KA BUKE ʻALUA A MOSE, I KAPA ʻIA PUKA ʻANA 22 - Ka Baibala Hemolele

1 He mau kānāwai no ka ʻaihue. 5 No ka lawe wale. 7 No ke kiʻi ʻana i kā haʻi. 16 No ka moekolohe. 18 No ke kilo. 19 No ka moe holoholona. 20 No ka mālama kiʻi. 21 No nā malihini. Nā wāhine kāne make a me nā keiki makua ʻole. 25 No kekahi mau mea ʻē aku.

MOKUNA XXII.

¹ ¶ “Inā e ʻaihue ke kanaka i ka bipi a i hipa paha, a kālua, a kūʻai lilo aku paha, a laila, e hāʻawi aku ʻo ia i ʻelima bipi no ka bipi, a i ʻehā hipa no ka hipa.

² “Inā e loaʻa ka ʻaihue e wāwahi ana, a inā i pepehi ʻia ʻo ia a make, ʻaʻole e pili kona koko.

³ “Akā, inā i puka mai ka lā ma luna ona, a laila, ua pili nō kona koko. Ua pono nō iā ia ke uku pau loa mai, a inā i nele ʻo ia, a laila, ua pono ke kūʻai ʻia ʻo ia no kona ʻaihue ʻana.

⁴ “Inā i loaʻa maopopo ma kona lima ka mea i ʻaihue ʻia e ola ana, inā he bipi, a inā he hoki a inā he hipa paha, e hāʻawi aku nō ʻo ia i pāpālua.

⁵ “Inā e hoʻopau ke kanaka i ko ka māla, a i ko ka pā waina, a hoʻokomo i kona holoholona i loko; a ʻai ʻo ia ma loko o ka māla a haʻi, a laila e uku aku ʻo ia i kahi maikaʻi o kāna māla iho, a me kahi maikaʻi o kāna pā waina.

⁶ ¶ “A inā holo aku ke ahi, a loaʻa nā kākalaioa, a ʻai ʻia nā puʻu huapalaoa, a ʻo ka huapalaoa e kū ana paha, a ʻo ko ka māla paha, a laila, e ʻoiaʻiʻo nō e uku aku ka mea nāna i kuni i ke ahi.

⁷ ¶ “Inā hāʻawi ke kanaka i wahi kālā na kona hoalauna e mālama, a i waiwai ʻē paha, a ua ʻaihue ʻia mai kona hale aku, inā e loaʻa ka mea nāna i ʻaihue, e uku pāpālua aku ʻo ia.

⁸ “Inā ʻaʻole i loaʻa ka mea nāna i ʻaihue, a laila, e lawe ʻia mai ka haku hale i nā luna kānāwai, inā paha ua kau aku ʻo ia i kona lima ma luna o ka waiwai o kona hoalauna.

⁹ “ʻO nā hewa no kēlā mea kēia mea, no ka bipi, no ka hoki, no ka hipa, no ka ʻaʻahu, no nā mea nalowale a pau a kekahi e ʻōlelo ai, nāna ia, e lawe ʻia ko lāua pono i mua o nā luna kānāwai, a ʻo ka mea a nā luna kānāwai e hoʻohewa ai, e uku pāpālua aku ʻo ia i kona hoalauna.

¹⁰ ¶ “Inā hāʻawi ke kanaka i hoki na kona hoalauna e mālama, a i bipi paha, a i hipa, a i kekahi holoholona ʻē aʻe paha, a i make ia, a ʻeha, a hoʻoholo ʻia ma kahi ʻē paha, ʻaʻole mea i ʻike aku;

¹¹ a laila, ma waena o lāua ka hoʻohiki ʻana iā Iēhova, ʻaʻole ʻo ia i kau i kona lima ma luna o ka waiwai o kona hoalauna; a e ʻae aku nō ka mea nāna ka waiwai, ʻaʻole kēlā e uku.

¹² “Akā, inā i ʻaihue ʻia aku ia mea, mai ona aku, e uku aku nō ʻo ia i ka mea nāna ka waiwai.

¹³ “Inā e haehae ʻia ʻo ia, a laila, e lawe mai kēlā i ke kino, i mea hōʻike, ʻaʻole hoʻi ʻo ia e uku no ka mea i haehae ʻia.

