KA BUKE ʻALUA A MOSE, I KAPA ʻIA PUKA ʻANA 3 - Ka Baibala Hemolele

1 Kā Iēhova kamaʻilio ʻana me Mose. 7 Hoʻouna ke Akua iā ia e hoʻopakele i kā ʻIseraʻela. 19 Ka paʻakikī ʻana o Paraʻo.

MOKUNA III.

¹ ¶ Hānai ihola ʻo Mose i nā holoholona a Ietero a kona makuahōnōwai kāne, a ke kahuna ma Midiana; alakaʻi akula nō ia i nā holoholona ma ke kua o ka wao nahele, a hiki akula i ke kuahiwi o ke Akua, i Horeba.

² ʻIkea maila e ia ka ʻānela o Iēhova ma loko o ka lapalapa o ke ahi ma waenakonu o ka laʻalāʻau; nānā akula ia, aia hoʻi, e ʻaʻā ana ka laʻalāʻau i ke ahi, ʻaʻole naʻe i pau ka lāʻau.

³ ʻĪ ihola ʻo Mose, “E kipa aʻe nō wau e ʻike i kēia mea nui, i ka mea i pau ʻole ai ka lāʻau i ke ahi.”

⁴ A ʻike maila ʻo Iēhova i kona huli ʻana e mākaʻikaʻi, hea maila ke Akua iā ia mai loko mai o ua laʻalāʻau lā, “E Mose, e Mose!” ʻĪ akula ia, “Eia nō wau.”

⁵ ʻĪ maila kēlā, “Mai hoʻokokoke mai ʻoe; e wehe aʻe ʻoe i kou mau kāmaʻa mai kou mau kapuaʻi aku; no ka mea, ʻo kahi āu e kū nei, he ʻāina hoʻāno ia.”

⁶ ʻĪ maila hoʻi ʻo ia, “ʻO wau nō ke Akua o kou makua kāne, ke Akua o ʻAberahama, ke Akua o ʻIsaʻaka, ke Akua hoʻi o Iakoba.” Papani ihola ʻo Mose i kona maka; no ka mea, ua makaʻu ia ke nānā aku i ke Akua.

⁷ ʻĪ maila ʻo Iēhova, “I kuʻu nānā ʻana ua ʻike nō wau i ka luhi ʻana o koʻu poʻe kānaka ma ʻAigupita, ua lohe nō hoʻi au i kā lākou kaniʻuhū ʻana, no nā luna hoʻoluhi o lākou; ua ʻike hoʻi au i ko lākou ʻehaʻeha ʻana.

⁸ “Ua iho mai nei au i lalo nei e hoʻokuʻu iā lākou mai ka lima mai o ko ʻAigupita, a e lawe mai iā lākou mai ia ʻāina mai, a kekahi ʻāina maikaʻi, a nui nō hoʻi, he ʻāina e kahe ana ʻo ka waiū a me ka meli; i kahi o ka poʻe Kanaʻana, a me kā Heta, a me kā ʻAmora, a me kā Pereza, a me kā Heva, a me kā Iebusa.

⁹ “Eia hoʻi; no ka mea, ua hiki mai i oʻu nei ke kaniʻuhū ʻana o nā mamo a ʻIseraʻela; a ua ʻike nō hoʻi au i ka luhi ʻana a ko ʻAigupita i hoʻoluhi iho ai iā lākou.

¹⁰ “No laila lā, e hele mai ʻoe, a naʻu nō ʻoe e hoʻouna aku i o Paraʻo lā, i lawe mai ai ʻoe i oʻu poʻe kānaka, i nā mamo a ʻIseraʻela mai loko aʻe o ʻAigupita.”

¹¹ ʻĪ akula ʻo Mose i ke Akua, “ʻO wai lā wau, i hele aku ai au i o Paraʻo lā, a i lawe mai ai hoʻi au i nā mamo a ʻIseraʻela mai loko mai o ʻAigupita?”

¹² ʻĪ maila kēlā, “He ʻoiaʻiʻo, ʻo wau nō kekahi me ʻoe, eia hoʻi ka hōʻailona o koʻu hoʻouna ʻana aku iā ʻoe; i ka wā āu e lawe mai ai i ka poʻe kānaka mai ʻAigupita mai, e hoʻomana auaneʻi ʻoukou i ke Akua ma kēia kuahiwi.”

