KA BUKE ʻALUA A MOSE, I KAPA ʻIA PUKA ʻANA 23 - Ka Baibala Hemolele

1 No nā ʻōlelo hewa. 4 No ka hana lokomaikaʻi me ka pololei. 10 Ka waiho wale ʻana i ka ʻāina. 12 Sābati. 13 Nā akua ʻē. 14 No nā ʻahaʻaina ʻekolu. 18 No ke koko a me ke kelekele o nā mōhai. 20 Ka hoʻomaikai ʻana o Iēhova.

MOKUNA XXIII.

¹ ¶ “Mai hoʻāla ʻoe i ka ʻōlelo wahaheʻe. Mai kau pū i kou lima me ka poʻe hewa e lilo i mea hōʻike hoʻokaumaha.

² “Mai hahai ma muli o ka lehulehu e hana hewa, mai pane aku hoʻi ma ke kūʻē ma muli o ka lehulehu, e hoʻohewa wale.

³ “Mai kōkua ʻoe ma muli o ka ʻilihune i kona hewa ʻana.

⁴ ¶ “Inā hālāwai ʻoe me ka bipi a kou hoalauna e hele hewa ana, me kona hoki paha, e ʻoiaʻiʻo nō e hoʻihoʻi mai ʻoe ia mea i ona lā.

⁵ “Inā ʻike ʻoe i ka hoki a ka mea i huhū mai iā ʻoe, e moe ana ma lalo iho o kona kaumaha, a manaʻo ʻoe ʻaʻole kōkua iā ia, a laila, e kōkua aku nō ʻoe iā ia.

⁶ “Mai hoʻokahuli ʻoe i ka pono o ke kanaka hune i kona hoʻokolokolo ʻana.

⁷ “E mamao aku ʻoe i ka mea wahaheʻe; a mai pepehi ʻoe i ka mea i hewa ʻole, a me ka mea i pono; no ka mea, ʻaʻole au e hoʻāpono aku i ka mea i hewa.

⁸ “Mai lawe ʻoe i ka waiwai kīpē; no ka mea, ʻo ka waiwai kīpē ka mea e makapō ai ka poʻe ʻike, a e kekeʻe ai nā ʻōlelo a ka poʻe pono.

⁹ “Mai hoʻokaumaha ʻoe i ka malihini; no ka mea, ua ʻike nō ʻoukou i ka manaʻo o ka malihini, no ko ʻoukou noho malihini ʻana ma ka ʻāina ʻo ʻAigupita.

¹⁰ ¶ “E lūlū ʻoe i kou ʻāina i ʻeono mau makahiki, a e hōʻiliʻili hoʻi i kona hua.

¹¹ “Akā, i ka hiku o ka makahiki e hoʻomaha ʻoe i ka ʻāina, e waiho wale hoʻi; i ʻai iho ka poʻe hune o kou poʻe kānaka; a ʻo ka mea a lākou e hoʻokoe ai, na nā holoholona o ke kula ia e ʻai. Pēlā nō ʻoe e hana ai i kou pā waina, a me kou lāʻau ʻoliva.

¹² “I nā lā ʻeono e hana ai ʻoe i kāu hana, a e hoʻomaha hoʻi i ka lā hiku; i hoʻomaha ai kāu bipi a me kou hoki, i hoʻohoʻihoʻi ʻia hoʻi ke keiki kāne a kāu kauā wahine, a me ka malihini.

¹³ “Ma nā mea a pau aʻu i ʻōlelo ai iā ʻoukou e mālama iā ʻoukou iho; mai haʻi iki i ka inoa o nā akua ʻē, ʻaʻole hoʻi e lohe ʻia ia ma kou waha.

¹⁴ ¶ “E mālama ʻoe i ʻekolu ʻahaʻaina noʻu i ka makahiki.

¹⁵ “E mālama ʻoe i ka ʻAhaʻaina o ka Berena Hū ʻOle; ʻehiku lā ʻoe e ʻai ai i ka berena hū ʻole, me aʻu i kauoha aku ai iā ʻoe, i ka manawa i hāʻawi ʻia, ma ka malama ʻo ʻAbiba; no ka mea, ia wā ʻoe i hele mai ai mai loko mai o ʻAigupita; mai ʻike ʻia naʻe kekahi i mua oʻu me ka waiwai ʻole;

¹⁶ a me ka ʻAhaʻaina o ka ʻOhi Mua ʻana, ʻo nā hua mua hoʻi o kāu hoʻoikaika ʻana, ka mea aū i lūlū ai ma ke kula, a me ka ʻAhaʻaina o ka Hōʻiliʻili ʻAi ʻana, ʻo ia hoʻi ka hope o ka makahiki, i kou wā e hōʻiliʻili ai mai loko mai o ke kula, i kāu mea i hoʻoikaika ai.

