KA BUKE ʻALUA A MOSE, I KAPA ʻIA PUKA ʻANA 24 - Ka Baibala Hemolele

1 No ka piʻi ʻana o Mose mā i ka mauna a me ka hāʻawi ʻana mai o ke Akua i nā papa kānāwai.

MOKUNA XXIV.

¹ ¶ ʻĪ maila ʻo ia iā Mose, “E piʻi mai ʻoe i o Iēhova nei, ʻo ʻoe, a me ʻAʻarona, a me Nadaba, a me ʻAbihu, a me nā lunakahiko o kā ʻIseraʻela he kanahiku; a e hoʻomana ʻoukou ma kahi mamao aku.

² “A ʻo Mose wale nō ka mea hele mai a kokoke i o Iēhova nei; akā, ʻo lākou ʻaʻole hele mai a kokoke; ʻaʻole hoʻi e piʻi pū nā kānaka me ia.”

³ Hoʻi aʻela ʻo Mose, a haʻi akula i kānaka i nā ʻōlelo a pau a Iēhova, a me nā kānāwai a pau; hoʻōho maila nā kānaka a pau me ka leo kahi, ʻī maila, “ʻO nā ʻōlelo a pau a Iēhova i ʻōlelo mai ai, e hana nō mākou.”

⁴ A kahakaha ihola ʻo Mose i nā ʻōlelo a pau a Iēhova, a ala aʻela i kakahiaka nui, a kūkulu ihola i kuahu ma lalo o ka mauna, a me nā kia he ʻumikumamālua, e like me nā ʻohana he ʻumikumamālua o kā ʻIseraʻela.

⁵ A hoʻouna aʻela ia i mau kānaka uʻi o nā mamo a ʻIseraʻela, na lākou i mōhai aku i nā mōhai kuni, no Iēhova, a kaumaha aku nō hoʻi lākou i mau bipi kāne i mōhai hoʻomalu.

⁶ A lawe ihola ʻo Mose i ka hapalua o ke koko, a waiho akula ma loko o nā kīʻaha, a kāpīpī ihola ia i kekahi hapalua o ke koko ma luna o ke kuahu.

⁷ A lawe ihola ia i ka buke o ka berita, a heluhelu ma nā pepeiao o nā kānaka. ʻŌlelo akula lākou, “E hana nō mākou i nā mea a pau a Iēhova i ʻōlelo mai ai, a e hoʻolohe nō.”

⁸ A lawe aʻela ʻo Mose i ke koko, a kāpīpī ihola ma luna o nā kānaka, ʻōlelo maila, “Aia hoʻi ke koko o ka berita a Iēhova i hana mai ai me ʻoukou no kēia mau ʻōlelo a pau.”

⁹ ¶ A laila, piʻi akula ʻo Mose, a me ʻAʻarona, a me Nadaba, a me ʻAbihu, a me nā lunakahiko o kā ʻIseraʻela.

¹⁰ A ʻike akula lākou i ke Akua o kā ʻIseraʻela, a ma lalo iho o kona mau wāwae he mea me he sapeiro ka aʻiaʻi, e like hoʻi me ke kino o nā lani ke kālaʻe.

¹¹ ʻAʻole ia i kau mai i kona lima ma luna o nā luna o nā mamo o kā ʻIseraʻela. A ʻike nō lākou i ke Akua, a ʻai nō, a inu nō hoʻi.

¹² ¶ ʻŌlelo maila ʻo Iēhova iā Mose, “E hele mai ʻoe i oʻu nei i ka mauna, a e noho ma laila; a e hāʻawi aku au iā ʻoe i pōhaku papa, me ke kānāwai, a me nā kauoha aʻu i palapala ai, i aʻo aku ʻoe ia mea.”

¹³ Kū aʻela ʻo Mose i luna, a me kāna kauā ʻo Iosua; a piʻi akula ʻo Mose i ka mauna o ke Akua.

¹⁴ ʻŌlelo ihola ia i nā lunakahiko, “E kakali ʻoukou no māua, a hoʻi mai māua iā ʻoukou; aia hoʻi, me ʻoukou ʻo ʻAʻarona lāua me Hura; a ʻo ka mea loaʻa kahi pilikia, e hele aʻe ia i o lāua lā.”

¹⁵ Piʻi akula ʻo Mose i ka mauna, a uhi maila ka ʻohu i ka mauna.

¹⁶ Pūā maila ka nani a Iēhova ma luna o ka mauna i Sinai, a uhi maila ka ʻohu ma luna iho i nā lā ʻeono; a i ka hiku o ka lā hea maila ʻo ia iā Mose, ma loko mai o ka ʻohu.

¹⁷ I nā maka o nā mamo a ʻIseraʻela, i ka nānā ʻana i ka nani o Iēhova, ua like ia me ke ahi e ʻai ana ma ka piko o ka mauna.

¹⁸ Hele akula ʻo Mose i loko pono o ka ʻohu, a piʻi akula i ka mauna, a ma laila nō ʻo Mose ma ka mauna hoʻokahi kanahā ao, hoʻokahi kanahā pō.