¹³ ¶ Nīnau akula ʻo Mose i ke Akua, “Aia hoʻi, a hiki aku au i nā mamo a ʻIseraʻela, a e ʻōlelo au iā lākou, ʻNa ke Akua o ko ʻoukou poʻe kūpuna ʻo wau i hoʻouna mai i o ʻoukou nei,’ a e nīnau lākou iaʻu, ʻʻO wai kona inoa?’ Pehea lā hoʻi kaʻu e ʻōlelo aku ai iā lākou?”

¹⁴ ʻĪ maila ke Akua iā Mose, “ʻO WAU MAU LOA AKU NŌ.” ʻĪ maila hoʻi ʻo ia, “Penei kāu e ʻōlelo aku ai i nā mamo a ʻIseraʻela, ʻʻO WAU MAU, ʻo ia kai hoʻouna mai iaʻu i o ʻoukou nei.’”

¹⁵ ʻĪ hou maila ke Akua iā Mose, “Penei ʻoe e ʻōlelo aku ai i nā mamo a ʻIseraʻela, ‘Na Iēhova ke Akua o ko ʻoukou poʻe kūpuna, ke Akua o ʻAberahama, ke Akua o ʻIsaʻaka, ke Akua o Iakoba, ʻo wau i hoʻouna mai i o ʻoukou nei! ʻO ia nō koʻu inoa mau loa, ʻo ia hoʻi koʻu mea e hoʻomanaʻo ʻia ai ia hanauna aku ia hanauna aku.

¹⁶ “Ō hele ʻoe, a e hoʻākoakoa aʻe i ka poʻe lunakahiko o kā ʻIseraʻela, a e ʻōlelo aku iā lākou, ‘Ua ʻike ʻia aku e aʻu ʻo Iēhova ke Akua o ko ʻoukou poʻe kūpuna, ke Akua o ʻAberahama, ʻo ʻIsaʻaka a ʻo Iakoba; ua ʻōlelo mai ʻo ia, “Ua ʻike ʻiʻo nō au iā ʻoukou, a me ka mea i hana ʻia mai iā ʻoukou ma ʻAigupita.”’

¹⁷ “Ua ʻōlelo hoʻi au, ‘Naʻu nō ʻoukou e lawe aku i luna, mai loko aʻe o ka pōpilikia o ʻAigupita, a hiki i ka ʻāina o kā Kanaʻana a me kā Heta a me kā ʻAmora a me kā Pereza a me kā Heva, a me kā Iebusa, i ka ʻāina e kahe ana ʻo ka waiū a me ka meli.’

¹⁸ “A e hoʻolohe mai lākou i kou leo; a e hele pū ʻoe me ka poʻe lunakahiko o kā ʻIseraʻela i ke aliʻi o ʻAigupita, a e ʻōlelo aku ʻoukou iā ia, ‘Ua hālāwai mai me mākou o Iēhova ke Akua o ka poʻe Hebera; no ia mea, e hoʻokuʻu mai ʻoe iā mākou e hele ma ka wao nahele, i ʻekolu lā hele, e kaumaha aku ai na Iēhova ko mākou Akua.’

¹⁹ “Ua ʻike nō naʻe au, ʻaʻole e hoʻokuʻu mai ke aliʻi o ʻAigupita iā ʻoukou, ʻaʻole nō ma ka lima ikaika.

²⁰ “Akā, e ʻō aku nō wau i koʻu lima, a e paopao wau iā ʻAigupita me nā mea mana a pau aʻu e hana aku ai ma waenakonu o lākou; a ma hope e hoʻokuʻu nō ʻo ia iā ʻoukou.

²¹ “A e hāʻawi aku wau i ka lokomaikaʻi i kēia poʻe kānaka i mua o nā maka o ko ʻAigupita, a i ka wā a ʻoukou e hele mai ai, ʻaʻole ʻoukou e hele nele mai.

²² “E noi aku nō kēlā wahine kēia wahine i kona hoalauna, a i ka mea e noho pū ana ma loko o kona hale, i nā mea kālā, a me nā mea gula, a me nā mea ʻaʻahu, a e hōʻaʻahu iho ʻoukou i kā ʻoukou poʻe keiki kāne, a me kā ʻoukou poʻe kaikamāhine; e hao hoʻi ʻoukou i ko ʻAigupita.”