KA BUKE ʻALUA A MOSE, I KAPA ʻIA PUKA ʻANA 25 - Ka Baibala Hemolele

1 Ke kauoha ʻana no ka halelewa. 10 Ke ʻano o ka pahu. 17 Ka noho aloha me nā kerubima. 23 Ka papa ʻaina. 31 Ka ipukukui.

MOKUNA XXV.

¹ ¶ ʻŌlelo mai ʻo Iēhova iā Mose, ʻī maila:

² “E ʻī aku ʻoe i nā mamo a ʻIseraʻela, e lawe mai lākou i mōhai makana naʻu. E lawe nō ʻoukou naʻu i ka mōhai makana o kēlā kanaka kēia kanaka i hāʻawi ʻoluʻolu mai me kona naʻau.

³ “Eia hoʻi ka mōhai makana a ʻoukou e lawe ai no lākou mai, he gula, he kālā, he keleawe;

⁴ he lole uliuli, a me ka poni, a me ka ʻulaʻula, a me ka lole olonā keʻokeʻo, a me ka hulu kao;

⁵ a me nā ʻili hipa kāne i hoʻoluʻu ʻulaʻula ʻia, a me nā ʻili tehasa, a me ka lāʻau sitima;

⁶ i ʻaila hoʻi i mea mālamalama, a me nā hua ʻala, i mea ʻaila poni, a i mea ʻala maikaʻi;

⁷ a me nā pōhaku saredonuka, i mea e hoʻonohonoho ai i loko o ka ʻēpoda, a i loko o ka pale umauma.

⁸ “A e hana hoʻi lākou i keʻena kapu noʻu, i noho ai au i waena o lākou.

⁹ “E like me nā mea a pau aʻu e hōʻike aku ai iā ʻoe, ʻo ke kumu hoʻohālike o ke keʻena kapu, a me ke kumu hoʻohālike o kona mau mea e pili ana, pēlā nō ʻoe e hana ai.

¹⁰ ¶ “A e hana nō lākou i pahu lāʻau sitima, i ʻelua kūbita a me ka hapalua kona lōʻihi, i hoʻokahi kūbita a me ka hapalua kona laulā, a hoʻokahi kūbita a me ka hapalua kona kiʻekiʻe.

¹¹ “A e uhi nō hoʻi ʻoe ia me ke gula maikaʻi, ma loko, a ma waho ʻoe e uhi ai ia, a e hana nō hoʻi ʻoe ma luna i lei gula a puni ia mea.

¹² “A e hoʻoheheʻe ʻoe i ʻehā apo gula nona, a e hoʻokomo ma nā kihi ʻehā o ka pahu, i ʻelua apo ma kekahi ʻaoʻao ona, a i ʻelua apo ma kekahi ʻaoʻao ona.

¹³ “A e hana ʻoe i mau ʻauamo lāʻau sitima, a e uhi ia mau mea i ke gula.

¹⁴ “A e hoʻokomo ʻoe i nā ʻauamo ma loko o nā apo ma nā ʻaoʻao o ka pahu, i lawe ʻia ka pahu ma ia mau mea.

¹⁵ “E paʻa nō nā ʻauamo ma loko o nā apo o ka pahu, ʻaʻole lāua e lawe ʻia mai ka pahu aku.

¹⁶ “A e waiho ʻoe i loko o ka pahu i nā papa Kānāwai aʻu e hāʻawi aku ai iā ʻoe.

¹⁷ “A e hana ʻoe i noho aloha, he gula maikaʻi; i ʻelua kūbita a me ka hapalua kona loa, i hoʻokahi kūbita a me ka hapalua kona laulā.

¹⁸ “E hana nō hoʻi ʻoe i ʻelua kerubima gula, e hana ʻoe ia mau mea i gula paʻa wale nō, ma nā wēlau o ka noho aloha.

¹⁹ “E hana ʻoe i kekahi kerubima ma kekahi wēlau, a i kekahi kerubima ma kēlā wēlau, ma ka noho aloha kāu e hana ai ia mau kerubima, ma kona mau wēlau ʻelua.

²⁰ “A e hohola aku nā kerubima i nā ʻēheu ma luna, e uhi ana i ka noho aloha i ko lāua mau ʻēheu; a e kū pono nō nā maka o lāua kekahi i kekahi. E kau nō ko lāua mau maka ma ka noho aloha.

