KA BUKE ʻALUA A MOSE, I KAPA ʻIA PUKA ʻANA 21 - Ka Baibala Hemolele

1 Nā kānāwai no ka poʻe kauā. 7 No ka pepehi kānaka a me nā hana kolohe. 28 No nā holoholona kolohe.

MOKUNA XXI.

¹ ¶ “Eia nā ʻōlelo kūpaʻa āu e kau ai i mua o lākou.

² “Inā e kūʻai ʻoe nāu i kauā Hebera, e hoʻokauā mai nō ʻo ia i ʻeono makahiki; a i ka hiku hoʻi, e kuʻu wale ʻia aku nō ʻo ia.

³ “Inā i komo mai ʻo ia i loko, ʻo kona kino wale nō, a laila, e hele aku nō ʻo ia i waho, ʻo kona kino wale nō; akā, inā i mare ʻia ʻo ia, a laila e hele pū aku nō kāna wahine me ia.

⁴ “Inā ua hāʻawi mai kona haku i wahine nāna, a ua hānau mai ʻo ia i mau keiki kāne nāna, a i mau kaikamāhine paha, a laila no ka haku ka wahine a me kāna mau keiki, a e hele aku nō ke kāne, ʻo ia wale nō.

⁵ “Akā, inā ʻōlelo ikaika mai ke kauā, ‘Ua aloha au i kuʻu haku, a me kuʻu wahine, a me kaʻu mau keiki, ʻaʻole au e hele kuʻu wale ʻia’;

⁶ a laila, e lawe mai kona haku iā ia i nā luna kānāwai; a lawe mai nō hoʻi iā ia i ka puka, a i ka lapauila o ka puka paha; a e hou iho kona haku i kona pepeiao i ke kui, a e hoʻokauā mau loa mai ʻo ia nāna.

⁷ “Inā e kūʻai lilo aku ke kanaka i kāna kaikamahine i kauā wahine, ʻaʻole ia e hoʻokuʻu ʻia aku e like me ke kuʻu ʻia ʻana o nā kauā kāne.

⁸ “Inā i hewa ʻo ia i nā maka o kona haku, ka mea i hoʻopalau mai iā ia nāna, a laila, e hoʻōla pānaʻi ʻo ia iā ia. ʻAʻole ia e hiki ke kūʻai aku iā ia i ko ka ʻāina ʻē, no kāna hana ʻino ʻana iā ia.

⁹ “A inā ua hoʻopalau ʻo ia iā ia na kāna keiki kāne, e hana aku nō ʻo ia iā ia e like me ka hana ʻana i nā kaikamāhine.

¹⁰ “A inā i lawe ʻo ia i wahine hou nāna, mai hoʻēmi ia i ka ʻai a me ka ʻaʻahu, a me ka launa mare o kēlā wahine.

¹¹ “A i ʻole ia e hana aku i kēia mau mea ʻekolu iā ia, a laila, e hoʻokuʻu wale ʻia aku ʻo ia, me ka uku ʻole ʻia mai i ke kālā.

¹² ¶ “ʻO ka mea pepehi i kanaka, a make ia, e ʻoiaʻiʻo nō e pepehi ʻia ʻo ia.

¹³ “Inā hoʻohālua ʻole ke kanaka, a na ke Akua i hāʻawi mai iā ia i loko o kona lima, a laila, naʻu nō e kuhikuhi aku iā ʻoe i kahi nona e peʻe aku ai.

¹⁴ “Akā, inā i hana hoʻokiʻekiʻe ke kanaka i kona hoalauna, e pepehi maʻalea iā ia, e lawe nō ʻoe iā ia mai koʻu kuahu aku, i make ia.

¹⁵ ¶ “ʻO ka mea hahau i kona makua kāne, a i kona makuahine, e ʻoiaʻiʻo nō, e make ia.

¹⁶ ¶ “ʻO ka mea ʻaihue i ke kanaka, a kūʻai lilo aku iā ia, a inā i loaʻa ʻo ia ma kona lima, e ʻoiaʻiʻo nō, e make ia.

¹⁷ “A ʻo ka mea hāʻiliʻili i kona makua kāne, a me kona makuahine, he ʻoiaʻiʻo nō, e make ia.

