KA BUKE ʻALUA A MOSE, I KAPA ʻIA PUKA ʻANA 30 - Ka Baibala Hemolele

1 Ke kuahu no ka mea ʻala. 11 He uku no ke ola. 17 Ka ipu ʻauʻau. 22 Ka ʻaila poni laʻa. 34 Ka hana ʻana i ka mea ʻala.

MOKUNA XXX.

¹ ¶ “E hana ʻoe i kuahu, i wahi e puhi ai i ka mea ʻala. E hana ʻoe ia mea i ka lāʻau sitima.

² “Hoʻokahi kūbita kona lōʻihi, a he kūbita hoʻi kona laulā; e hana ʻia nā ʻaoʻao ʻahā like, a ʻelua kūbita kona kiʻekiʻe, ʻo ia mea hoʻokahi me nā pepeiao ona.

³ “A e uhi ʻoe ia mea i ke gula maikaʻi, ʻo ko luna, a me nā ʻaoʻao ona a puni, a me kona mau pepeiao, a e hana ʻoe i lei gula a puni ia mea.

⁴ “A e hana ʻoe i mau apo gula nona ʻelua, ma lalo iho o kona lei; ma kona mau kihi, ma nā ʻaoʻao ʻelua ona kau e hana ai ia mea; i mau wahi ia no nā ʻauamo e lawe ai i ke kuahu.

⁵ “A e hana ʻoe i nā ʻauamo, he lāʻau sitima, a e wahī ia mau mea i ke gula.

⁶ “A e waiho ʻoe ia mea i mua o ka pākū e kau ana i mua o ka pahu Hōʻike, i mua hoʻi o ka noho aloha e kau ana ma luna o ka pahu Kānāwai, kahi aʻu e hālāwai ai me ʻoe.

⁷ “A e puhi ʻo ʻAʻarona ma luna o laila i mea ʻala maikaʻi, i kēlā kakahiaka, kēia kakahiaka; i kona wā e koli ai i nā kukui, e puhi ʻo ia i ka mea ʻala ma luna o laila.

⁸ “A i ka wā e hoʻā ai ʻo ʻAʻarona i nā kukui i ke ahiahi, e puhi nō ʻo ia i ka mea ʻala ma luna o laila, he mea ʻala hoʻomau no ko ʻoukou mau hanauna a pau.

⁹ “Mai kaumaha ʻoe i ka mea ʻala ʻē ma luna o laila, ʻaʻole hoʻi he mōhai kuni, ʻaʻole hoʻi he mōhai makana, mai ninini hoʻi i ka mōhai inu ma luna o laila.

¹⁰ “A ma luna o kona mau pepeiao, e kalahala ai ʻo ʻAʻarona, i hoʻokahi kalahala ʻana o ka makahiki, me ke koko o ka mōhai hala o ke kalahala ʻana. E kalahala nō ʻo ia ma luna o laila, i hoʻokahi nō hana ʻana o ka makahiki no ko ʻoukou hanauna; ua laʻa loa ia no Iēhova.”

¹¹ ¶ ʻŌlelo maila ʻo Iēhova iā Mose, ʻī maila:

¹² “I ka wā e helu ai ʻoe i nā mamo a ʻIseraʻela, i ka poʻe e helu ʻia ai, a laila, e hāʻawi nō kēlā kanaka, kēia kanaka i uku iā Iēhova, no kona ʻuhane, i ka wā āu e helu ai iā lākou, i ʻole ai ka maʻi ahulau i waena o lākou, i kou wā e helu ai iā lākou.

¹³ “Eia kā lākou e hāʻawi mai ai, ʻo kēlā mea kēia mea e hele aʻe ma waena o ka poʻe i helu ʻia, he hapalua o ka sekela, ma ka sekela o ke keʻena kapu, (he iwakālua gera hoʻokahi ia sekela,) a he hapalua o ka sekela, ʻo ia ka haʻawina iā Iēhova.

¹⁴ “ʻO kēlā mea kēia mea e hele aʻe i waena o ka poʻe i helu ʻia, mai ka iwakālua o ka makahiki a keu aku, e hāʻawi nō ʻo ia i haʻawina iā Iēhova.

¹⁵ “ʻAʻole hoʻokeu aku ka mea waiwai, ʻaʻole hoʻi ka mea hune e hoʻēmi iho i ka hapalua o ka sekela i ko lākou hāʻawi ʻana iā Iēhova, e kalahala ai no ko ʻoukou ʻuhane.

¹⁶ “A e lawe ʻoe i ke kālā kalahala o nā mamo a ʻIseraʻela, a e hāʻawi ia mea no ka hana o ka halelewa o ke anaina kanaka, i lilo ia i mea paipai manaʻo no nā mamo a ʻIseraʻela i mua o Iēhova, i mea hoʻi e kalahala ai no ko ʻoukou poʻe ʻuhane.”