²¹ “A e kau nō ʻoe i ka noho aloha ma luna ma ka pahu; a ma loko o ka pahu ʻoe e waiho ai i nā papa Kānāwai aʻu e hāʻawi aku ai iā ʻoe.

²² “A ma laila wau e hālāwai ai me ʻoe, a e kamaʻilio pū nō hoʻi au me ʻoe, mai luna iho o ka noho aloha, a ma waena aku hoʻi o nā kerubima ma luna o ka pahu Hōʻike, no nā mea a pau aʻu e kauoha aku ai i nā mamo a ʻIseraʻela.

²³ ¶ “E hana nō hoʻi ʻoe i papa ʻaina lāʻau sitima: i ʻelua kūbita kona lōʻihi, a i hoʻokahi kūbita kona laulā, a i hoʻokahi kūbita a me ka hapalua kona kiʻekiʻe.

²⁴ “A e uhi ʻoe ia mea i ke gula maikaʻi, a e hana hoʻi ʻoe i lei gula a puni ia mea.

²⁵ “A e hana ʻoe i kaʻe a puni ia mea, i hoʻokahi lima ka laulā, a e hana nō hoʻi ʻoe i lei gula ma ua kaʻe lā a puni.

²⁶ “A e hana nō hoʻi ʻoe i ʻehā apo gula no ua papa ʻaina lā, a e hoʻokomo i ua mau apo lā ma nā kihi ʻehā ma luna o kona mau wāwae.

²⁷ “E kū pono nō nā apo i nā kaʻe, i wahi e hoʻokomo ai i nā ʻauamo e lawe ai i ua papa ʻaina lā.

²⁸ “A e hana ʻoe i ua mau ʻauamo lā, he lāʻau sitima, a e uhi ia mea i ke gula, i lawe ʻia ka papa ʻaina ma luna o lāua.

²⁹ “A e hana ʻoe i kona mau kīʻaha, a me kona mau puna, a me kona mau poʻi, a me kona mau ipu i mea ninini mōhai. E hana ʻoe ia mau mea, he gula maikaʻi.

³⁰ “E kau nō hoʻi ma luna o ka papa ʻaina i berena hōʻike mau loa i mua oʻu.

³¹ ¶ “A e hana nō hoʻi i ipukukui manamana he gula maikaʻi, e hana ʻia ua ipukukui lā a poepoe. ʻO kona kumu, ʻo kona mau lālā, a me kona mau ipu, a me kona mau puʻupuʻu, a me kona mau pua, o ia ʻāpana hoʻokahi nō.

³² “E puka mai nō nā lālā ʻeono ma nā ʻaoʻao ona; ʻekolu lālā o ka ipukukui mai loko mai o kekahi ʻaoʻao, a ʻekolu lālā o ka ipukukui, mai loko mai o kekahi ʻaoʻao.

³³ “ʻEkolu nō ipu e like me nā ʻalemona, me ka puʻupuʻu a me ka pua, ma ka lālā hoʻokahi; a ʻekolu nō ipu e like me nā ʻalemona, me ka puʻupuʻu a me ka pua, a pēlā ma nā lālā ʻeono i puka mai, mai loko mai o ka ipukukui.

³⁴ “A ma ke kumu ipukukui, ʻehā nō ipu e like me nā ʻalemona, me ko lākou mau puʻu a me ko lākou mau pua.

³⁵ “He puʻu ma lalo iho o kona mau lālā ʻelua, a he puʻu ma lalo iho o kona mau lālā ʻelua, a he puʻu ma lalo iho o kona mau lālā ʻelua, e like me nā lālā ʻeono e puka mai ana mai loko mai o ua ipukukui lā.

³⁶ “E hana hoʻokahi ʻia nā puʻu a me nā lālā, ʻo kona mau mea a pau, he gula paʻa wale nō.

³⁷ “A e hana nō hoʻi ʻoe i kona mau ipu ʻaila ʻehiku, a e kau ʻo ia ia mau mea ma luna, i hoʻomālamalama aku ai lākou ma kona alo.

³⁸ “A ʻo kona ʻūpā ahi a me kona ʻūpā koli kukui, he gula maikaʻi.

³⁹ “E hana nō ʻo ia ia mea, a me kona mau mea hana, hoʻokahi tālena gula maikaʻi.

⁴⁰ “E mālama hoʻi ʻoe e hana e like me ke kumu hoʻohālike i hōʻike ʻia iā ʻoe ma ka mauna.