KA BUKE ʻALUA A MOSE, I KAPA ʻIA PUKA ʻANA 26 - Ka Baibala Hemolele

1 Na pale he ʻumi o ka halelewa. 7 He ʻumikumamākolu mau pale hulu kao. 15 Nā papa o ka halelewa, a me nā kumu, a me nā kī. 31 Ka pale o ka pahu. 36 Ka pale o ka puka.

MOKUNA XXVI.

¹ ¶ “E hana nō ʻoe i ka halelewa me nā pale he ʻumi: he olonā i hilo ʻia, he uliuli, he poni a me ka ʻulaʻula; he mau kerubima kekahi, ʻo ka hana a ka poʻe akamai.

² “He iwakāluakumamāwalu kūbita ka loa o kekahi pale, a ʻo ka laulā o kekahi pale, ʻehā nō kūbita. Hoʻokahi nō ana o nā pale a pau.

³ “E hui ʻia nā pale ʻelima, ʻo kekahi me kekahi, a e hui ʻia nā pale ʻelima, ʻo kekahi me kekahi.

⁴ “A e hana ʻoe i mau puka lou lole uliuli ma ke kihi o kekahi pale, ma ke kaʻe kahi o ka hui ʻana, a e hana nō hoʻi ʻoe pēlā ma ke kihi loa o kekahi pale, ma ke kihi e hui ai me ka lua.

⁵ “E hana ʻoe i kanalima puka lou ma ka pale hoʻokahi, a e hana hoʻi i kanalima puka lou ma ke kihi o ka pale, ma ka hui ʻana o ka lua, i lou aʻe kekahi puka lou i kekahi puka lou.

⁶ “E hana nō hoʻi ʻoe i kanalima lou gula, a e hui i nā pale me ua mau lou lā. A e lilo i halelewa hoʻokahi.

⁷ ¶ “A e hana ʻoe i mau pale hulu kao i mea uhi ma luna o ka halelewa. I ʻumikumamākahi pale kāu e hana ai.

⁸ “He kanakolu kūbita ka lōʻihi o kekahi pale, a i ʻehā kūbita ka laulā o kekahi pale. E like nō ke ana o ua mau pale lā, he ʻumikumamākahi.

⁹ “A e hui ʻoe i ʻelima mau pale, i kaʻawale lākou, a e hui i ʻeono mau pale, i kaʻawale lākou, a e pelu aʻe i ke ono o ka pale ma ke alo o ka halelewa.

¹⁰ “A e hana ʻoe i kanalima puka lou ma ke kihi o kekahi pale ma waho, ma ka hui ʻana, a i kanalima puka lou ma ke kihi o ka pale i hui me ka lua.

¹¹ “A e hana ʻoe i kanalima lou keleawe, a e hoʻokomo i ua mau lou lā i loko o nā puka lou, a e hui i ua uhi lā, i lilo ai i hoʻokahi.

¹² “A ʻo ka puehu ka mea i puehu aku o nā pale o ua uhi lā, a ka hapalua o ka pale puehu, e kau nō ia ma ke kua o ka halelewa.

¹³ “A ʻo ke kūbita ma kekahi ʻaoʻao, a ʻo ke kūbita ma kēlā ʻaoʻao, ka mea i puehu o ka lōʻihi o nā pale o ka hale, e kaulaʻi nō ia ma nā ʻaoʻao o ka halelewa, ma kēlā ʻaoʻao, a ma kēia ʻaoʻao, i mea uhi nona.

¹⁴ “E hana nō hoʻi ʻoe i uhi no ka hale he mau ʻili hipa kāne i hoʻoluʻu ʻulaʻula ʻia, a ma luna aku i uhi hou, he mau ʻili tehasa.

¹⁵ ¶ “A e hana ʻoe i mau papa lāʻau sitima no ka halelewa, i mea kū i luna.

¹⁶ “He ʻumi kūbita ka lōʻihi o kekahi papa, a he kūbita a me ka hapalua ka laulā o kekahi papa.

¹⁷ “ʻElua komo ma ka papa hoʻokahi, e kū pono kekahi i kekahi. Pēlā nō ʻoe e hana ai ma nā papa a pau o ka halelewa.

¹⁸ “A e hana nō hoʻi ʻoe i nā papa o ka halelewa, i iwakālua papa ma ka ʻaoʻao hema, ma ke kūkulu hema hoʻi.