¹⁷ ¶ ʻŌlelo maila ʻo Iēhova iā Mose, ʻī maila:

¹⁸ “E hana nō ʻoe i ipu ʻauʻau keleawe, a ʻo kona kumu hoʻi he keleawe, i wahi e holoi ai. A e waiho ʻoe ia mea ma waena o ka halelewa o ke anaina kanaka, a me ke kuahu, a e ninini ʻoe i ka wai ma loko.

¹⁹ “No ka mea, ma laila nō e holoi ai ʻo ʻAʻarona, a me kāna mau keiki i ko lākou mau lima, a me ko lākou mau wāwae.

²⁰ “A hele lākou i loko o ka halelewa o ke anaina kanaka, a laila, e holoi lākou me ka wai, i ʻole ai lākou e make; a i ka manawa hoʻi e hoʻokokoke mai ai lākou i ke kuahu e lawelawe ai, e puhi i mōhai ahi no Iēhova.

²¹ “I holoi lākou i ko lākou mau lima, a me ko lākou mau wāwae, i ʻole ai lākou e make. He kānāwai mau loa ia no lākou, nona, a no kāna poʻe mamo ma ko lākou hanauna.”

²² ¶ ʻŌlelo mai nō hoʻi ʻo Iēhova iā Mose, ʻī maila:

²³ “E lawe ʻoe nou i mau hua ʻala nui, i mura maikaʻi, ʻelima haneri sekela, a i kinemona ikaika, he hapalua, ʻelua hoʻi haneri sekela, a me ke kanalima, a i ʻohe ʻala, ʻelua haneri a me ke kanalima sekela,

²⁴ a i kida, ʻelima haneri sekela, ma ka sekela o ke keʻena kapu, a i hoʻokahi hina ʻaila ʻoliva.

²⁵ “A e hana ʻoe ia i ʻaila poni hoʻāno, he mea poni i hui ʻia ma ke ʻano o ka hana ʻana i nā mea ʻala. E lilo ia i ʻaila poni hoʻāno.

²⁶ “A me ia nō ʻoe e poni ai i ka halelewa o ke anaina kanaka, a me ka pahu o ke Kānāwai,

²⁷ a me ka papa ʻaina, a me kona mau ʻoihana a pau, a me ka ipukukui, a me kona mau ʻoihana a pau, a me ke kuahu no ka mea ʻala,

²⁸ a me ke kuahu no ka mōhai kuni, a me kona mau ʻoihana a pau, a me ka ipu ʻauʻau, a me kona kumu,

²⁹ a e hoʻolaʻa ʻoe ia mau mea, i laʻa loa lākou; ʻo nā mea a pau e pili ana me ia mau mea, e laʻa nō lākou.

³⁰ “A e poni nō hoʻi ʻoe iā ʻAʻarona, a me kāna mau keiki kāne, a e hoʻolaʻa iā lākou, i lawelawe lākou naʻu ma ka ʻoihana kahuna.

³¹ “A e ʻōlelo aku ʻoe i nā mamo a ʻIseraʻela, e ʻī aku, ‘He ʻaila poni hoʻāno kēia noʻu, ma ko ʻoukou mau hanauna.

³² ‘ʻAʻole ia e ninini ʻia ma luna o ka ʻiʻo o ke kanaka, mai hana hoʻi ʻoe i kekahi mea hamo like, ma ke ʻano hoʻokahi me ia; ua laʻa ia, a e laʻa auaneʻi ia no ʻoukou.

³³ ‘ʻO ka mea hana i mea ʻala e like me ia, a ʻo ka mea kau ia mea ma luna o ka malihini, e ʻoki ʻia ʻo ia mai kona poʻe kānaka aku.’”

³⁴ ¶ ʻĪ maila ʻo Iēhova iā Mose, “E lawe ʻoe i mea ʻala nou, i natapa, i ʻonika, a i metopio, ia mau mea ʻala, a me ka libano, e like nō ke kaumaha o ia mau mea a pau.

³⁵ “A e hana ʻoe he mea ʻala, i lāʻau poni hoʻi, e like me ka hana ʻana i nā mea ʻala, i hana ʻia a miko, maikaʻi, a laʻa hoʻi.

³⁶ “A e kuʻi ʻoe i kekahi o ia mea a wali loa, a e kau aku i mua o ke Kānāwai, ma loko o ka halelewa o ke anaina kanaka, kahi aʻu e hālāwai ai me ʻoe. E laʻa loa auaneʻi ia no ʻoukou.

³⁷ “A ʻo ka mea ʻala aʻu e hana ai, mai hana ʻoukou i mea e like ai no ʻoukou; e laʻa nō ia iā ʻoe no Iēhova.

³⁸ “ʻO ka mea hana e like me ia, i mea e honi ai, e ʻoki ʻia nō ia, mai kona poʻe kānaka aku.”