¹⁴ ¶ “A inā nonoi ke kanaka i kekahi mea a kona hoalauna, a ʻeha ia mea, a make paha, ʻaʻole e noho pū ana ka mea nāna ia, a laila, e ʻoiaʻiʻo nō e uku ʻo ia.

¹⁵ “Akā, inā e noho pū ana ka mea nāna ka waiwai, a laila, ʻaʻole ʻo ia e uku mai. Inā he mea hoʻolimalima, ua loaʻa ia no ka uku.

¹⁶ ¶ “Inā e puʻe ke kanaka i ke kaikamahine i hoʻopalau ʻole ʻia, a moe pū me ia, e ʻoiaʻiʻo nō e kūʻai nō ʻo ia iā ia i wahine nāna.

¹⁷ “Inā hōʻole loa kona makua kāne ʻaʻole e hāʻawi iā ia nāna, e kaupauna aku ʻo ia i kālā e like me ke kūʻai ʻana i nā wāhine puʻupaʻa.

¹⁸ ¶ Mai hoʻōla i ke kupua.

¹⁹ ¶ “ʻO ka mea moe pū me ka holoholona, e ʻoiaʻiʻo nō e make ia.

²⁰ ¶ “ʻO ka mea mōhai aku na kekahi akua ʻē, ʻaʻole na Iēhova, e luku loa ʻia akula ia.

²¹ “Mai hoʻokaumaha ʻoe i ka malihini, ʻaʻole hoʻi e hoʻoluhi iā ia; no ka mea, he poʻe malihini ʻoukou ma ka ʻāina ʻo ʻAigupita.

²² “Mai hoʻokaumaha ʻoe i ka wahine kāne make, a me ke keiki makua ʻole.

²³ “Inā hoʻokaumaha iki ʻoe iā lākou, a uē ʻuʻuku mai lākou iaʻu, e ʻoiaʻiʻo nō e hoʻolohe au i ko lākou uē ʻana;

²⁴ a e wela auaneʻi koʻu huhū, a e pepehi aku au iā ʻoukou i ka pahi kaua, a e lilo nō kā ʻoukou wāhine i wāhine kāne make a me kā ʻoukou kamaliʻi i kamaliʻi makua ʻole.

²⁵ ¶ “Inā hāʻawi ʻaiʻē aku ʻoe i ke kālā no koʻu poʻe kānaka i hune e noho pū ana me ʻoe, mai lilo ʻoe iā ia i mea hoʻouku kuala, mai kau hoʻi ʻoe i ka uku hoʻopaneʻe ma luna ona.

²⁶ “Inā lawe iki ʻoe i ka ʻaʻahu o kou hoalauna i uku pānaʻi, e hāʻawi hou aku nō ʻoe ia iā ia i ka wā e napoʻo ai ka lā i lalo.

²⁷ “No ka mea, ʻo ia kona mea e uhi ai, ʻo kona ʻaʻahu no kona ʻili. Ma loko o ke aha ʻo ia e moe ai? A hiki i ka manawa e uē mai ai ʻo ia iaʻu e hoʻolohe nō wau; no ka mea, ua lokomaikaʻi nō au.

²⁸ ¶ “Mai ʻōlelo hōʻino ʻoe i nā luna kānāwai, ʻaʻole hoʻi e ʻōlelo hōʻino i ka mea e noho aliʻi ana ma luna o koʻu poʻe kānaka.

²⁹ “Mai ʻauʻa ʻoe i kāu ʻai i oʻo mua, a me kou waina mua. E hāʻawi mai nō ʻoe i kāu hiapo, o kāu mau keiki kāne naʻu.

³⁰ “Pēlā nō ʻoe e hana ai me kāu mau bipi a me kāu poʻe hipa; ʻehiku lā e noho ai me kona makuahine, a i ka walu o ka lā, e hāʻawi mai ʻoe ia mea iaʻu.

³¹ “A e lilo auaneʻi ʻoukou i poʻe kānaka hoʻāno noʻu, ʻaʻole hoʻi ʻoukou e ʻai i ka ʻiʻo i haehae ʻia e nā holoholona ma ke kula, e kiola aku ʻoukou ia na nā ʻīlio.