¹⁷ “E ʻike ʻia nō ko ʻoukou poʻe kāne a pau i mua o Iēhova ke Akua, i ʻekolu nō ʻikea ʻana i ka makahiki hoʻokahi.

¹⁸ ¶ “Mai kaumaha aku ʻoe i ke koko o kaʻu mōhai, me ka berena hū, ʻaʻole hoʻi e hoʻokoe ʻia ke kelekele o kaʻu ʻahaʻaina a kakahiaka.

¹⁹ “E lawe mai nō ʻoe i loko o ka hale o Iēhova, kou Akua, i ka mua o nā hua mua o kou ʻāina. Mai hoʻolapalapa ʻoe i ke kao keiki ma loko o ka waiū o kona makuahine.

²⁰ ¶ “Aia hoʻi, e hoʻouna aku ana au i koʻu ʻānela ma mua ou, e mālama iā ʻoe ma ke ala, a e hoʻokomo iā ʻoe i kahi aʻu i hoʻomākaukau ai.

²¹ “E ao iā ia e hoʻolohe i kona leo, mai hoʻohuhū aku iā ia; no ka mea, ʻaʻole ia e kala mai i kou hewa; aia hoʻi, ma loko ona koʻu inoa.

²² “Akā, inā hoʻolohe ʻiʻo mai ʻoe i kona leo, a e hana hoʻi i nā mea aʻu e ʻōlelo aku ai; a laila, e lilo wau i ʻenemi no kou poʻe ʻenemi, a e hana ʻino aku au i ka mea e hana ʻino mai iā ʻoe.

²³ “No ka mea, e hele ana koʻu ʻānela ma mua ou, a e kaʻi aku iā ʻoe i kahi o kā ʻAmora a me kā Heta a me kā Pereza, a me ko Kanaʻana, a me kā Heva a me kā Iebusa, a naʻu nō lākou e ʻānai aku.

²⁴ “Mai kūlou ʻoe i ko lākou akua, ʻaʻole hoʻi e mālama aku iā lākou, ʻaʻole hoʻi e hana aku ma muli o kā lākou hana; akā, e hoʻokahuli loa ʻoe iā lākou, a e wāwahi loa i ko lākou mau kiʻi.

²⁵ “E mālama hoʻi ʻoukou iā Iēhova i ko ʻoukou Akua; a laila, nāna nō e hoʻomaikaʻi i kāu ʻai, a me kou wai; a e lawe aku nō hoʻi i ka maʻi, mai loko aku ou.

²⁶ “ʻAʻole loa e poholo wale ka hānau ʻana o kekahi mea ma kou ʻāina, ʻaʻole hoʻi e pā; e hoʻokō nō wau i kou mau lā.

²⁷ “Naʻu nō e hāʻawi i ka makaʻu ma mua ou, a naʻu nō e luku aku i nā kānaka a pau, ma kahi āu e hele aku ai, a naʻu nō e hana aku i kou poʻe ʻenemi, i huli ai ko lākou kua iā ʻoe.

²⁸ “A naʻu nō e hoʻouna aku i nalo hope ʻeha ma mua ou, na lākou nō e kipaku aku i kā Heva, a me ko Kanaʻana, a me kā Heta, ma mua ou.

²⁹ ʻAʻole naʻe au e kipaku aku iā lākou ma mua ou i ka makahiki hoʻokahi; o nāhelehele ka ʻāina, a nui loa iho nā holoholona hihiu e ʻalo mai iā ʻoe.

³⁰ “E kipaku liʻiliʻi aku au iā lākou mai kou alo aku, a lilo ʻoe i nui, a ili mai ka ʻāina nou.

³¹ “A naʻu nō e kau i kou palena mai ke Kai ʻUla, a hiki i ke Kai o Pilisetia, a mai ka wao nahele hoʻi a hiki i ka Muliwai; no ka mea, e hāʻawi aku ana au i nā kānaka o ia ʻāina i ko ʻoukou lima; a e kipaku aku ʻoe iā lākou mai kou alo aku.

³² “Mai hoʻopaʻa berita me lākou, ʻaʻole hoʻi me ko lākou mau akua.

³³ “ʻAʻole lākou e noho i kou ʻāina, o hoʻolilo lākou iā ʻoe i mea hana hewa mai iaʻu; no ka mea, inā e mālama ʻoe i ko lākou mau akua, e lilo auaneʻi ia i mea hoʻowalewale nou.”