelewa o ke anaina kanaka, a me ka pahu Kānāwai, a me ka noho aloha ma luna iho, a me ka ʻoihana a pau o ka halelewa,

⁸ a me ka papa ʻaina, a me kona ʻoihana, a me ka ipukukui, me kona ʻoihana a pau, a me ke kuahu no ka mea ʻala,

⁹ a me ke kuahu no ka mōhai kuni a me kona ʻoihana a pau, a me ka ipu ʻauʻau, a me kona kumu,

¹⁰ a me nā lole hana, a me nā kāhiko laʻa no ʻAʻarona ke kahuna, a me nā kāhiko no kāna mau keiki kāne e lawelawe ai ma ka ʻoihana kahuna,

¹¹ a me ka ʻaila poni, a me ka mea ʻala maikaʻi no kahi laʻa; e like me nā mea a pau aʻu i kauoha aku ai iā ʻoe, pēlā lāua e hana ai.”

¹² ¶ ʻŌlelo maila ʻo Iēhova iā Mose, ʻī maila,

¹³ “E ʻōlelo aku ʻoe i nā mamo a ʻIseraʻela, e ʻī aku, ‘E mālama ʻiʻo ʻoukou i koʻu mau Sābati; no ka mea, he hōʻailona ia ma waena oʻu a me ʻoukou, i ko ʻoukou mau hanauna; i ʻike hoʻi ʻoukou, ʻo wau nō Iēhova, ka mea hoʻolaʻa iā ʻoukou.

¹⁴ ‘No laila ʻoukou e mālama ai i ka Sābati; no ka mea, ua hoʻāno ʻia ia no ʻoukou. ʻO kēlā mea kēia mea hoʻohaumia ia lā, e ʻoiaʻiʻo nō e pepehi ʻia ʻo ia; no ka mea, ʻo ka mea hana i ka hana ia lā, e ʻoki ʻia kēlā kanaka, mai kona poʻe kānaka aku.

¹⁵ ‘ʻEono lā e hana ʻia ai ka hana; akā ʻo ka hiku, he Sābati ia e hoʻomaha ai, he mea laʻa no Iēhova, ʻo ka mea hana i kekahi hana i ka Sābati, e ʻoiaʻiʻo nō e pepehi ʻia ʻo ia.

¹⁶ ‘A e mālama nā mamo a ʻIseraʻela i ka Sābati e hoʻoponopono i ka Sābati, i ko lākou hanauna, i berita mau loa.

¹⁷ ‘He hōʻailona mau loa ia ma waena oʻu a me nā mamo a ʻIseraʻela; no ka mea, i nā lā ʻeono i hana ai ʻo Iēhova i ka lani, a me ka honua, a i ka hiku o ka lā, hoʻomaha ʻo ia, a ʻoluʻolu ihola.’”

¹⁸ ¶ A i kona hoʻopau ʻana i ke kamaʻilio me Mose, ma luna o ka mauna ʻo Sinai, hāʻawi maila ʻo ia iā ia i ʻelua papa Kānāwai he mau papa pōhaku, ua kahakaha ʻia e ka lima o ke Akua.