¹⁸ ¶ “A inā hakakā nā kānaka, a pehi aku kekahi i kona hoa i ka pōhaku, a kuʻi aku i ka lima, ʻaʻole hoʻi ia i make, ua moe naʻe ma kahi moe;

¹⁹ inā ala hou ʻo ia a hele i waho ma kona koʻokoʻo, a laila, e pakele nō ka mea nāna ia i pepehi; akā, e uku nō ʻo ia, no kona hoʻōki ʻana i kāna hana, a nāna nō hoʻi e hoʻōla loa aku iā ia.

²⁰ ¶ “A inā e hahau ke kanaka i kāna kauā kāne, a i kāna kauā wahine, i ka lāʻau, a make ia ma lalo iho o kona lima, e ʻoiaʻiʻo nō, e hoʻopaʻi ʻia ʻo ia.

²¹ “Akā, inā e ola ʻo ia i hoʻokahi lā paha, a i ʻelua paha, a laila, ʻaʻole ia e hoʻouku ʻia; no ka mea, ʻo ia kāna kālā.

²² ¶ “Inā hakakā nā kānaka, a hoʻoʻeha i ka wahine hāpai keiki, a hemo akula kāna keiki, ʻaʻole hoʻi he hewa ma hope; e ʻoiaʻiʻo nō e hoʻouku ʻia ʻo ia e like me ka mea e kau ʻia ma luna ona e ke kāne a ka wahine; a e hāʻawi nō ʻo ia i mua o nā luna kānāwai.

²³ “Akā, inā he hewa ma hope, a laila, e hāʻawi nō ʻoe i ke ola no ke ola,

²⁴ i ka maka no ka maka, i ka lima no ka lima, i ka wāwae no ka wāwae.

²⁵ “I ke kuni ʻana no ke kuni ʻana, i ka palapū no ka palapū, i ka paopao ʻana no ka paopao ʻana.

²⁶ ¶ “A inā e hahau ke kanaka i ka maka o kāna kauā kāne, a i ka maka o kāna kauā wahine, a oki loa ia, a laila, e hoʻokuʻu wale iho ʻo ia iā ia, no kona maka.

²⁷ “A inā kuʻi ʻo ia i ka niho o kāna kauā kāne, a i ka niho o kāna kauā wahine, a laila, e hoʻokuʻu wale iho ʻo ia iā ia, no kona niho.

²⁸ ¶ “Inā e ʻō iho ka bipi i ke kanaka, a i ka wahine, a make lāua; a laila, e ʻoiaʻiʻo nō e hailuku ʻia ua bipi lā, ʻaʻole hoʻi e ʻai ʻia kona ʻiʻo, a e hala ʻole ke kahu o ka bipi.

²⁹ “Akā, inā i ʻō ʻo ia ma mua, a ua haʻi ʻia i kona kahu, ʻaʻole naʻe ia i hoʻopaʻa iā ia, a ua pepehi ʻo ia i ke kanaka, a i ka wahine paha, a laila, e hailuku ʻia ua bipi lā, a e make nō hoʻi kona kahu.

³⁰ “Akā, inā e hoʻouku ʻia ʻo ia i ke kālā, a laila, e hāʻawi nō ʻo ia i ka uku no kona ola, e like me ka mea i kau ʻia ma luna ona.

³¹ “Inā i ʻō ʻo ia i ke keiki kāne, a inā i ʻō ʻo ia i ke kaikamahine paha, e hana ʻia aku nō ʻo ia e like me kēia kānāwai.

³² “Inā e ʻō iho ka bipi i ke kauā kāne, a i ke kauā wahine paha, a laila, e uku aku ʻo ia i kanakolu sekela kālā na ko lāua haku, a e hailuku ʻia ua bipi lā.

³³ ¶ “A inā wehe ke kanaka i lua, a inā ʻeli ke kanaka i lua, ʻaʻole hoʻi e uhi, a i hāʻule ka bipi ma loko, a he hoki paha;

³⁴ a laila, e uku ka mea nāna ka lua, a e hāʻawi hoʻi i kālā na ke kahu o lāua; a e lilo ka mea make nāna.

³⁵ ¶ “A inā hoʻoʻeha ka bipi a kekahi kanaka i kā kekahi, a make ia, a laila, e kūʻai lilo aku lāua i ka bipi ola, a e puʻunaue i ke kālā, a e puʻunaue nō hoʻi lāua i ka bipi i make.

³⁶ “Akā, inā i ʻike ʻia ua ʻō nō ia bipi ma mua, ʻaʻole naʻe i hoʻopaʻa kona kahu iā ia, a laila, e ʻoiaʻiʻo nō e uku aku nō ia i bipi no ka bipi, a e lilo nō ka bipi make nāna.