¹⁹ “A e hana nō hoʻi ʻoe i hoʻokahi kanahā kumu kālā, ma lālo iho o nā papa he iwakālua, i ʻelua kumu ma loko iho o ka papa hoʻokahi, no kona mau komo ʻelua, a i ʻelua kumu ma lalo iho o kekahi papa no kona mau komo ʻelua.

²⁰ “A no ka lua o ka ʻaoʻao o ka halelewa ma ke kūkulu ʻākau, he iwakālua nō papa;

²¹ a me ko lākou mau kumu kālā, he kanahā, ʻelua kumu ma lalo iho e kekahi papa, a ʻelua kumu ma lalo iho o kekahi papa.

²² “A no nā ʻaoʻao o ka halelewa ma ke komohana, e hana nō ʻoe i ʻeono papa.

²³ “A e hana nō hoʻi ʻoe i ʻelua papa no nā kihi o ka halelewa, ma nā ʻaoʻao ʻelua.

²⁴ “E hui ʻia nō ia mau mea ma lalo, a e hui ʻia nō hoʻi ma luna, ma ke poʻo, a i loko o ke apo hoʻokahi; pēlā nō lāua a ʻelua, a no nā kihi ʻelua o lāua.

²⁵ “ʻEwalu nō ia mau papa, a me ko lākou mau kumu kālā, he ʻumikumamāono kumu, ʻelua nō kumu ma lalo o kekahi papa, a ʻelua nō kumu ma lalo o kekahi papa.

²⁶ ¶ “A e hana nō hoʻi ʻoe i mau lāʻau kī, he sitima ka lāʻau, i ʻelima kī no nā papa ma kekahi ʻaoʻao o ka halelewa,

²⁷ a i ʻelima kī no nā papa ma kekahi ʻaoʻao o ka halelewa, a i ʻelima kī hoʻi no nā papa o nā ʻaoʻao o ka halelewa, no nā ʻaoʻao ʻelua hoʻi ma ke komohana.

²⁸ “A ʻo ke kī waena, ma waenakonu o nā papa, e holo nō ia, mai kekahi kala a i kekahi kala.

²⁹ “E uhi nō hoʻi ʻoe i nā papa i ke gula, a e hana nō hoʻi ʻoe i ko lākou mau apo, he gula, i wahi no nā kī, a e uhi nō hoʻi ʻoe i nā ki i ke gula.

³⁰ “A e kūkulu ʻoe i ka halelewa me ke kumu hoʻohālike i hōʻike ʻia aku ai iā ʻoe ma ka mauna.

³¹ ¶ “A e hana hoʻi ʻoe i pākū, he uliuli a me ka poni a me ka ʻulaʻula, a me ke olonā i hilo ʻia, ʻo ka hana a ka poʻe akamai, e hana ʻia hoʻi ia me nā kerubima.

³² “A e kaulaʻi nō hoʻi ia ma nā kia lāʻau sitima ʻehā, i uhi ʻia i ke gula; he gula no ko lākou mau lou, ma luna o nā kumu kālā ʻehā.

³³ “A e kaulaʻi ʻoe i ka pākū ma lalo iho o nā lou i lawe mai ai ʻoe i ka pahu Hōʻike ma lalo o ka pākū; a na ka pākū e hoʻokaʻawale nō ʻoukou ma waena o kahi hoʻāno, a me Kahi Hoʻāno Loa.

³⁴ “A e kau nō ʻoe i ka noho aloha ma luna ma ka pahu Hōʻike, ma loko o Kahi Hoʻāno Loa.

³⁵ “E hoʻonoho ʻoe i ka papa ʻaina ma waho o ka pākū, a e kau ʻoe i ka ipukukui manamana ma ke alo o ka papa ʻaina ma ka ʻaoʻao o ka halelewa ma ke kūkulu hema. A e hoʻonoho ʻoe i ka papa ʻaina ma ka ʻaoʻao ʻākau.

³⁶ ¶ “A e hana nō hoʻi ʻoe i pale no ka puka komo o ka halelewa: he uliuli, he poni, he ʻulaʻula, a me ke olonā i hilo ʻia, i hana ʻia e ka mea humuhumu lopi ʻano ʻē.

³⁷ “E hana hoʻi ʻoe i ʻelima kia lāʻau sitima no nā pale, a e uhi ia mau mea i ke gula, a he gula hoʻi ko lākou mau lou; a e hoʻoheheʻe i ʻelima kumu keleawe no lākou.